Ntha 21 - ÎVUKU RÎA ÛVORO MWARO

Ûrîa ngombo ciagîrîrwe nî gwîkwa

¹ “Mama nîmo mawatho marîa ûkûva andû a Isiraeli:

² Ûngîgûra ngombo ya Mûhibirania, ke nîakaagûtungatîra îvinda rîa mîaka îtandatû. Nwatî mwaka wa mûgwanja îrekererue îthiî îtakûrîva kîndû.

³ Ethîrwa ngombo ndîavikanîtie vîndî îrîa yatuîkire ngombo yaku, ndîagîrîrwe nî kûthiî na mûka îkiuma gwaku. Nwatî ethîrwa îgîtuîka ngombo yaku nîyavikanîtie, nwa îthiî na mûka.

⁴ Ethîrwa mwathi wa ngombo îo nwa amîve mûndûmûka nake mûndûmûka ûcio aciare anake kana erîtu, mûndûmûka ûcio wana ciana igaatuîka cia mwathi wa ngombo îo. Nayo ngombo nî îkaathiî îrî yonga.

⁵ Nwatî ngombo îo îngiuga atî nîyendete mwathi wayo na nîyendete mûka ûrîa yaverwe wana ciana na ndîkwenda kûrekererua,

⁶ mwathi wa ngombo îo nîakaamîvira varîa vagoocagîrwa Ngai. Mwathi wayo nîakamîîra îrûngame mûrangorî kana gîtugîrî Kîam mûrango na amîtûre îrima gûtû na mûkuva, nayo ngombo îo îgaatûûra îtungatagîra mwathi wayo.

⁷ “Ethîrwa mûndû nwa endie mwarî atuîke ngombo, mwîrîtu ûcio ndakaarekererua ta ûrîa ngombo ya mûndûmûrûme îrekagîrîrua.

⁸ Narîo ethîrwa yendetue kûrî mûndû arî na wendi wa kûmîvikia na arege gûkenua nîyo, mûndû ûcio nîagaacoka amîenderie îthe. Mwathi wa ngombo îo ndangîmîenderia mûndû wa kûndû kwîngî nîûndû nîaregete kûmîka waro.

⁹ Mûndûmûrûme angîgûra ngombo ya mûndûmûka nîguo amîvecane kûrî mûvîcî, mûndû ûcio agîrîrwe nî gwîka ngombo îo ta ûrîa angîka mwarî.

¹⁰ Mûndûmûrûme angîvikia mûka wa kaîrî, ndagîrîrwe nî kûnyivanyivîria ûrîa wa mbere irio ciake, kana nguo, kana arege kûmenyana nake kîîmwîrî ta ûrîa eekaga mbere.

¹¹ Angîrega kûvingîria mûka ûcio maûndû mau mathatû, mûka ûcio agîrîrwe nî kûrekererua athiî na ndakarîve kîndû.

Mawatho megiî ciîko cia waganu

¹² “Mûndû angîringa mûndû wîngî na amûrage, wanake nîkaûragwa.

¹³ Nwatî angîmûraga atakwenda, mûndû ûcio ûraganîte nwa athiî aûrîre kûndû kûrîa ngaamûthuurîra gûtarî na ûgwati.

¹⁴ Nwatî mûndû angîrakara na aûrage mûndû wîngî, ke nî akaaûragwa wana angîthîrwa nî aûrîte akathiî metharî yakwa ya kîgongoona nîguo ndakaûragwe.

¹⁵ “Mûndû angîringa îthe kana ng'ina nwanginya akaaûragwa.

¹⁶ “Mûndû ûrîa ûngîîa mûndû ûrîa wîngî nîguo akamwendie kana amûige arî ngombo, nwanginya akaaûragwa.

¹⁷ “Mûndû angîruma îthe kana ng'ina nwanginya akaaûragwa.

¹⁸ “Andû aîrî mangîrûa na ûmwe wao aringe ûcio wîngî na îthiga kana ngundi na mûndû ûcio waringwa arege gûkua nwatî amame ûrîrî,

¹⁹ mûndû ûcio ûraringîtwe angîcoka aûkîre na athiî na mûtiriî, mûndû ûcio ûramûringîte ndangîverithua nwatî nwanginya arîve mûndû ûcio athara ya mîthenya îo atete na amûtumbîrie nginya avone.

