Ntha 1 - ÎVUKU RÎA ÛVORO MWARO

Andû a Isiraeli nîmaavinyîrîrue marî Misiri

¹ Anake a Jakovu arîa maathiîcanirie nake Misiri, marî wa mûndû na andû a mûciî wake, maarî:

² Reubeni, Simioni, Lawi, Juda,

³ Isakaru, Zebuluni, Benjamini,

⁴ Dani, Nafutali, Gadi na Asheri.

⁵ Andû acio onthe arîa maarî njiarwa cia Jakovu maarî andû mîrongo mûgwanja. Vîndî îo Josefu mûvîcî wa Jakovu aarî Misiri.

⁶ Vuvarî Josefu na a mûrwang'ina na andû arîa onthe maaumire nao Misiri nîmaakuire.

⁷ Nwatî njiarwa ciao, nîciaciaranire nao Aisiraeli magîtuîka eengî na makîgîa na vinya magîcûra vûrûrirî wa Misiri.

⁸ Nakuo nîgwacokire gûkîgîa na mûthamaki wîngî wa kwathana Misiri. Mûthamaki ûcio ndaicî Josefu.

⁹ Nake mûthamaki nîwerire andû ake atîrî, “Andû aya a Isiraeli nî eengî mûno na marî na vinya kûrî tue.

¹⁰ Mbaara îngiumîra, andû aya nwa manyitanîre na nthû cietû magatûvoota, na nwamaûre makauma gûkû vûrûrirî. Nîtûcarie njîra îrîa îngîgiria mongerereke makîria.”

¹¹ Kwoguo andû a Misiri nîmaaigire anene a ngombo nîguo mavinyîrîrie andû a Isiraeli na njîra ya kûmarutithia wîra mûmû. Nao andû a Isiraeli nîmaatumire matûûra manene metagwa Pithomu na Ramesesi ma kwigagwa indo nî mûthamaki.

¹² Nwatî wa ûrîa andû a Isiraeli maathiîcaga na mbere kûvinyîrîrua nî andû a Misiri, nwaguo andû a Isiraeli moongererekaga makîria na makîthiî na mbere gwîcûra vûrûrirî ûcio. Nao andû a Misiri nîmeetigîre andû a Isiraeli,

¹³ na andû a Misiri makîrutithia andû a Isiraeli wîra mûrito.

¹⁴ Nîmaatûmire mûtûûrîre wao ûtuîka mûmû na njîra ya kûmarutithia wîra wa mîako na wa mîgûnda matekûmeguîra ntha.

¹⁵ Mûthamaki wa Misiri nîwacokire akîarîria Sifira na Pua, aka arîa maatethagîrîria aka Ahibirania gûciara.

¹⁶ Nîwamerire atîrî, “Vîndî îrîa mûgûtethia aka Ahibirania gûciara ûragagani kaana ethîrwa nî kavîcî, nwatî ethîrwa nî kerîtu mûkareka gatûûre.”

¹⁷ Nwatî Sifira na Pua nîmeetigîrîte Ngai na kwoguo nîmaaregire kwathîkîra mûthamaki. Vandû va ûguo nîmaarekire tûvîcî tûtûûre mwoyo.

¹⁸ Nake mûthamaki wa Misiri nîwetire aka acio Sifira na Pua arîa maatethagîrîria aka Ahibirania gûciara, akîmaûria atîrî “Mûreka ûû nîkî? Mûrareka twana twa tûvîcî tûtûûra mwoyo nîkî?”

¹⁹ Nao aka acio nîmaacokerie mûthamaki atîrî, “Aka a Ahibirania matiîkariî ta aka a andû a Misiri. O marî vinya na nîmagîcaga twana na îvenya wana mbere ya ûmwe wa cietû akinya.”

²⁰ Kwoguo Ngai nîwekire aka acio mateethagîrîria arîa engî gûciara maûndû maro, nao andû a Isiraeli nîmaathiîre na mbere kwongereraka na kûgîa vinya.

²¹ Nîûndû aka acio nîmeetigîrîte Ngai, Ngai nîwamarathimire na akîmava mîciî yao o ene.

²² Mûthiiarî mûthamaki nîwavecanire watho kûrî andû ake onthe akiuga atîrî, “Kaana wa konthe ga kavîcî gagaciaragwa nî aka a Ahibirania mûgagaikagia rûnjîrî rwa Nailo, nwatî twana tuonthe twa twîrîtu mûkareka tûtûûre.”