Ntha 12 - ÎVUKU RÎA ÛVORO MWARO

Pasaka

¹ Ngai-Mûnene nîwarîrie Musa na Aroni marî Misiri na akîmeera atîrî,

² “Mweri ûyû nîguo ûgaatuîka mweri wa mbere wa mwaka wenyu.

³ Îra andû onthe a Isiraeli atîrî: ‘Mûthenya wa îkûmi wa mweri ûyû, wa mûndû ageecarîria gatûrûme kana kathenge kûringana na ûrîa mûciî wake wîgana.

⁴ Angîthîrwa mûciî wake nî mûnini mûno wa kûrîa ûkathiria gatûrûme karî konthe, nwa magwatanîre na mûciî ûcio wîngî mariganîtie naguo nîguo marîcanîre kagondu kau kûringana na mwîgana wa andû na kûringana na ûrîa mûndû angîvota kûrîa.

⁵ Mûndû nwanginya acarie kagondu kana kathenge karî na ûkûrû wa mwaka ûmwe na gatarî wonje kana maroro.

⁶ Naguo mûthenya wa îkûmi na kana wa mweri, nîrîo andû onthe a Isiraeli makaathînja tûtûrûme tûu kîvwaî.

⁷ Nao andû nîmagooca nthakame îmwe ya tûtûrûme mamîvake itugîrî cia mîrango na îgûrû rîa mîrango ya nyomba irîa tûtûrûme tûu tûkaarîrwa.

⁸ Ûtukû ûcio andû a Isiraeli makaarîa nyama cia tûtûrûme ivîvîtue, na irîcanîrue na manyenyi marûrû na mîgate îtarî mîkîre ndawa ya kwimbia.

⁹ Mûtikarîe nyama mbîthî kana itherûkîtue na manjî, nwatî tûtûrûme tûu tûkaarîwa tuonthe tûvîvîtue wana ciongo ciatuo, magûrû wa na nyama cia nda.

¹⁰ Na mûtikareke imwe itigara ikinyia kîraûko. Kîndû kîngîgaatigara na gîkinyie kîraûko gîkaavîvua.

¹¹ Mûkaairîa na îvenya na mwîkîrîte nguo ta andû mathiîte rûgendo. Mûkeethîrwa mwîkîrîte iratû magûrû na mûrî na mîragi yenyu njara. Gîkethîrwa kîrî kîrugo Kîam pasaka ya Ngai-Mûnene.

¹² “Ûtukû ûcio nie nîngaavîtûkîrîra vûrûri wa Misiri na mbûrage marikithathi monthe ma njamba, ma andû wana ma nyamû, na mverithie ngai cionthe cia Misiri. Nie nî nie Ngai-Mûnene.

¹³ Nthakame îrîa mûkaavaka itugîrî cia mîrango nîyo îkeethîrwa îrî rûûri rwa kwonania nyomba irîa mûtûûraga. Nona nthakame nîngaavîtûka mîciî yenyu na mûtikoona ûndû mûcûku ngîverithia andû a Misiri.

¹⁴ Ririkanagani mûthenya ûyû na mûgîcage na kîrugo gîa gûkûngûîra ûrîa, Nie Ngai-Mûnene nîmwîkîte. Nwanginya mûririkanage ûndû ûcio mîaka yonthe.”

Kîrugo kîa mîgate îrîa îtarî mîkîre ndawa ya kwimbia

¹⁵ Ngai-Mûnene nîwacokire akiuga atîrî, “Vandû va mîthenya mûgwanja mue nwanginya mûrîcage mîgate îtarî mîkîre ndawa ya kwimbia. Mûthenya wa mbere mûkaathengutia ndawa ya kwimbia mîgate kwenyu mîciî, nîûndû mîthenyarî îo mûgwanja mûndû wa wonthe angîrîa mîgate îrî mîkîre ndawa ya kwimbia, ndagaataranîrua na andû acio engî a Isiraeli.

¹⁶ Mûthenya wa mbere na wa mûgwanja nîmûgaacemanagia nîûndû wa kûgooca. Gûtirî wîra wagîrîrwe kûrutwa mîthenya îo, nwatî irio nwa irugwe mîthenya îo.

¹⁷ Kûngûagîrani kîrugo Kîam mîgate îtarî mîkîre ndawa ya kwimbia, nîûndû mûthenya ûyû nîguo naarutire mîvîrîga yenyu vûrûri wa Misiri. Kwoguo njiarwa cienyu igaakûngûagîra kîrugo gîkî mûthenyarî ûyû.

