Ntha 23 - ÎVUKU RÎA ÛVORO MWARO

Mawatho megiî Kîvooto

¹ “Ndûkanatambie ndeto itarî cia ma, na ndûkanavecane wira wa maveeni nîguo ûtethie mûndû mwaganu.

² Ndûkanarûmîrîre mwîngî gwîka maûndû mûcûku, kana ûtongorue nî mwîngî rîrîa ûkûruta ûira wa maveeni îgootirî.

³ Ndûkonanie mûthutûkanio ciirarî wa mûthîni.

⁴ “Ûngîona ndegwa kana mvunda ya nthû yaku yûrîte, mûcokerie.

⁵ Ûngîona mvunda ya nthû yaku îgwîte nîûndû wa kûremererwa nî mûrigo, mûtethie kûmîûkîria; tiga kûmûvîtûka wa ûguo.

⁶ “Ndûkarege kûrûmîrîra kîvooto rîrîa mûthîni agûcirithua.

⁷ Ndûkanarie ûira wa maveeni ciirarî, na ndûkanaûragithie mûndû ûtarî na mavîtia, nîûndû nîngaatuîra mûndû wa wonthe wîkaga waganu ta ûcio.

⁸ Ndûkamûkîre îvaki, nîûndû îvaki nîrîvingaga acirithania metho na makarega kwona kîvooto na rîgacûkia ciira wa arîa matevîtie.

⁹ “Ndûkanavinyîrîrie mûndû mûgeni. Mue nîmwicî ûrîa mûndû mûgeni egucaga nîûndû mwarî ageni vûrûrirî wa Misiri.

Mawatho megiî Mwaka wa mûgwanja na thavatû

¹⁰ “Vandaga mûgûnda waku na ûgaketha maciaro ma guo îvinda rîa mîaka îtandatû.

¹¹ Nwatî mwaka wa mûgwanja rekaga ûvurûke. Kîndû kîrîa kîonthe kîngîkûra kuo ndûgakethe nîguo andû enyu arîa athîni moonage gîa kûrîa. Nakîo kîrîa matigaria nyamû cia kîthaka ikarîcaga. Mûgekaga wa ûguo mîgûndarî yenyu ya mîthavibu na ya mîtamaiyû îrîa îciaraga matunda.

¹² “Rutaga wîra waku mîthenya îtandatû, nwatî mûthenya wa mûgwanja vurûkaga, nîguo ngombo ciaku, na ageni arîa makûrutagîra wîra mavurûkage, wana ndegwa na mvunda ciaku ivurûkage.

¹³ “Rûmagîrîra maûndû marîa monthe nie Ngai-Mûnene nakwîra. Ndûkavoe ngai ciîngî kana ûgwete marîîtwa ma cio na kanyua gaku.

Irugo ithatû irîa nene

¹⁴ “Kûngûagîrani irugo ithatû wa mwaka nîguo mûmvecage gîtîîo.

¹⁵ Vîndî ya mweri wa Abibu, mweri ûrîa mwaumire Misiri, mûgaakenagîrîra kîrugo Kîam mîgate îtarî mîkîre ndawa ya kwimbia wata ûrîa namwathire. Îvinda rîa mîthenya mûgwanja mûkarîcaga mîgate îtarî mîkîre ndawa ya kwimbia vîndî ya kîrugo gîkî. Mûndû wana ûrîkû ndagaûke kûngooca atarî na kîndû gîa kûndutîra.

¹⁶ “Kûngûagîrani kîrugo Kîam maketha menyu ma mbere ma indo irîa mûvandîte kwenyu mîgûndarî. “Kûngûagîrani kîrugo Kîam ithûnû wa mwaka ûkîthiî kûthira vîndî îrîa mwaketha maciaro kuuma mîgûndarî yenyu ya mîtunda.

¹⁷ Arûme onthe nwanginya maûkage kûngooca maita mathatû mwaka wa mwaka nie, Ngai-Mûnene wenyu Ngai wenyu.

¹⁸ “Mûtikandutîre matega ma mîgate mîkîre ndawa ya kwimbia rîrîa mûkûndutîra îgongoona rîa nyamû. Maguta ma nyamû irîa ndutîrîtwe îgongoona matikaarare nginya kîraûko Kîam mûthenya ûcio wîngî.

¹⁹ “Retageni nyombarî ya Ngai-Mûnene, Ngai wenyu maketha marîa maro ma mbere ma irio cia mîgûnda yenyu. “Ndûkaruge koori ka mbûri kana ka ng'ondu na îriia rîa ng'ina.

Ciîranîro na mataaro

²⁰ “Atîrî, nîngûtûma mûraika athiî mbere yenyu, amûgitagîre rûgendorî na amûkinyie kûrîa nîmûvarîrîtie.

²¹ Mûthikagîrîrieni na mûmwathîkagîre na mûtikamûkararie. Mwaregana nake ndakaamûrekera nîûndû nînie nîmûtûmîte.

²² Nwatî mûngîmwathîkîra na mwîkage maûndû monthe marîa ngûmwatha ngaarûaga na nthû cienyu cionthe.

²³ Mûraika wakwa nîakaamûtongoria amûkinyie mavûrûrirî ma Amori, Ahiti, Aperizi, Akanaani, Ahivi, na Ajebusi nanie nîngaamathiria.

²⁴ Na mwakinya kuo mûtikanavoe ngai ciao kana mûigooce, na mûtikarûmîrîre mîtugo ya ndini ciao. Nîmûgaacûkangia ngai icio ciao na munange itugî ciao cia mathiga varîa magoocagîra.

²⁵ Ethîrwa nîmûkaangooca nie Ngai-Mûnene, Ngai wenyu, nîngaamûrathima na irio na manjî, na nîmûthengutîria mîrimû gatagatîrî kenyu.

²⁶ Vûrûrirî wenyu gûtirî mûndûmûka ûkaavuna kana athate. Nîngaatûma mûtûûre mîaka mîngî.

²⁷ “Nîngaatûma andû arîa makaareganaga namue megue guoya nîûndû wakwa. Nao andû arîa mûkethagîrwa mûkîrûa nao nîngaatûma magîe na kîvîngîcî na ndûme mamûvuvatîre maûre nîmue.

²⁸ Nîngaatûma nthû cienyu igwatwe nî guoya, na mîngate Ahivi, Akanaani, na Ahiti maume mbere yenyu.

²⁹ Ndikaamengata maume kûrî mue mwakarî ûmwe, nîûndû nîngîka ûguo vûrûri ûcio nîûgatigwa ûrî mûtheri nacio nyamû cia kîthaka ciîngîve kûrî mue.

³⁰ Vandû va ûguo nîngaamengata vanini wa vanini, nginya rîrîa mûkeengîva mwîgwatîre vûrûri ûcio.

³¹ Nîngekîra mîvaka ya vûrûri wenyu kuuma îriarî rîrîa Îtune nginyagia îria rîa Mediterania, na kuuma werûrî nginyagia rûnjîrî rwa Farati. Nîngaatûma mûvoote andû arîa matûûraga vûrûrirî ûcio, na nîmûkaamengata maume kuo.

³² Mûtikaarûthe kîrîkanîro wana kîrîkû na andû acio kana na ngai ciao.

³³ Mûtikanareke andû acio matûûre vûrûrirî wenyu, nîguo matigatûme mwîvie. Mûngîkaagooca ngai ciao, ûcio ûkethîrwa ûrî mûtego mûcûku mûno varî mue.”