Ntha 14 - ÎVUKU RÎA ÛVORO MWARO

Aisiraeli nîmaaringire Îria Îtune

¹ Ngai-Mûnene nîwacokire akîra Musa atîrî,

² “Îra andû a Isiraeli magarûrûke macoke vuva makambe magema mao mbere ya Pi Hahirothu gatagatî ka Migidoli na Îria Îtune vakuvî na Baali-zefoni.

³ Nîûndû mûthamaki wa Misiri ageciria atî andû a Isiraeli maraûrûra vûrûrirî mavingîrîrîtue nî werû.

⁴ Nie nîngaatûma ngoro yake yûme na nîakamûrûmîrîra. Naguo ûvootani wakwa varî mûthamaki wa Misiri na athigari ake a mbaara ûgatûma ngîa gîtîîo. Nao andû a Misiri nîmagaacoka mamenye atî Nie nînie Ngai-Mûnene.” Na andû a Isiraeli nîmeekire wata ûrîa meerirwe.

⁵ Rîrîa mûthamaki wa Misiri eerirwe atî andû a Isiraeli nîmaûrîte, ke vamwe na anene ake nîmeericûkirwe na makiuga atîrî, “Tweka atîa? Twareka andû a Isiraeli maûra na nîtwaûrwa nî ûtungata wao!”

⁶ Mûthamaki wa Misiri nîwavarîrie ngari yake ya mbarathi vamwe na mbûtû yake ya mbaara.

⁷ Nîwathiîre na ngari cia mbarathi irîa mbaro magana matandatû, wa vamwe na ngari icio ciîngî cia mbarathi cia Misiri na anene a cio.

⁸ Nake Ngai-Mûnene nîwatûmire ngoro ya mûthamaki wa Misiri yûma, na akîrûmîrîra andû a Isiraeli arîa maathiîre marî na ûmîrîru.

⁹ Na athigari onthe a mbaara a Misiri, na mbarathi cionthe, na ngari cia mbarathi, na atwari a cio nîmarûmîrîre andû a Isiraeli. Nao nîmaamethîre mambîte magema mao rûtererî rwa Îria Îtune vakuvî na Pi Hahirothu mbere ya Baali Zefoni.

¹⁰ Vîndî îrîa andû a Isiraeli moonire mûthamaki wa Misiri na mbûtû yake ya mbaara mathiîte kûrî o, nîmetigîre na makîrîrîra Ngai-Mûnene amatethie.

¹¹ Nao nîmeerire Musa atîrî, “Nîkwa gûtaarî mbîrîra kûu Misiri nîguo ûtûrute kuo tûke tûkuîre gûkû werûrî? Taroria ûrîa wîkîte nîûndû wa gûtûruta Misiri!

¹² Anga tûtiakwîrire mbere ya tuume kuo atî ûndû ûyû ûgekîka? Tue twakwîrire ûtigane natue tûthiî na mbere gûtuîka ngombo cia andû a Misiri. Kûngîrî waro tûgîtungata andû a Misiri tûrî ngombo gûkîra gûkuîra gûkû werûrî.”

¹³ Nake Musa nîwamacokerie atîrî, “Mûtigetigîre, mwîyûmîrîrie na nîmûkwona ûrîa Ngai-Mûnene agwîka nîguo amûvonokie ûmûnthî. Mue mûtigaacoka kwona andû aya a Misiri rîngî.

¹⁴ Ngai-Mûnene nîakûmûrûîrîra na gûtirî na vata wa mwîke ûndû wana ûrîkû.”

¹⁵ Nake Ngai-Mûnene nîwerire Musa atîrî, “Ûrangaîra ngûtethie nîkî? Îra andû a Isiraeli mathiî na mbere.

¹⁶ Ûkîrîria mûragi waku îgûrû na wambararie njara yaku îgûrû rîa îria. Manjî ma îria nîmakûgaûkana, na andû a Isiraeli nîmakûvota kûvîtûkîra nthî nyûmû.