¹⁸ Mwerirî wa mbere, kwambîrîria kîvwaî Kîam mûthenya wa îkûmi na kana nginya kîvwaî Kîam mûthenya wa mîrongo îîrî na ûmwe wa mweri ûcio wa mbere, mûtikaarîcage mîgate îkîrîtwe ndawa ya kwimbia.

¹⁹ Mîthenyarî îo mûgwanja gûtiagîrîrwe nîkwîthîrwa kûrî na ndawa ya kwimbia mîgate nyombarî cienyu. Nîûndû mûndû wa wonthe ûkaarîa mîgate îkîrîtwe ndawa ya kwimbia wana ethîrwa nî mûgeni kana aciarîrîtwe vûrûrirî ûcio nî akaavinyûrua aume kûrî andû a Isiraeli.

²⁰ Mûtikarîe kîndû gîkîrîtwe ndawa ya kwimbia mûrî kûrîa kuonthe mûtûûraga. Mûkaarîcaga mîgate îtekîrîtwe ndawa ya kwimbia.”

Pasaka ya mbere

²¹ Musa nîwacokire agîta atongoria onthe a Isiraeli na akîmeera atîrî, “Îîthuurîreni tûgondu kûringana na mîciî yenyu, mûtûthînje nîguo mûkûngûîre pasaka.

²² Na mwoce hisofu yovetwe kîmanja na mûmîvutukie mbakûrirî îrîa îkîrîtwe nthakame ya tûtûrûme. Nthakame îo îvakwe itugîrî cia mîrango na mîkîgo îgûrû rîa mîrango ya nyomba cienyu. Mûndû wana ûrîkû ndakaume nyomba nginyagia rûyû kîraûko.

²³ Vîndî îrîa Ngai-Mûnene akaavîtûkîrîra vûrûrirî wa Misiri kûraga andû a kuo, nîakoona nthakame itugîrî cia mîrango yenyu. Nake nî akaagiria mûraika ûrîa ûkethîrwa akîûraga andû a Misiri atonya kwenyu nyomba amûûrage.

²⁴ Mue vamwe na ciana cienyu nwanginya mûkaarûmîrîra mawatho mama vîndî cionthe.

²⁵ Vîndî îrîa mûgaatonya vûrûri ûrîa Ngai-Mûnene amwîrîte atî nî akamûva, nwanginya mûkaathiî na mbere gûkûngûîra îgongoona rîîrî.

²⁶ Na vîndî îrîa ciana cienyu ikaamûria ‘Îgongoona rîrî nî rîakuga atîa?’,

²⁷ mue nîmûkaamera atîrî, ‘Nî îgongoona rîa pasaka rîa gûkumia Ngai-Mûnene, nîûndû nîwagararire nyomba cia andû a Isiraeli vûrûrirî wa Misiri. Vîndî îo Ngai-Mûnene nîwaûragire andû a Misiri, nwatî tue nîwatwîguîrîre ntha.’ ” Nao andû a Isiraeli nîmaaturirie ndu na makîgooca.

²⁸ Nao andû acio nîmaathiîre na magîka wata ûrîa Ngai-Mûnene aathîte Musa na Aroni.

Gûkua kwa marikithathi

²⁹ Ûtukû gatagatî Ngai-Mûnene nîwaûragire arûme onthe arîa maarî marikithathi ma andû a vûrûri wa Misiri. Maakuire mambîrîrîtue nî mûvîcî wa mûthamaki wa Misiri ûrîa warî agaatigîrwa ûthamaki nginya îrikithathi rîa andû arîa maarî ove njeera. Marikithathi ma nyamû wa namo nîmaaûragirwe.

³⁰ Ûtukû ûcio, mûthamaki wa Misiri, anene ake, na andû onthe a Misiri nîmaaramûkire. Na mîciî yonthe nîyecûrîtwe nî kîrîro nîûndû gûtirî mûciî wa naarî ûmwe gûtaarî gûkuû mwana wa mwanake.

³¹ Ûtukû wa ûcio mûthamaki wa Misiri nîwatûmanire Musa na Aroni metwe. Na rîrîa maaûkire nîwamerire atîrî, “Umani mûthiî, mue wana andû enyu a Isiraeli! Umani vûrûrirî wakwa, mûthiî mûkagooce Ngai-Mûnene ta ûrîa mwaûririe.

