Ntha 3 - ÎVUKU RÎA ÛVORO MWARO

Ngai nîwetire Musa

¹ Mûthenya ûmwe Musa akîrîthia ndîthia ya mûthoniwe Jethiro, mûthînjîri-Ngai wa Midiani, nîwavirire mbûri ikîranîrîtie werûrî na igîkinya kîrîmarî gîa Sinai. Kîrîma gîa Sinai Kîamrî kîrîma kîtheru.

² Nake mûraika wa Ngai-Mûnene nîwaumîrîre Musa. Mûraika ûcio aarî rûrîrîmbîrî rwa mwaki waumaga kîthakarî. Nake Musa nîwaroririe na akîona kîthaka gîgîakana mwaki, nwatî gîtiavîcaga.

³ Musa nîwaugire atîrî, “Ûyû nî ûndû mûgeni. Kîthaka kîrarega kûvîa nîkî? Nîngûthiî vakuvî ngone.”

⁴ Rîrîa Ngai-Mûnene oonire Musa nîwakuvîvîria, arî gatagatî ga kîthaka nîwamwîtire atîrî, “Musa! Musa!” Musa nîwacokirie atîrî, “Îî nîrî ava.”

⁵ Nake Ngai-Mûnene nîwamwîrire atîrî, “Ndûgaûke vakuvî makîria. Ruta iratû nîûndû ûrûngamîte vandû vatheru.

⁶ Nie nînie Ngai wa methe menyu ma tene, Ngai wa Iburahimu, Isaka na Jakovu.” Nake Musa nîwakunîkire ûthiû wake nîûndû nîwetigagîra kûroria Ngai.

⁷ Ngai-Mûnene nîwerire Musa atîrî, “Nîmonete mathîna ma andû akwa arîa marî Misiri. Nîmbîguîte makîrîra nîguo matethue kuuma kûrî anene ao na nîmenyete ûrîa marathînîka.

⁸ Kwoguo nie nyûrûrûkîte mbûke nîmatethûre kuuma kûrî andû a Misiri, nîmarute Misiri nîmavire vûrûri mwaro na mûnene. Vûrûri ûcio wîcûrîte îria na ûûkî, na nîkuo gûtûûragwa nî Akanaani, Ahiti, Amori, Aperizi, Ahivi na Ajebusi.

⁹ Nî ma nîmbîguîte kîrîro Kîam andû akwa na nîmonete ûrîa andû a Misiri maramavinyîrîria.

¹⁰ Rîu nîngûgûtûma ûthiî kûrî mûthamaki wa Misiri nîguo ûgatongorie andû akwa a Isiraeli kuuma vûrûri wake.”

¹¹ Nwatî Musa nîwerire Ngai atîrî; “Nie nîrî û atî nîguo nthiî kûrî mûthamaki ngarute andû a Isiraeli maume Misiri?”

¹² Ngai nîwacokerie Musa atîrî; “Ngethagîrwa nîrî nawe, na waruta andû a Isiraeli kuuma Misiri nîmûkaangooca mûrî kîrîmarî gîkî. Kîu nîkîo gîgaatuîka kîmenyithia atî nie nîngûtûmîte.”

¹³ Nake Musa nîwerire Ngai atîrî; “Nîngîthiî kûrî andû a Isiraeli nîmere, ‘Ngai wa methe menyu ma tene nîke ûndûmîte kûrî mue’, na mambûrie, ‘Ke etagwa atîa?’ Ngaameera atîa?”

¹⁴ Ngai nîwerire Musa atîrî, “NÎNIE ÛRÎA NIE. Kwoguo wagîrîrwe nîkûmera atîrî, ‘Ûrîa wîtagwa NIE nîke ûndûmîte kûrî mue.’ ”

¹⁵ Ngai nîwacokire akîra Musa ere andû a Isiraeli atî Ngai-Mûnene Ngai wa methe menyu, Ngai wa Iburahimu, Isaka, na Jakovu nîwandûma kûrî mue. Rîrî nîrîo rîîtwa rîakwa tene na tene na ûguo nîguo njiarwa cionthe ciagîrîrwe nî kûndirikanaga.

¹⁶ Thiî ûnganie atongoria onthe a andû a Isiraeli vamwe na ûmere atî, Ngai-Mûnene, Ngai wa methe menyu, Ngai wa Iburahimu, Isaka na Jakovu nî arakuumîrîre. Meere nîmonete ûrîa andû a Misiri marameka,

¹⁷ na nînduîte atî nîngûmaruta vûrûri wa Misiri kûu matûûraga na mathîna nîmavire vûrûri wîcûrîte ûûkî na îria. Vûrûri ûcio nîguo ûtûûragwa nî andû Akanaani, Ahiti, Amori, Aperizi, Ahivi na Ajebusi.

¹⁸ “Andû akwa nîmakaathikîrîria ûrîa ûkaamera. Nawe, vamwe na atongoria a andû a Isiraeli nîmûkaathiî kûrî mûthamaki wa Misiri mûmwîre atîrî, ‘Ngai-Mûnene, Ngai wa Ahibirania nîatumîrîrîte. Rîu, twîtîkîrie tûthiî rûgendo rwa mîthenya îthatû werûrî nîguo tûkarutîre Ngai-Mûnene, Ngai wetû magongoona.’

¹⁹ Nîmbîcî atî mûthamaki wa Misiri ndageetîkîra mûthiî tiga nwa aringîrîrîtue gwîka guo.

²⁰ Nwatî nîngaavûthîra vinya wakwa nîguo mverithie Misiri na njîra ya gwîka maûndû ma kûmakania. Vuva wa gwîka ûguo nîmakaamûrekereria mûthiî.

²¹ “Nîngaatûma andû a Misiri mamûve gîtîîo nîguo rîrîa andû akwa makaauma Misiri, matikaaume kuo njara ntheri.

²² Mûndûmûka wa wonthe Mûisiraeli nîakaathiî kûrî Mûmisiri ûrîa mariganîtie nake na kûrî mûndûmûka Mûmisiri ûrîa ûtûûraga gwake nyomba na amwîtie nguo na indo cia thaavu na sîlûva. Andû a Isiraeli nîmagekîra anake na erîtu ao indo icio na nîmagaakuua ûtonga wa andû a Misiri.”