Ntha 20 - ÎVUKU RÎA ÛVORO MWARO

Maathani Îkûmi

¹ Ngai nîwaririe ciugo ino cionthe akiuga atîrî,

² “Nînie Ngai-Mûnene, Ngai waku ûrîa wakûrutire vûrûri wa Misiri kûrîa warî ûkomborî.

³ “Ndûkagooce ngai îngî tiga Nie.

⁴ “Ndûkanethondekere mûvuanano, kana mûvuanîre wa kîndû wa kîonthe kîrî îgûrû maturî, kana wa kîndû kîrî gûkû nthî, kana wa kîndû kîrî manjîrî marîa marî rungu rwa nthî.

⁵ Ndûkenamîrîre mûvuanano wa wonthe kana ûûtungatîre, nîûndû nie Ngai-Mûnene, Ngai waku nî Ngai ûrî wîru. Nîmverithagia ciana cia andû arîa mamenete nginya rûciaro rwao rwa kathatû na rwa kana.

⁶ Nîmonanagia wendo ûtathiraga kûrî andû ngiri nyîngî arîa mamendete na megucaga maathani makwa.

⁷ “Ndûkagwete rîîtwa rîa Ngai-Mûnene, Ngai waku na îtherû, nîûndû nie Ngai-Mûnene ndikaauga atî mûndû ndevîtie ûrîa ûngwetaga rîîtwa na îtherû.

⁸ “Menyagîrîra mûthenya wa thavatû na ûwamûrage.

⁹ Rutaga wîra mîthenya îtandatû na ûgeka maûndû maku monthe.

¹⁰ Nwatî mûthenya wa mûgwanja nî thavatû yakwa nie, Ngai-Mûnene, Ngai waku. Mûthenya ûcio we ndûkarute wîra wanarî ûrîkû, we mwene, kana mûvîcîguo, kana mwarîguo. Wana ndungata ya mûndû mûrûme kana ya mûndûmûka itikarute wîra, kana ndîthia yaku, kana mûgeni ûrîa ûrî gwaku mûciî.

¹¹ Nîûndû Nie Ngai-Mûnene naaûmbire îgûrû, nthî, na îria wana indo cionthe irîa irî kuo na mîthenya îtandatû, na mûthenya wa mûgwanja ngîvurûka. Kwoguo Nie Ngai-Mûnene nînaarathimire mûthenya wa thavatû na ngîûtua mûtheru.

¹² “Tîîa aguo na nyûkwe, nîguo ûtûûre mîaka mîîngî vûrûrirî ûrîa Ngai-Mûnene, Ngai waku agûkûva.

¹³ “Ndûkaûragane.

¹⁴ “Ndûgeke ûndû wa ûtharia.

¹⁵ “Ndûkaîe.

¹⁶ “Ndûkarie ûira wa maveeni îgûrû rîgiî mûndû ûrîa wîngî.

¹⁷ “Ndûkerirîrie nyomba ya mûndû wîngî, wana kana wîrirîrie mûka. Ndûkerirîrie ndungata ya mûndû wîngî, ya mûndûmûrûme kana ya mûndûmûka, kana ndegwa yake kana mvunda yake kana kîndû gîake kîonthe.”

Andû nîmegwire guoya

¹⁸ Vîndî îrîa andû meegwire ngwa, na makîona mveni, makîgua mûgambo wa karumbeta na makîona kîrîma gîgîtoga ndogo nîmaatetemire nî guoya. Nîmaarûngamire varaca

¹⁹ na makîra Musa atîrî “Aria natue na nîtûkwîgua, nwatî ndûkareke Ngai aria natue nîguo tûtigakue.”

²⁰ Nake Musa nîwerire andû a Isiraeli atîrî, “Tigani kwîgua guoya, nîûndû Ngai aûkîte kûmûgeria na atûme mûmwathîkagîre nîguo mûtikevie.”

²¹ Andû nîmaarûngamire varaca, nwatî Musa arî wenga nîwathiîre vakuvî na îtu înene varîa Ngai aarî.

Mawatho megiî metha ya kîgongoona

²² Ngai-Mûnene nîwathire Musa akeere andû a Isiraeli atîrî, “Mue ene nîmweîguîra ngîaria namue kuuma îgûrû.

²³ Mûtikanerûthîre ngai cia mîvuanano cia sîlûva, kana cia thaavu cia kûgoocanagîrua nanie.

²⁴ Ndumîrani metha ya kîgongoona na mûthetu. Na îgûrû rîayo mûrutîre matega ma kûvîvua na ma thayû, ma ng'ondu na ndegwa cienyu. Vandû vonthe varîa ngaamûra mûngoocagîre vo, nîngaaûkaga kûrî mue na nîmûrathime.

²⁵ Na mûngîndumîra metha ya kîgongoona ya mathiga, ndîgaatumwe na mathiga marî maumie. Nîûndû mwaumia mathiga na ngeca mûkaamagwatia mûgiro.

²⁶ Na mûtigaatume metha ya kîgongoona îrî na ngathî îthiîte kûrî yo. Ethîrwa nwa mwîke guo nîmûgaaturamîra metha ya kîgongoona.