³² Ocani ng'ondu, mbûri na ng'ombe cienyu na mûthiî. Nanie mûmvoere kîrathimo.”

³³ Nao andû a Misiri nîmaathaithire andû a Isiraeli maume vûrûrirî wao na îvenya makîmeeraga atîrî, “Ethîrwa tîmûthiî tuonthe nîtûgûkua.”

³⁴ Kwoguo andû a Isiraeli nîmoocire mbakûri ciao na magîciîcûria mûtu ûkimîtwe ûtarî na ndawa ya kwimbia, magîciova na nguo na magîikuua na ciande.

³⁵ Andû a Isiraeli nîmeekîte ûrîa Musa aamerîte. O nîmaavoete indo cia thaavu, sîlûva na nguo kuuma kûrî andû a Misiri.

³⁶ Ngai-Mûnene nîwatûmîte andû a Isiraeli mendwe nî andû a Misiri, na andû a Misiri makîva andû a Isiraeli kîndû kîonthe kîrîa maamavoire. Ûguo nîguo andû a Isiraeli maakuire ûtonga wa andû a Misiri makiuma vûrûri ûcio.

Andû a Isiraeli nîmaaumire Misiri

³⁷ Andû a Isiraeli nîmaaumire Ramesesi na magûrû mathiîte Sukothu. Andû acio maarî ta arûme ngiri magana matandatû aka na ciana matarî atare.

³⁸ Na andû engî eengî nîmaathiîcanirie vamwe nao na mbûri ng'ondu, na ng'ombe.

³⁹ Maaumire Misiri na îvenya matarugîte mîgate. Nwatî nîmaakuire mûtu ûtarî mwîkîre ndawa ya kwimbia. Mûtu ûcio nîmaaûrugire mîgate.

⁴⁰ Andû a Isiraeli maatûûrîte Misiri mîaka magana mana na mîrongo îthatû.

⁴¹ Na mûthenya ûcio mîaka magana mana na mîrongo îthatû yakinyire andû a Isiraeli nîmaaumire vûrûri wa Misiri.

⁴² Ûtukû ûcio Ngai-Mûnene aararire arangîrîte andû a Isiraeli makiuma Misiri. Kwoguo mwaka wa mwaka andû a Isiraeli nîmamûrîte ûtukû ûcio nîûndû wa gûkumia Ngai-Mûnene. Na njiarwa cionthe cia andû a Isiraeli nîitûûra ciîkaga ûguo tene na tene.

Mawatho ma pasaka

⁴³ Ngai-Mûnene nîwerire Musa na Aroni atîrî, “Mama nîmo mawatho ma pasaka: Gûtirî mûgeni ûkaarîa irio cia pasaka,

⁴⁴ nwatî ngombo irîa mwîgûrîrîte nwa irîe mwamba kûiruithia.

⁴⁵ Gûtirî mûrarîrîri kana mûndû wa kûrîvwa wagîrîrwe nî kûrîa pasaka.

⁴⁶ Irio cionthe cia pasaka ciagîrîrwe nî kûrîrwa nyombarî irîa irugîrîtwe, itiagîrîrwe gûkuuwa irutwe nja ya nyomba. Mavîndî monthe ma nyamû irîa ithînjîtwe nîûndû wa pasaka matikaunangwe.

⁴⁷ Andû onthe a Isiraeli nwanginya makûngûîre kîrugo gîkî.

⁴⁸ Mûgeni ûrîa ûkethîrwa atûûrîte gatagatîrî kenyu na ende gûkûngûîra pasaka akumie Ngai-Mûnene, mue nîmûkaamba kûruithia arûme onthe a mûciî ûcio. Mûndû ûcio nîagaacoka atuwe ta mûndû ûciarîrîtwe kwa andû a Isiraeli na nwa mûkûngûîre pasaka mûrî vamwe nake.

⁴⁹ Mawatho mama makaarûmagîrîrwa nî mûndû ûrîa ûciarîrîtwe kwa andû a Isiraeli na mûgeni ûrîa ûtûûranîtie namue.”

⁵⁰ Na andû a Isiraeli nîmaathîkire na nîmeekire wata ûrîa Ngai-Mûnene aathîte Musa na Aroni.

⁵¹ Na mûthenya ûcio Ngai-Mûnene nîwarutire andû a mîvîrîga ya Isiraeli vûrûri wa Misiri.