Ntha 19 - ÎVUKU RÎA ÛVORO MWARO

Andû a Isiraeli marî Kîrîmarî gîa Sinai

¹ Mûthenya wa mbere wa mweri wa kathatû kuuma mauma Misiri andû a Isiraeli nîmaakinyire werûrî wa Sinai.

² Andû a Isiraeli nîmaaumire Refidimu magîkinya werûrî wa Sinai na makîamba magema mao vakuvî na kîrîma gîa Sinai.

³ Nake Musa nîwaunûkirie kîrîmarî gîa Sinai nîguo agatûngane na Ngai. Nake Ngai-Mûnene nîwetire Musa arî kîrîmarî na akîmwîra ere andû a Isiraeli, njiarwa cia Jakovu atîrî,

⁴ “Mue nîmwonire ûrîa nie Ngai-Mûnene nekire andû a Misiri na ngîmûkuua ta ûrîa nderi îkuuaga tûcui twayo na mathagu na ngîmûrete varî nie.

⁵ Kwoguo ethîrwa mûkaambathîkagîra na mwathîkagîre kîrîkanîro gîakwa nîmûgaatuîka andû akwa. Nthî yonthe nî yakwa, nwatî mue mûgaatuîka andû akwa arîa nthuurîte,

⁶ andû nyamûrîrîtwe na mûndungatagîre mûrî athînjîri-Ngai.”

⁷ Kwoguo Musa nîwanyûrûrûkire akîthiî agîîta atongoria a andû vamwe na akîmeera maûndû monthe marîa Ngai-Mûnene aamwathîte.

⁸ Nao andû onthe nîmaacokirie marî vamwe makiuga atîrî, “Tûgekaga maûndû monthe marîa Ngai-Mûnene augîte.” Nake Musa akîthiî akîra Ngai-Mûnene ûrîa andû maaugire.

⁹ Ngai-Mûnene nîwacokire akîra Musa atîrî, “Taroria! Nîngûka kûrî we nîrî îtuurî rînene mûno. Na vîndî îrîa ngakwarîria andû nîmakaaîgua ngîkwarîria nao nîmagaatûûra magwîtîkîtie nginya tene na tene.” Musa nîwerire Ngai-Mûnene rîngî ûrîa andû maaugîte,

¹⁰ nake Ngai-Mûnene akîmwîra atîrî, “Thiî kûrî andû na ûmeere metherie ûmûnthî na rûyû, na ûmeere atî nwanginya mathambie nguo ciao,

¹¹ na mevarîrie mbere ya mûthenya wa kathatû. Mûthenya ûcio wa kathatû nîngaanyûrûrûka nthiî kîrîmarî gîa Sinai îgûrû varîa nîngîonwa nî andû onthe.

¹² Nawe ûgeekîra mîvaka kûthiûrûrûkîria kîrîma nîguo andû matigakîre. Îra andû memenyerere gûtikagîe mûndû ûkunûkia kîrîmarî kana agîkuvîvîrie. Mûndû wa wonthe ûgaakuvîvîria kîrîma nîakaaûragwa.

¹³ Mûndû ûcio akaaûragwa na njîra ya kûrivwa na mathiga kana kûrathwa na mîguî na gûtirî mûndû ûkaamûnyita na njara. Wana ethîrwa nî andû kana nyamû nwanginya ikaaûragwa, nwatî vîndî îrîa karumbeta gakaavuvwa andû nîmakaaunûkia kîrîmarî.”

¹⁴ Kwoguo Musa nîwanyûrûrûkire kuuma kîrîmarî akîthiî kûrî andû, akîmera metherie na makîthambia nguo ciao.

¹⁵ Musa nîwamerire atîrî, “Îîvarîrieni mbere ya mûthenya wa kathatû na andû matikamenyane kîîmwîrî.”

¹⁶ Naguo mûthenya wa kathatû kîraûko nîkwagîre ngwa nyîngî na mveni. Na kîrîmarî gûkiumîra îtu înene na gûkîguwa mûgambo mûnene wa karumbeta. Nao andû onthe arîa marî kûrîa maambîte magema nîmaatetemire nî guoya.

¹⁷ Musa nîwatongoririe andû makiuma varîa maambîte magema makîthiî gûcemania na Ngai. Nao nîmaarûngamire nthî ya kîrîma.

¹⁸ Nakîo kîrîma kîonthe gîa Sinai nîgîakunîkîtwe nî ndogo nîûndû Ngai-Mûnene aanyûrûrûkîte arî mwakirî agîûka îgûrû rîa kîrîma. Nayo ndogo yaunûkagia ta ndogo ya îtogi rînene, na andû nîmaatetemaga nî guoya.

¹⁹ Naguo mûgambo wa karumbeta nîwathiîre na mbere wa ûkînenevaga. Musa nîwaririe, na Ngai akîmûcokeria na mûgambo ta wa ngwa.

²⁰ Ngai-Mûnene nîwanyûrûrûkire akîthiî kîrîmarî gîa Sinai îgûrû na agîîta Musa athiî vo. Musa nîwaunûkirie,

²¹ na Ngai-Mûnene akîmwîra atîrî, “Nyûrûrûka ûthiî ûgakaanie andû matigakîre mûvaka maûka kûnjûthîrîria, nîûndû mangîka ûguo eengî ao nîmagaakua.

²² Wana athînjîri-Ngai arîa maûkaga vakuvî nanie nwanginya metherie, na ethîrwa tîmeka guo nîngaamaverithia.”

²³ Musa nîwerire Ngai-Mûnene atîrî, “Andû matingîvota kunûkia gûkû kîrîmarî nîûndû nîwatwîrire tûtucage kîrîma gîkî gîa Sinai kîtheru na tûrûthe mûvaka ûkîthiûrûrûkîrîtie.”

²⁴ Ngai-Mûnene nîwacokerie Musa atîrî, “Nyûrûrûka ûthiî mûcoke mûke mûrî na Aroni. Nwatî athînjîri-Ngai na andû matiagîrîrwe nî kûvîtûka mûvaka maûkîte kûrî Nie. Mangîvîtûka mûvaka nîngaamaverithia.”

²⁵ Kwoguo Musa nîwanyûrûrûkire kûrî andû na akîmera ûrîa Ngai-Mûnene aaugîte.