Ntha 18 - ÎVUKU RÎA ÛVORO MWARO

Jethiro nîwacerere Musa

¹ Jethiro mûthînjîri-ngai wa Midiani aarî îthe wa mûka wa Musa. Ke nîwegwire ûrîa wonthe Ngai eekîte Musa na andû a Isiraeli rîrîa aamarutire vûrûri wa Misiri.

² Kavindarî kau mûka wa Musa eekaraga mûciî kwa îthe Jethiro. Kwoguo Jethiro nîwathiîre kûrî Musa kûmûvirîra mûka Zipora,

³ na tûmwanake twake twîrî, Gerishomu ûrîa mûkûrû na Eliezeri ûrîa warî wa kaîrî. (Musa aaugîte atî nîûndû aatûûraga vûrûrirî mûgeni ûcio wa mbere aamûtuîrîre rîîtwa Gerishomu.

⁴ Nîwacokete akiuga rîngî atîrî “Ngai wa vava nîwandethirie na akîmvonokia ndikaûragwe nî mûthamaki wa Misiri.” Kwoguo nîwagatuîrîte rîîtwa Eliezeri.)

⁵ Jethiro nîwathiîre werûrî arî na mûka wa Musa na anake a Musa aîrî kûrîa aambîte îgema kîrîmarî Kîam Ngai.

⁶ Jethiro nîwatûmanîte kûrî Musa athiî akeerwe atî nîmaûkîte marî na mûka wa Musa na ciana.

⁷ Kwoguo Musa nîwaumagarire akîthiî gûtûnga mûthoniwe, na matûngana akîmûmumunya. Oîrî wa mûndû nîwaûririe ûrîa wîngî ûvoro wa wagîrîru wake na magîcoka magîtonya îgemarî rîa Musa.

⁸ Musa nîwacokire akîîra Jethiro maûndû monthe marîa Ngai-Mûnene eekire mûthamaki wa Misiri na andû ake. Maûndû mau meekirwe nîguo Ngai-Mûnene avonokie andû a Isiraeli. Musa nîwerire mûthoniwe mathîna marîa moonire marî njîrarî na ûrîa Ngai-Mûnene aamavonoketie kuuma kûrî mathîna mau.

⁹ Vîndî îrîa Jethiro eegwire ûrîa Ngai-Mûnene eekîte maûndû maro kûrî andû a Isiraeli akîmavonokia kuuma kûrî andû a Misiri nîwakenire.

¹⁰ Nake nîwaugire atîrî, “Nîtûkumie Ngai-Mûnene ûcio wamûvonokirie kuuma kûrî mûthamaki wa Misiri na andû ake!

¹¹ Rîu nîmenyete atî Ngai-Mûnene nîke mûnene gûkîra ngai cionthe. Nîûndû nîwavonokirie andû ake kuuma kûrî andû aganu a Misiri.”

¹² Nake Jethiro, mûthoniwe wa Musa nîwarutire indo cia matega ma kûvîvua na magongoona mengî ma kûrutîra Ngai. Aroni na atongoria onthe a Isiraeli nîmaathiîre kûrîa irio vamwe na Jethiro marî mbere ya Ngai-Mûnene.

Gûtua andû atongoria

¹³ Mûthenya ûcio wîngî Musa nîwekarire nthî kûthikîrîria mateta ma andû na kûmatuithania. Wîra ûcio Musa aaûrutire kuuma kîraûko nginya kîvwaî.

¹⁴ Jethiro ûrîa mûthoniwe wa Musa, nîwonire maûndû marîa monthe Musa eekaga nîûndû wa andû, na akîra Musa atîrî, “Nî maûndû marîkû mama monthe ûrekîra andû? Maûndû mama monthe ûreka ûrî wenga nao andû matinde makûthiûrûrûkîrîtie kuuma kîraûko nginya kîvwaî nîkî?”

¹⁵ Musa nîwacokerie mûthoniwe atîrî, “Nwanginya mbîke ûguo nîûndû andû maûkaga kûrî nie nîguo mamenye wendi wa Ngai.

¹⁶ Vîndî îrîa andû aîrî mavîtanîtie maûkaga kûrî nie, nanie ngamatuithania gatagatî ka mûndû na ûrîa wîngî, na nîmamenyithagia Maathani na mawatho ma Ngai.”

¹⁷ Nake Jethiro nîwerire Musa atîrî, “Maûndû mama ndûrameka na njîra îrîa yagîrîrîte.

¹⁸ We nûkwinogia we mwene wana ûnogie andû aya, nîûndû ûyû nî ûndû mûrito mûno na ndûngîûvota ûrî wenga.

¹⁹ Rîu ka ngûtaare na Ngai ethîrwe arî vamwe nawe. Nîkwagîrîrîte ûtuîke mûtongoria wa andû aya na ûvirage mateta mao mbere ya Ngai.

²⁰ Mathomithagie maathani na mawatho ma Ngai na ûmataaragîrie ûrîa magîrîrwe nî gûtûûra wana gwîka.

²¹ Nwatî îgûrû rîa maûndû mau monthe thuura andû gatagatî ka andû aya onthe. Ûthuure arûme arîa marî na ûvoti, na metigîrîte Ngai, evokeku na andû mathûrîte mavaki. Andû acio matue atongoria a andû. Amwe matongoragie ikundi cia andû ngiri, engî magana, na engî ikundi cia andû mîrongo îtano na engî makûmi.

²² Nîmatuithanagie maciira vîndî cionthe. Maûndû marîa mavûthû nîmatucage ciira arî o. Nwatî nîmakûretagîre maûndû marîa manene. Kwoguo wetîkîra andû magûtethie ûkaavûthîrwa nî wîra.

²³ Ethîrwa ûgeka ûguo ta ûrîa Ngai athanîte, ûkavotaga kûmîrîria na andû menûkage makenete.”

²⁴ Kwoguo Musa nîwegwire mataaro ma mûthoniwe,

²⁵ na nîwathuurire andû maarî na ûvoti kuuma gatagatî ka andû onthe a Isiraeli. Ke nîwamatwire atongoria, mathage ikundi cia andû ngiri, îgana, mîrongo îtano na engî makûmi.

²⁶ Nao nîmaatucagîra andû mavinda monthe. Maciira monthe mavûthû o ene nîo maatucaga. Nwatî maciira marîa manene maatwaragîrwa Musa.

²⁷ Nake Musa nîwaugîre mûthoniwe ûvoro na Jethiro akînûka gwake mûciî.