Ntha 28 - ÎVUKU RÎA ÛVORO MWARO

Nguo cia Athînjîri-Ngai

¹ “Îra mûrwanyûkwe Aroni na avîcî ake, Nadabu, Abihu, Eleazaru, na Ithamaru maûke varî we. Mamûre ûmarute kûrî andû a Isiraeli, nîguo mandungatagîre marî athînjîri-Ngai.

² Ûgaatumîra mûrwanyûkwe Aroni nguo ntheru nîguo onekanage arî na riiri na arî mûthaka.

³ Îra mavundi arîa marî wara arîa naveere ûûgî matumîre Aroni nguo, nîguo amûrwe andungatagîre arî mûthînjîri-Ngai.

⁴ Meere matume nguo ya gûkunîkîra kîthûri, efodi, nguo ndaca, kavuti karaca gakinyîte nthûng'warî na kagemetue na ndigi cia marangi ngûrani, kîremba na mûcivi mûraca ûtumîtwe na gîtambaa. Nîmatume nguo icio ntheru cia mûrwanyûkwe Aroni na avîcî, nîguo mandungatagîre marî athînjîri-Ngai.

⁵ Mavundi mau magaatûmîra ndigi cia thaavu, vururu, njambarawe na cia rangi ndune cia gûtuma gîtambaa Kîamro.

⁶ “Nîmagaatuma efodi ya gîtambaa kîrîa Kîamro Kîam ndigi cia rangi wa vururu, njambarawe na ndune na cia thaavu îgemetue waro

⁷ Efodi îo îthîrwe îrî na tûmîcivi twîrî twa ituro twa kûmînyitithania tûtumîrîrîtwe mîenarî yayo.

⁸ Nîmagaatuma mûcivi mwaro wa ndigi wata icio na ûtumîrîrwe efodirî na mwena wa mbere. Efodi na mûcivi ûcio igaatuîka kîndû kîmwe.

⁹ Na ûgooca mathiga maîrî ma goro ma marangi meengî metagwa Karineli na wandîke mathigarî mau marîîtwa ma avîcî arîa îkûmi na aîrî a Jakovu.

¹⁰ Ûkaamandîka marîîtwa mau marûmanîrîrîte wata ûrîa maarûmanîrîrîte magîciarwa. Wandîke marîîtwa matandatû îthigarî rîmwe, ûcoke wandîke marîîtwa matandatû îthigarî rîu rîngî.

¹¹ Ûgaacaria mûndû ûrî na wara wa kûrûtha indo na mathiga ma goro andîke marîîtwa ma avîcî a Isiraeli mathigarî mau maîrî. Mekîre vandû varûthîtwe na thaavu nîguo methîrwe marî vandû vamwe.

¹² Ûnyitithanie mathiga mau ma goro na tûmîcivi twa gûcuria ituro twa efodi nîguo methagîrwe marûngamîrîrîte mîvîrîga îrîa îkûmi na îîrî ya Isiraeli. Aroni agaakuuaga marîîtwa mau na ituro ciake arî mbere ya Ngai-Mûnene nîguo Ngai-Mûnene amaririkanage.

¹³ Na ûkaarûtha tûnyamû twîrî twa thaavu twa kûnyitîrîra mathiga marîa ma goro,

¹⁴ na ûrûthe mîkathî îîrî yokothetwe na thaavu ntheri. Ûkaanyitithania mîkathî îo na tûnyamû tûu twîrî twa thaavu.

Nguo ya kîthûri ya Mûthînjîri-Ngai Mûnene

¹⁵ “Ûgaatuma nguo ya kîthûri ya Mûthînjîri-Ngai Mûnene ya gûtûmagîra rîrîa akwenda kûmenya wendi wa Ngai. Îtumwe waro nî mûndû ûrî na wara wata ûrîa efodi yatumîtwe. Na îgaatumwa na thaavu, na ndigi cia rangi wa vururu, njambarawe, na cia rangi ndune na îtumwe ya gîtambaa Kîamro.

¹⁶ Nguo îo îkethîrwa îkûnjîtwe maita maîrî, naguo ûraca wayo ûkethîrwa ûrî na inji kenda na wariî wayo wa inji kenda.

¹⁷ Ûkaagemia na mîvari îna ya mathiga ma goro. Mûvari wa mbere wîthîrwe ûrî wa mathiga ma wakiki îrîa ndune, yakuti, na mbaregathu.

¹⁸ Naguo mûvari wa kaîrî wîthîrwe ûrî wa mathiga ma thumarati, na yakuti ya vururu, na alimathi.

¹⁹ Mûvari wa kathatû, wîkîrwe mathiga ma wakiki ya vururu, yacimu, na amethuthito.

²⁰ Mûvari wa kana ûkaawîkîra îthiga rîa mûthemba wa thumarati îrîa ntheru, na onigithi, na Jathiti. Mathiga mau ma goro ûmamundîrîre tûnyamûrî twa thaavu twa kûmanyitîrîra.

²¹ Mathiga mau ma goro makethîrwa marî îkûmi na maîrî. Na wa îthiga rîkethîrwa rîandîkîtwe rîîtwa rîmwe rîa mîvîrîga îrîa îkûmi na îîrî ya Isiraeli.

