Ntha 13 - ÎVUKU RÎA ÛVORO MWARO

Marikithathi nîmaamûrirwe

¹ Ngai-Mûnene nîwerire Musa atîrî,

² “Nyamûrîra marikithathi monthe ma arûme. Marithikithathi monthe ma arûme a Isiraeli nî akwa, na marikithathi monthe ma nyamû cia ûrîthi wenyu nî makwa.”

Kîrugo kîa mîgate îtarî mîkîre ndawa ya kwimbia

³ Nake Musa nîwerire andû a Isiraeli atîrî, “Ririkanagani mûthenya ûyû. Ûyû nî mûthenya ûrîa Ngai-Mûnene aamûrutire Misiri na njîra ya vinya wake kûrîa mwatûûraga mûrî ngombo. Mûthenya ûyû mûtikaarîe mîgate îkîrîtwe ndawa ya kwimbia.

⁴ Ûmûnthî mweri wa mbere ûrîa wîtagwa Abibu nîguo mûrauma Misiri.

⁵ Ngai-Mûnene nîwerîre methe menyu ma tene na akîîvîta atî nîakaamûva vûrûri wa Akanaani, na wa Ahiti na wa Amori, na wa Ahivi, na wa Ajebusi. Vûrûri ûcio wîcûrîte ûkî na îria. Mwakinya kuo, mweri wa mbere wa Abibu wa mwaka wa mwaka nwanginya mûgakûngûagîra kîrugo gîkî.

⁶ Mîthenya mûgwanja nîmûkaarîcaga mîgate îtarî mîkîre ndawa ya kwimbia. Naguo mûthenya wa mûgwanja nîguo mûkeethagîrwa na kîrugo gîa gûkumia Ngai-Mûnene.

⁷ Mîthenyarî îo mûgwanja mûkaarîcaga mîgate îtarî mîkîre ndawa ya kwimbia. Na kûrîa kuonthe mûkeethagîrwa mûrî gûtikaanoneke ndawa ya kwimbia mîgate vûrûrirî wenyu.

⁸ Na mûthenya ûcio nîmûkera ciana cienyu atî mûreka ûguo nîûndû wa ûrîa Ngai-Mûnene aamwîkire vîndî îrîa mwaumire Misiri.

⁹ Ûndû ûyû nûkeethagîrwa ûrî kîririkania ta kîndû kîovereretwe njararî cienyu kana mothiûrî menyu atî vîndî cionthe mûthomage watho wa Ngai-Mûnene. Nîûndû Ngai-Mûnene aamûrutire Misiri na vinya wake mûnene.

¹⁰ Kwoguo kûngûagîrani kîrugo gîkî rîrîa îvinda rîrîa rîakîo rîakinya mwaka wa mwaka.

Marikithathi

¹¹ “Ngai-Mûnene nîakaamûkinyia vûrûri wa Kanaani ûrîa aamwîrîîre mue wana methe menyu ma tene atî nî akaamûva, mwakinya kuo,

¹² mûkaamwamûrîra marikithathi monthe. Marikithathi monthe ma ûrîthi wenyu, nî ma Ngai-Mûnene.

¹³ Marikithathi ma mvunda nîmûkaamakûûra na tûtûrûme. Nwatî ethîrwa mûtikwenda kûmakûûra mûkaamaunangaga ngingo. Marikithathi monthe ma anake enyu nwanginya mûkaamakûûra.

¹⁴ Ethîrwa kavinda nîgagaakinya anake enyu mamûrie ûndû ûyû mûreka wa gûkûngûîra ugîte atîa, nîmûkaamera atî, ‘Ngai-Mûnene nîwatûmîre vinya wake mûnene agîtûruta Misiri kûrîa twatûûraga tûrî ngombo.

¹⁵ Nîûndû vîndî îrîa mûthamaki wa Misiri aaûmirie ngoro na akîrega gûtûrekereria tûthiî, Ngai-Mûnene nîwaûragire marikithathi monthe ma Misiri, ma andû wana ma nyamû. Kîu nîkîo gîtûmaga tûrutîra Ngai-Mûnene magongoona ma marikithathi monthe ma nyamû nwatî tûgakûûra ma anake etû.

¹⁶ Ûndû ûyû ûkethagîrwa wîkariî ta kîndû kîovereretwe njara kana rûûri rwîkîrîtwe mothiûrî metû wa gûtûririkania atî Ngai-Mûnene aatûrutire vûrûri wa Misiri na njîra ya vinya wake mûnene.’ ”

Gîtugî gîa îtu na gîtugî kîa mwaki

¹⁷ Vîndî îrîa mûthamaki wa Misiri etîkîîre andû a Isiraeli mathiî, Ngai ndaamatongoria kûvîtûkîra vûrûrirî wa Afilisiti wana gwatuîka njîra îo nîyo yarî nguvî. Ngai aaugire atîrî, “Ndikwenda andû aya magarûrûka mecirie gûcoka Misiri matûngana na mbaara.”

¹⁸ Vandû va ûguo Ngai aamatongoririe na njîra îrîa îthiûrûrûkîte werû îthiîte îriarî îtune. Nao andû a Isiraeli maaumire vûrûri wa Misiri mevarîrîtie na indo cia mbaara.

¹⁹ Musa nîwakuire mavîndî ma Josefu, nîûndû Josefu nîwevîtithîtie andû a Isiraeli akîmeera atîrî, “Rîrîa Ngai akaamûvonokia, mue nwanginya mûgaakua mavîndî makwa kuuma gûkû.”

²⁰ Nao andû a Isiraeli nîmaaumire Sukothu na makîthiî makîamba magema mao Ethamu rûtererî rwa werû.

²¹ Mavinda ma mûthenya Ngai-Mûnene aathiîcaga mbere yao amatongoreretie arî gîtugîrî Kîam îtu. Útukû aamatongoragia arî gîtugîrî Kîam mwaki wa kûmonia ûtheri nîguo mathiîcage ûtukû na mûthenya.

²² Gîtugî Kîam îtu kîethagîrwa kîrî mbere yao vîndî cionthe mûthenya, na Kîam mwaki kîethagîrwa kîrî mbere yao vîndî ya ûtukû.