Ntha 15 - ÎVUKU RÎA ÛVORO MWARO

Rwîmbo rwa Musa

¹ Musa na andû a Isiraeli nîmaainîre Ngai-Mûnene rwîmbo rûrû makiugaga atîrî, Nie nîngwinîra Ngai-Mûnene, nîûndû ke nî agîîte na ûvootani ûrî na riiri, nîwikîtie mbarathi na atwari a cio îriarî.

² Ngai-Mûnene nîke mûngitîri ûrîa ûrî vinya, nîke ûmvonoketie. Nîke Ngai wakwa, na ngaamûkumagia, Ngai wa vava, na ngaainaga ngîgwetaga ûnene wake.

³ Ngai-Mûnene nî njamba ya mbaara, rîîtwa rîake nî Ngai-Mûnene.

⁴ “Ke nîwaikirie athigari a mbaara a Misiri na ngari ciao cia mbarathi îriarî; anene arîa aro mûno a mbaara maaûrîîre manjîrî ma Îria Îtune.

⁵ Maakunîkîrwe nî manjî ma îria îriku, maavorokeere nginya gîtina Kîam îria ta îthiga.

⁶ Njara yaku ya ûrîo we Ngai-Mûnene îrî riiri na îrî vinya; njara yaku ya ûrîo we Ngai-Mûnene yunangaga nthû tûcunjî tûcunjî.

⁷ Nîûndû wa ûnene waku we nîûng'aûranagia nthû ciaku; marakara maku makanaga makamavîvia ta rûûa.

⁸ Na njîra ya mîvevû yaku manjî nîmeyûmbanîrîre makîrûngama ta rûthingo; kûrîa kûrikîru kwa îria gûgîtuîka kûndû kûnyaru.

⁹ Nthû yaugire atîrî, ‘Nie nîngûmarûmîrîria na nîmanyite, nîngûgaania ûtonga wao na nthiî na ûrîa wonthe ngwenda, nîngûcomora rûviû rwa njûra nîmathirie na njara yakwa.’

¹⁰ Nwatî rîrîa rûkûngi rwaku rwavurutanire we Ngai-Mûnene, andû a Misiri maakunîkirwe nî îria. Maaûrîre manjîrî meengî ta ûrîa cuuma yûragîra.

¹¹ Ngai-Mûnene, nî ngai îrîkû gatagatî ka ngai îkariî tawe? Nî ûrîkû wîkariî tawe, we ûrî ûthingu wa magegania? Nî ûrîkû ûngîringa ciama na ciîko cia vinya ta ciaku?

¹² We watambûrûkirie njara yaku ya ûrîo, nayo nthî îkîmerie nthû cietû.

¹³ Na ûndû wa wendo waku ûtathiraga, nîwatongoririe andû arîa we wakûûrîte; na njîra ya vinya waku nîwamonererie kûrîa we wamûrîte.

¹⁴ Ndûrîrî nîciîguîte, nacio nîcinainaga irî na guoya; Afilisiti nîmagwatîtwe nî kîmako kînene.

¹⁵ Atongoria a Edomu nî amaku; nao andû arîa marî vinya a Moabu nîmarainaina nîûndû wa guoya; andû a Kanaani nîmathirîtwe nî ûmîrîru.

¹⁶ Nîmaagwatirwe nî guoya na kîmako. O monaga vinya waku we Ngai-Mûnene, makarûngama makirîte ki nginya rîrîa andû aku makaavîtûka, andû arîa wavonokirie kuuma ûkomborî.

¹⁷ We nîûkaamarete na ûmavande kîrîmarî gîaku, vandû varîa we Ngai-Mûnene ûthuurîte vatuîke mûciî waku, hekarûrî îrîa we mwene ûtumîte.

¹⁸ We Ngai-Mûnene nîûtûûra ûrî mûthamaki tene na tene.”

Rwîmbo rwa Miriamu

¹⁹ Vîndî îrîa ngari cia mbarathi cia andû a Misiri, mbarathi ciacio na arîa maitwaraga ciakinyire îriarî, Ngai-Mûnene nîwatûmire manjî macokanîrîre magîkunîkîrwa nîmo. Nwatî andû a Isiraeli maavîtûkîrîre nthî nyûmû gatagatî ka îria.

²⁰ Nake mûndûmûka ûmwe mûrathi wetagwa Miriamu, na aarî mwarwang'ina na Aroni, nîwocire tamburini yake, nao aka acio engî nîmaamumire vuva na tamburini ciao makîinagia.

²¹ Nake Miriamu nîwamainîre atîrî: “Inîrani Ngai-Mûnene, nîûndû ke nîagîte na ûvootani ûrî na riiri. Ke nîaikîtie mbarathi na atwari a cio îriarî.”

Manjî marûrû

²² Musa nîwacokire agîtongoria andû a Isiraeli kuuma îria îtune makîthiî werûrî wa Shuru. Nao nîmaathiîre rûgendo rwa mîthenya îthatû marî werûrî na matakwona manjî.

²³ Nîmaacokire magîkinya vandû vetagwa Mara, nwatî manjî ma vau Mara matingîanyuîkire nîûndû maarî marûrû. Kîu nîkîo gîatûmire vandû vau vetwe Mara.

²⁴ Nao andû a Isiraeli nîmaatetirie Musa na makîmûria atîrî, “Nîtûnyua ndûî?”

²⁵ Nake Musa nîwavoire Ngai-Mûnene, na Ngai-Mûnene akîonia Musa mûtî akîmwîra awikie manjîrî. Namo manjî nîmaatuîkire maro ma kûnyua. Vau Mara nîvo Ngai-Mûnene aamaveerere mawatho ma kûrûmagîrîra na nwavo aamagererie.

²⁶ Nîwacokire akîmeera atîrî, “Nie nînie Ngai-Mûnene, Ngai wenyu na nînie nîmûvonagia. Ethîrwa mue mûkambathîkagîra na kinyi na mwîkage ûrîa kwagîrîrîte methorî makwa, nie ndikaamûtûmîra mîrimû ta îrîa naatûmîre andû a Misiri.”

²⁷ Vuvarî andû a Isiraeli nîmaakinyire vandû vetagwa Elimu. Vandû vau vaarî na ithima cia manjî îkûmi na mîtî ya mîkîndû mîrongo mûgwanja. Nao nîmaambire magema mao vau vakuvî na manjî.