¹⁷ Nanie nîngûmia ngoro cia andû a Misiri nîguo mamûrûmîrîrie, na nîngûgîa na gîtîîo nîûndû wa kûvoota mûthamaki wa Misiri, athigari a mbaara, ngari ciake cia mbarathi, na andû ake arîa mathiîcaga matwîte mbarathi.

¹⁸ Na vîndî îrîa ngaamavoota, andû a Misiri nîmakaamenya atî nie nînie Ngai-Mûnene.”

¹⁹ Nake mûraika wa Ngai, ûrîa watongoragîria athigari a mbaara a andû a Isiraeli nîwaumire mbere agîcoka vuva. Gîtugî Kîam îtu kîrîa Kîammatongoragia nakîo nîkîaumire mbere yao gîgîcoka vuva,

²⁰ gîkîrûngama gatagatî ka athigari a mbaara a Isiraeli na athigari a mbaara a andû a Misiri. Narîo îtu rîu nîrîatûmire kûgîe nduma kûrî andû a Misiri, nwatî nîrîavere andû a Isiraeli ûtheri. Kwoguo athigari a mbaara a Misiri matingîavotire gûkuvîvîria athigari a mbaara a Isiraeli ûtukû ûcio wonthe.

²¹ Musa nîwacokire akîambararia njara yake îgûrû rîa Îria. Nake Ngai-Mûnene nîwatûmire manjî ma îria macokue na vuva nî rûkûngi rûnene rûrîa rûvurutanaga rumîte mwena wa îrathîro. Naruo rûkûngi rûu rwavurutanire ûtukû wonthe na rûgîtûma îria rîtuîke nthî nyûmû. Manjî nîmaagaûkanire.

²² Nao andû a Isiraeli nîmaavîtûkîrîre nthî nyûmû îriarî, na manjî mavana ta nthingo igîrî, rûmwe mwena wao wa ûrîo na rûu rwîngî mwena wao wa ûmotho.

²³ Nao andû a Misiri nîmaamarûmîrîrie îriarî marî na mbarathi ciao cionthe, na ngari cia mbarathi cia mbaara na atwari a cio.

²⁴ Mbere ya kûthamburûkana Ngai-Mûnene nîwaroririe nthî kûrî athigari a mbaara a Misiri arî gîtugîrî Kîam mwaki na Kîam îtu, na agîtûma magwatwe nî guoya.

²⁵ Nîwatûmire magûrû ma ngari ciao cia mbarathi maremera, na kwoguo nîmaagîre na thîna wa kûthiî mbere. Nao andû a Misiri nîmaaugire atîrî, “Ngai-Mûnene ararûa natue akîrûîrîra andû a Isiraeli. Nîtûre tuume varî o!”

²⁶ Ngai-Mûnene nîwacokire akîra Musa atîrî, “Tambûrûkia njara yaku îgûrû rîa Îria, nîguo manjî macokanîrîre makunîkîre andû a Misiri, na ngari ciao cia mbarathi na atwari a cio.”

²⁷ Kwoguo Musa nîwatambûrûkirie njara yake îgûrû rîa Îria. Na gwakîa manjî magîcoka ûrîa meekariî mbere. Nao andû a Misiri nîmaageragia kûûra maume manjîrî, nwatî Ngai-Mûnene nîwamaikirie îriarî.

²⁸ Manjî nî maacokire magîkunîkîra ngari cia mbarathi, atwari a cio, na athigari a mbaara onthe arîa marûmîrîrîtie andû a Isiraeli îriarî. Gûtirî wana ûmwe watigarire.

²⁹ Nwatî andû a Isiraeli maavîtûkîrîre îriarî kûrî nthî nyûmû, na nthingo cia manjî irî mîena yoîrî.

³⁰ Mûthenya ûcio Ngai-Mûnene nîwavonokirie andû a Isiraeli kuuma kûrî andû a Misiri. Nao andû a Isiraeli nîmoonire andû a Misiri mamamîte rûtere rwa îria marî akuû.

³¹ Vîndî îrîa andû a Isiraeli moonire vinya mûnene ûrîa Ngai-Mûnene aavootire andû a Misiri naguo, nîmeetigîre Ngai-Mûnene, makîmwîtîkia na magîtîkia ndungata yake Musa.