Ntha 25 - ÎVUKU RÎA ÛVORO MWARO

Matega ma Îgema rîtheru

¹ Ngai-Mûnene nîwerire Musa atîrî,

² “Îra andû a Isiraeli mandutîre matega. Amûkîra matega wa monthe marîa mûndû akwîgua na ngoro yake akîenda kûndutîra.

³ Namo matega marîa ûkamûkîra kuuma kûrî o nî: thaavu, sîlûva, na gîcango.

⁴ Cuka mwaro wa bamba, na ndigi cia rangi wa vururu, na njambarawe, na cia rangi ndune. Na nguo itumîtwe na guoya wa mbûri,

⁵ na njûo cia ng'ondu ivakîtwe rangi ndune, na njûo irîa mbaro, na mîtî ya mîgaa.

⁶ Na mandutîre maguta ma gwakia taa, na mînyamû mînungi waro ya gwîkîrwa magutarî ma kwamûrana na ma gwîkîrwa ûbanirî,

⁷ tûthiga twa goro twa rangi ndune, na tûthiga twa goro twa kûmundîrîrwa efodirî ya Mûthînjîri-Ngai Mûnene na nguorî yake ya kîthûri.

⁸ Andû nwanginya mandumîre îgema îtheru rîa gwîkaraga nîguo ndûûrage gatagatîrî kao.

⁹ Ûrîtume wa vamwe na indo cia gwîkîrwa kuo kûringana na ûrîa ngûkwonia.

Îthandûkû rîa Kîrîkanîro

¹⁰ “Tuma îthandûkû rîa mîtî ya mîgaa, rîa ûraca wa cendimita îgana rîa îkûmi (110), na wariî wa cendimita mîrongo îtandatû na ithathatû (66), na ûraca na îgûrû wîganene na wariî.

¹¹ Na ûrîvake thaavu ntheri, nja na ndaarî na ûrîthiûrûrûkîrie mîena yonthe na mûcivi wa thaavu.

¹² Rîtumîre icûvî inya cia thaavu cia kûrîkuua, na ûciîkîre magûrûrî mana ma rîo, igîrî mwena ûmwe na igîrî mwena ûcio wîngî.

¹³ Varîria mîtî ya mîgaa ya kûrîkuua na ûmîvake thaavu.

¹⁴ Tonyia mîtî îo icûvîrî îrîa îrî mîenarî ya îthandûkû rîu.

¹⁵ Mîtî îo îtigwe icûvîrî cia îthandûkû rîa kîrîkanîro na ndîkarutwe.

¹⁶ Nacio ivengere cia mathiga igîrî irîa ngûkûnengera ciandîkîtwe mawatho cigwe îthandûkûrî ndaarî.

¹⁷ “Tuma gîkunîko Kîam thaavu ntheri na kîthîrwe kîrî Kîam ûraca wa cendimita îgana rîa îkûmi (110) na wariî wa cendimita mîrongo îtandatû na ithathatû (66).

¹⁸ Tura akerubi aîrî a thaavu.

¹⁹ Wa kerubi ethîrwe arî mwena ûmwe wa gîkunîko na marûthwe manyitanîte na gîkunîko.

²⁰ Akerubi acio methîrwe maroranîtie o ene. Namo mathagu mao methîrwe mambararîte na magakunîkîra gîkunîko Kîam îthandûkû.

²¹ Ivengere irîa igîrî cia mathiga ciîkîre îthandûkûrî na ûcoke ûkunîke îthandûkû.

²² Vau nîvo ngaatûngana nawe. Na îgûrû rîa gîkunîko Kîam îthandûkû, gatagatî ka akerubi acio aîrî marî îgûrû gîkunîkorî Kîam îthandûkû, nîvo ngaakwarîria ngûnengere maathani ma andû a Isiraeli.

