Ntha 24 - ÎVUKU RÎA ÛVORO MWARO

Kîrîkanîro nîgîetîkanîrue

¹ Ngai-Mûnene nîwacokire akîra Musa atîrî, “Unûkia ûke kîrîmarî varî nie, we na Aroni na Nadabu na Abihu, na atongoria mîrongo mûgwanja a Isiraeli. Na mûrî wa varaca mwînamîrîre na mûngooce.

² We Musa ûrî wenga nîwe ûgaaûka vakuvî nanie, nwatî andû acio engî matikaunûkie kîrîmarî.”

³ Musa nîwacokire akînyûrûrûka na akîthiî akîra andû maûndû monthe marîa Ngai-Mûnene aamwîrire na maathani monthe. Nao andû onthe nîmaacokirie marî vamwe atîrî, “Nîtûgeka ûrîa wonthe Ngai-Mûnene augîte.”

⁴ Nake Musa nîwandîkire maûndû monthe marîa Ngai-Mûnene aamwathîte. Mûthenya ûcio wîngî kîraûko tene Musa nîwaramûkire na agîtuma metha ya kîgongoona nthî ya kîrîma na akînjîra itugî îkûmi na igîrî kûringana na mîvîrîga îrîa îkûmi na îîrî ya andû a Isiraeli.

⁵ Musa nîwacokire agîtûma anake a Isiraeli, na makîrutîra Ngai-Mûnene matega ma kûvîvua na ng'ombe îmwe nîûndû wa magongoona ma thayû.

⁶ Musa nîwocire nuthu ya nthakame ya nyamû icio na akîmîkîra mbakûrirî, nayo nuthu îo îngî akîminjaminja metharî ya kîgongoona.

⁷ Nîwacokire agîoca îvuku rîa kîrîkanîro, na akîthomera andû onthe augîrîrîtie. Nao nîmaaugire atîrî, “Nîtûgwîka ûrîa wonthe Ngai-Mûnene augîte na tûmwathîkîre.”

⁸ Musa nîwocire nthakame îrîa yarî mbakûrirî na akîmîminjîria andû na akiuga atîrî, “Îno nîyo nthakame ya kîrîkanîro kîrîa Ngai-Mûnene aarîkanîre namue kîgiî maûndû mama monthe.”

⁹ Nao Musa, Aroni, Nadabu, Abihu, na atongoria mîrongo mûgwanja a Isiraeli nîmaaunûkirie kîrîmarî

¹⁰ na nîmoonire Ngai wa Isiraeli. Varîa aakinyîte vekariî ta vaarûthîtwe na mathiga ma goro ma rangi wa vururu ta wa matu.

¹¹ Nao atongoria acio a Isiraeli nîmoonire Ngai na ndaameka ûndû mûcûku. Nîmaarîre na makînyua marî vamwe.

Musa arî Kîrîmarî gîa Sinai

¹² Ngai-Mûnene nîwerire Musa atîrî, “Unûkia ûke kîrîmarî varî nie na weterere vo. Nanie ngaakûnengera ivengere igîrî cia mathiga ciandîkîtwe mawatho na maathani ma gûtaara andû.”

¹³ Kwoguo Musa na Joshua ûrîa wamûtethagîrîria nîmeevarîrie, na Musa akiunûkia kîrîmarî kîu kîtheru.

¹⁴ Musa nîwerire atongoria a Isiraeli atîrî, “Etererani ava nginya rîrîa tûgaacoka kûrî mue rîngî. Aroni na Huri mûrî nao. Kûngîgîa na ngarari gatagatîrî kenyu thiîni kûrî o.”

¹⁵ Nake Musa nîwaunûkirie kîrîmarî gîa Sinai na îtu rîgîgîkunîkîra.

¹⁶ Naguo riiri wa Ngai-Mûnene nîwanyûrûrûkire ûgîûka kîrîmarî kîu. Narîo îtu nîrîekarire rîkunîkîrîte kîrîma mîthenya îtandatû. Na mûthenya wa mûgwanja Ngai-Mûnene arî îtuurî rîu nîwetire Musa.

¹⁷ Naguo riiri wa Ngai-Mûnene wonagwa nî andû a Isiraeli wîkariî ta mwaki wakanîte ûrî gacûmbîrî ga kîrîma.

¹⁸ Musa nîwaunûkirie kîrîmarî na agîtonya ndaarî ya îtu, na agîkara kuo mîthenya mîrongo îna ûtukû na mûthenya.