²⁰ “Mûndû angîringa ngombo yake ya mûndûmûrûme kana mûndûmûka na mûragi na îkue wa rîo, mûndû ûcio nwanginya akaaverithua.

²¹ Nwatî ngombo îrîa îringîtwe îngîkara mûthenya ûmwe kana îîrî na îcoke îkue, mwene yo ndangîverithua nîûndû nîaûrîtwe nî indo ciake.

²² “Arûme makîrûa mangîringa mûndûmûka arî îvu, îvu rîu riume, ethîrwa mûndûmûka ûcio ndaanagîa na mathîna mengî nî akaarîvwa nî mûndû ûcio wamûringire. Narîo îrîvi rîrîa akaaruta rîkethîrwa rîrî rîrîa mûthuuri wa mûndûmûka ûcio akaauga na rîtîkîrwe nî acirithania.

²³ Nwatî mûndûmûka ûcio angîthîrwa arî mûgurarie, mwoyo nîûrîvagwe na mwoyo,

²⁴ riitho rîrîvagwe na riitho, îgego rîrîvagwe na îgego. Njara nîîrîvagwe na njara, na kûgûrû kûrîvagwe na kûgûrû,

²⁵ îvîa rîrîvagwe na îvîa, kîronda kîrîvagwe na kîronda, na îtivia rîrîvagwe na îtivia.

²⁶ “Mûndû angîringa ngombo yake ya mûndûmûrûme kana mûndûmûka riitho na arîcûkie, nîakaarekereria ngombo îo îthiî. Rîu nîrîo rîgaatuîka îrîvi nîûndû wa riitho rîu.

²⁷ Narîo angîmîkûûra îgego, nîakaarekereria ngombo îo îthiî. Naguo ûguo ûtuîke îrîvi rîa îgego rîu.

Wîra wa ene indo

²⁸ “Ndegwa îngîkaamunda mûndûmûrûme kana mûndûmûka na mvîa na akue, ndegwa îo nîkaarivwa na mathiga îkue. Nacio nyama ciayo itikaarîwa, na mwene yo ndakaaverithua.

²⁹ Nwatî ethîrwa ndegwa îo nîkwa îrî na mûtugo wa kûmundaga andû na mvîa na mwene yo nîwakaanirue na akîrega kûmîthaîka na îcoke yûrage mûndûmûrûme kana mûndûmûka, nîkaarivwa na mathiga îkue. Na mwene yo wanake nîakaaûragwa.

³⁰ Nwatî mwene ndegwa angîtîkîrua arute îrîvi nîguo avonokie mwoyo wake, nwanginya akaaruta kîrîa kîonthe etîtue.

³¹ Watho ûyû nwaguo ûkarûmagîrîrwa ethîrwa ndegwa nwa îmunde kamwana kana kerîtu na mvîa îkaûrage.

³² Narîo ndegwa îngîkaamunda ngombo ya mûndûmûrûme kana ya mûndûmûka na mvîa na îmûrage, mwene ndegwa îo nwanginya akaarîva mwene ngombo sîlûva mîrongo îthatû. Na ndegwa îo nîgaacoka îrivwe na mathiga îkue.

³³ “Ethîrwa mûndû nwa akunûre îrima kana enje îrima na arîtige rîtarî îkunîke nayo ndegwa kana mvuda ya mûndû îgwe kuo,

³⁴ akaarîva mwene ndegwa kana mvunda mbeca na acoke oce nyamû îo nguû îtuîke yake.

³⁵ Ndegwa ya mûndû îngîkaaûraga ndegwa ya mûndû wîngî, ndegwa îo yûragîte îngî nîîkendua, na mwene yo magaane mbeca na mwene ndegwa îrîa yûragîtwe. Nayo îrîa yûragîtwe nîmakaamîthînja na magaane nyama ciayo ciîganene.

³⁶ Narîo kûngîmenyekana atî ndegwa ya mûndû ûcio îthîrîtwe îrî na mûtugo wa kûmundaga irîa ciîngî na mvîa igakua, nwatî mwene nîwaregire kûmîthaîka, mwene ndegwa îo nwanginya akaarîva ûcio ûragîrîtwe na ndegwa îngî îrî mwoyo na oce îo nguû îtuîke yake.