²² Ûkaarûtha mîkathî îîrî ya thaavu ntheri yokothetwe ta mîkanda ya gûtumîrîrwa nguorî ya kîthûri,

²³ na ûrûthe icûvî cia thaavu igîrî na ûitumîrîre mîthiiarî îîrî ya mwena wa îgûrû wa nguo ya kîthûri.

²⁴ Ûgeekîra mîkathî îo îîrî ya thaavu icûvîrî icio cia thaavu irî mîthiiarî ya nguo ya kîthûri.

²⁵ Mîthiia îo îngî îîrî ya mîkathî ya thaavu ûkaamîoverera tûnyamûrî tûrîa twa thaavu twa kûnyitîrîra mathiga ma goro. Na njîra wata îo ûmînyitithanie na tûmîcivi twa ituro twa efodi mwenarî wa mbere.

²⁶ Ûcoke ûrûthe icûvî igîrî cia thaavu na ûciîkîre mîthiiarî yoîrî ya ngurumo ya nguo ya kîthûri. Icûvî icio ciîthîrwe irî mwena wa ndaarî iriganîtie na efodi.

²⁷ Ûcoke ûrûthe icûvî cia thaavu ciîngî igîrî na ûinyitithanie mwena wa ngurumo wa mbere wa tûmîcivi twa ituro twa efodi vakuvî na varîa inyitithanîrîtue na mûcivi ûrîa mwaro wa efodi.

²⁸ Ûkaanyitithania icûvî cia nguo ya kîthûri na icûvî cia efodi na mûkumbû wa rangi ya vururu, nîguo nguo ya kîthûri îmamîre mûcivi wa efodi ndîkaaregere.

²⁹ “Vîndî îrîa Aroni agaatonya vandû varîa vatheru, nîakethîrwa ekîrîte nguo ya kîthûri yandîkîtwe marîîtwa ma avîcî a Isiraeli, nîguo Nie, Ngai-Mûnene ndirikanage andû akwa vîndî cionthe.

³⁰ Ûgeekîra Urimu na Thumimu nguorî ya kîthûri, nîguo Aroni athiîcage nacio rîrîa akûthiî mbere ya Ngai-Mûnene. Vîndî îrîa ekîrîte nguo ya kîthûri akaavotaga kûmenya ûrîa Ngai-Mûnene akwenda nîûndû wa andû a Isiraeli.

Nguo ciîngî cia ûthînjîri-Ngai

³¹ “Rungu rwa efodi Mûthînjîri-Ngai ekagîre nguo ndaca îtumîtwe ya ndigi cia rangi ya vururu.

³² Nguo îo ndaca îthagîrwe îrî na îrima rîa gûtonyia kîongo. Kûthiûrûrûkîria îrima rîa kîongo îtumîrîrwe muno wa kûrigîrîria ndîgatembûke.

³³ Munorî wa ngurumo wa nguo îo îkaagemua na mbica cia ngûngûmanga itumîtwe na ndigi cia rangi wa vururu, njambarawe, na cia rangi ndune.

³⁴ Wa gatagatî ka ngûngûmanga igîrî ûgeekîra ngengere ya thaavu.

³⁵ Vîndî îrîa Aroni agûtungata ageekagîra nguo îo ndaca. Vîndî îrîa akûthiî vandû varîa vatheru mbere ya Ngai-Mûnene, na rîrîa akuuma vo mûgambo wa ngengere ûkegucagwa nîguo ndagakue.

³⁶ “Ûkaarûtha kavengere ka thaavu ntheri na kandîkwe, ‘Yamûrîrîtwe Ngai-Mûnene’.

³⁷ Ûkooverera kavengere kau mwena wa mbere wa kîremba na kamûkumbû ka rangi wa vururu.

³⁸ Aroni agagekagîra kîthithirî gîake vîndî cionthe, nîguo nie, Ngai-Mûnene mbîtîkagîre matega marîa andû a Isiraeli makandutagîra wana ethîrwa mekîte mavîtia vîndî îrîa makûndutîra matega.

³⁹ “Ûgaatumîra Aroni nguo ndaca ya gîtambaa Kîamro Kîam rangi îno njerû, na ûmûtumîre kîremba na mûcivi ûgemetue waro.

⁴⁰ “Ûgaatumîra avîcî a Aroni nguo mbaro ndaca, mîcivi, na iremba. Nacio nîigaatûma monekane marî athaka na marî na riiri.

⁴¹ Ûgeekîra mûrwanyûkwe Aroni na avîcî ake nguo icio. Ûcoke ûmetîrîrie maguta na ûmamûre nîguo mandungatagîre marî athînjîri-Ngai.

⁴² Ûmatumîre thuruvarî cia gîtambaa Kîamro. Thuruvarî icio ciîthîrwe ciumîte kîûnûrî nginya cierorî nîguo matigekare marî njaga.

⁴³ Aroni na avîcî nwanginya mekagîre nguo icio vîndî cionthe rîrîa magûtonya îgemarî rîa Ngai-Mûnene, kana rîrîa magûkuvîvîria metha ya kîgongoona gûtungata vandû varîa vatheru nîguo matigaakue. Ûyû nîûtuîka watho kûrî Aroni na njiarwa ciake irîa igaaûka vuva wake.