Metha ya mîgate îrîa mîamûre

²³ “Tuma metha ya mîtî ya mûgaa ya ûraca wa cendimita mîrongo înana na inyanya (88) na wariî wa cendimita mîrongo îna na inya (44) na ûraca na îgûrû wa cendimita mîrongo îtandatû na ithathatû (66).

²⁴ Mîvake thaavu ntheri îgûrû na ûmîrigicîrie mîena na kamûcivi ka thaavu.

²⁵ Rûtha karûvaû ka wariî ta wa rûvî kamîrigicîrie mîena yonthe. Ûcoke wîkîre karûvaû kau kamûcivi ka thaavu.

²⁶ Rûtha icûvi inya cia thaavu. Ûcoke wîkîre icûvî icio mîenarî îna magûrûrî ma metha îo.

²⁷ Icûvî icio inya ciîthîrwe irî vakuvî na karûvaû karîa karî na wariî ta wa rûvî, na ituîke cia gûtonyagua mîtî ya gûkuuaga metha.

²⁸ Rûtha mîtî ya mûgaa na ûmîvake thaavu. Mîtî îo nîyo îgaatûmagîrwa gûkuua metha îo.

²⁹ Ûcoke ûrûthe thaani, na mbakûri cia gwîkîrwa ûbani, na ûrûthe mbakûri na njagi cia gwîkîra ndivei vîndî ya matega ma ndivei. Indo icio cionthe irûthwe na thaavu ntheri.

³⁰ Nayo metha igwe mbere ya îthandûkû rîa kîrîkanîro. Na îgûrû rîayo vethagîrwe vîndî cionthe varî na mûgate ûrîa nyamûrîrîtwe.”

Vandû va kwigîrîrwa taa

³¹ Ngai-Mûnene nîwacokire akîra Musa atîrî, “Rûtha vandû va kwigîrîrwa taa na ûvarûthe na thaavu ntheri. Gîtina Kîam vandû vau va kwigîrîrwa taa na gîtugî gîa kûvanyitîrîra ciîthîrwe irî cia gûturwa na thaavu. Maûa marîa magemetie vandû vau va kwigîrîrwa taa methîrwe manyitanîte vamwe na tûmîrûri na makoni.

³² Nîkûgîe na mvûa ithathatû ciumîte vandû va kwigîrîrwa taa. Mvûa ithatû ciume mwena ûmwe wa vandû vau na ithatû ciume mwena ûcio wîngî.

³³ Wa rûvûa nîrûgîe na ikombe ithatû irûthîtwe ta maûa ma mûtî wa mûrothi, na rîthîrwe rîrî na îkoni rîa îûa na kamûrûri.

³⁴ Gîtugî Kîam vandû vau va kwigîrîrwa taa nî gîkîrwe maûa mana ma kûgemia na methîrwe mekariî ta maûa ma mûrothi marî na makoni mamo na mîrûri.

³⁵ Mvûarî irîa ciumîte vandû vau va kwigîrîrwa taa vagîe na îkoni rîmwe rînyitithanîtie mvûa igîrî igîrî.

³⁶ Makoni, mvûa, na vandû vau va kwigîrîrwa taa ciîthîrwe iturîtwe na thaavu ntheri.

³⁷ Na ûcoke ûrûthîre vandû vau taa mûgwanja cia kwigîrîrwa îgûrû rîa vo. Taa icio ûcigîrîre îgûrû rîa vandû vau nîguo ûtheri wa cio ware vau mbere ya vo.

³⁸ Nacio icûvî cia kûnyitîrîra ndambi na rûgîo rwa ndambi irûthwe na thaavu ntheri.

³⁹ Vandû vau va kwigîrîrwa taa na indo icio cionthe cia vo irûthwe na thaavu ntheri. Naguo ûrito wa thaavu îo yonthe wîthîrwe nî wa kilo mîrongo îthatû na ithano (35).

⁴⁰ Menyerera ûrûthe indo icio cionthe kûringana na ûrîa naakwonirie ciîkariî rîrîa warî kîrîmarî.”