Ntha 11 - ÎVUKU RÎA ÛVORO MWARO

Marikithathi ma Misiri nîmaaûragirwe

¹ Ngai-Mûnene nîwerire Musa atîrî, “Nie nîngûtûma îvera rîngî rîmwe kûrî mûthamaki wa Misiri na andû ake. Vuva wa ûguo nîakaamûrekereria mûthiî. Rîrîa akaamwîra mûthiî nî akaamûvinyûria muonthe muume kuo viû.

² Rîu arîria andû a Isiraeli onthe na ûmeere metie andû arîa mariganîtie nao indo cia thaavu na sîlûva.”

³ Nake Ngai-Mûnene agîtûma andû a Misiri mave andû a Isiraeli gîtîîo. Anene na andû onthe a Misiri nîmoonaga Musa arî mûndû mûnene.

⁴ Nake Musa nîwerire mûthamaki wa Misiri atîrî, “Ngai-Mûnene augîte atîrî, ‘Ûtukû gatagatî ngaavîtûkîrîra gatagatî ka vûrûri wa Misiri,

⁵ na marikithathi monthe ma arûme magaakua kwambîrîria mûvîcî wa mûthamaki ûrîa ûgaatigîrwa ûthamaki nginya mûvîcî wa ndungata îrîa îthîaga mûtu. Wana marikithathi ma ndîthia cia ng'ombe nî magaakua.

⁶ Nakuo Misiri kuonthe gûkethîrwa na kîrîro kînene mûno gîtarî kîeguîka na gîtakeguîka rîngî.

⁷ Nwatî gûtirî ngui îgaakûmîra andû a Isiraeli kana nyamû ciao. Namue nîmûkaamenya atî nie Ngai-Mûnene nîmbîkagîra ngûrani gatagatî ka andû a Misiri na andû a Isiraeli.’ ”

⁸ Musa aarîkîrîrie na kûmera atîrî, “Anene aku onthe nîmagaaûka kûrî nie na menamîrîre mbere yakwa. Nao nîmakaanthaitha mboce andû akwa onthe nthiî nao. Na vuva wa ûguo nie nîngaathiî.” Nake Musa ecûrîtwe nî marakara meengî, nîwaumire kwa mûthamaki wa Misiri na akîthiî.

⁹ Ngai-Mûnene nîwerire Musa atîrî, “Mûthamaki wa Misiri tîakûthikîrîria, nîguo nie nthiî na mbere kûringa ciama nyîngî Misiri.”

¹⁰ Musa na Aroni maaringire ciama ino cionthe mbere ya metho ma mûthamaki. Nwatî Ngai-Mûnene nîwatûmîte ngoro ya mûthamaki yûme nîguo ndakarekererie andû a Isiraeli maume vûrûrirî wake mathiî.