Nehemia 9 - ÎVUKU RÎA ÛVORO MWARO

Andû a Isiraeli nîmaaumbûrire Mevia Mao

¹ Mûthenya wa mîrongo îîrî na îna wa mweri wa ûcio andû a Isiraeli nîmaagomanire vamwe. Nîmeenyerekirie na magîkîra nguo cia macakaya na makîîminjîria rûkûngû ciongorî ciao.

² Andû onthe a Isiraeli nîmeeyamûranîtie na ageni. Nao nîmaarûngamire na nîmaambîrîrie kumbûra mevia mao na marîa methe mao ma tene meekîte.

³ Nîmeekarire marûngamîte varîa maarî kavinda ka mathaa mathatû makîthomagîrwa Watho wa Ngai-Mûnene, Ngai wao. Nîmaathiririe mathaa mengî mathatû makiumbûra mevia mao na nîmaagoocire Ngai-Mûnene, Ngai wao.

⁴ Kwarî na vandû vatûgîru vaarûthîtwe va kûrûngamwa nî Alawi. Vandû vau nîvaarûngamîte Joshua, Bani, Kadimieli, Shebania, Buni, Sherebia, Bani, na Kenani na nîmaavoire Ngai-Mûnene, Ngai wao maugîrîrîtie.

⁵ Alawi aya: Jeshua, Kadimieli, Bani, Hashabineia, Sherebia, Hodia, Shebania, Pethania nîmaaugire atîrî, “Rûngamani mûkumie Ngai-Mûnene, Ngai wenyu, mûmûkumie tene na tene! Tiga andû onthe makumie rîîtwa rîake rîrîa rîrî na riiri, goocani rîîtwa rîake rîrîa rînene gûkîra irathimo na ûkumio wonthe.”

Îvoya rîa umbûri

⁶ Ezira nîwavoire akiuga atîrî, “We, Ngai-Mûnene, we wenga nîwe Ngai-Mûnene; nîwe waûmbire îgûrû na ûkîûmba njata cia matuurî, nîwe waûmbire nthî, îria na ûkîûmba indo cionthe irîa irî kuo, nîwe waiveere mwoyo cionthe. Maavinya ma îgûrû nîmenamagîrîra magakûgooca.

⁷ We Ngai-Mûnene Ngai nîwathuurire Aburamu, ûkîmûruta kuuma Uri ya Akalidei. Ûkîgarûra rîîtwa rîake agîcoka gwîtwa Iburahimu.

⁸ Nîwonire atî ke nîwakwîvokete, na ûkîthondeka kîrîkanîro nake. Nîwamwîrire atî nî ûkaamûva vûrûri wa Kanaani, vûrûri wa Aperizi, na wa Ajebusi, wana vûrûri wa Agirigashi. Wonthe ûgîtuîka vûrûri ûrîa njiarwa ciaku igaatûûra. Nîûndû we ûrî mwîvokeku, nîwavingirie kîîranîro kîu.

⁹ “Nîwonire ûrîa methe metû ma tene maathînîkire marî Misiri; nîwegwire magîgûkaîra marî îriarî îtune nîguo ûmatethie.

¹⁰ Nîwaringire ciama cia magegania cia kûregana na ûthamaki wa Misiri, atongoria ake onthe na andû onthe a vûrûri wake, nîûndû nîwamenyete ûrîa maavinyîrîrie methe metû ma tene. Nîwagîre na îgweta wata ûrîa kûrî ûmûnthî.

¹¹ Nîwagaanirie îria mbere yao nîguo ûmathondekere njîra, na ûkîmavîtûkîrîria nthî nyûmû. Arîa maamathingatîte nîmaaûrîre manjîrî kûndû kûriku mûno, ta ûrîa îthiga rîvorokagîra manjîrî meengî.

¹² Mûthenya nîwamatongoragia na îtu, na ûtukû wamamûrîkagîra njîra na mwaki.

¹³ Nîwanyûrûrûkire kuuma îgûrû kîrîmarî gîa Sinai, na ûkîaria na andû aku. Nîwamavere maathani na mawatho marîa maarî magîrîru.

¹⁴ Nîwamathomithirie kûrûmagîrîra thavatû yaku ntheru, kûvîtûkîrîra Musa ndungata yaku nîwamaathire marûmagîrîre maathani maku.

¹⁵ “Mavûta nîwamavere mîgate kuuma îgûrû, na manyonda nîwamavere manjî kuuma rûciararî. Nîwamerire mathiî makegwatîre vûrûri ûrîa wamerîrîte atî nîûkaamava.

¹⁶ Nwatî methe metû ma tene nîmaaûmirie ciongo ciao na magîtuîka etîi, na nîmaaregire kwathîkîra maathani maku.

¹⁷ Nîmaaregire kwathîka, makîriganîrwa nî maûndû manene marîa wekire gatagatîrî kao, wana nîmaariganîrwe nî ciama irîa wamaringîrîte. Nîmaaûmirie ciongo ciao, na makîthuurîra mûtongoria wa kûmacokia ûkomborî Misiri. Nwatî we ûrî Ngai wovanagîra, ûrî wega mwîngî, wendo waku ndûthiraga na ndûrakaraga na îvenya. Ntha ciaku nî nyîngî, ndwamatiganîria.

¹⁸ Nîmeethondekere mûvuanano wa njaû ya ndegwa, na nîmaaugire atî nîyo ngai îrîa yamarutire Misiri! Ngai-Mûnene, anga tîkwa maakûrumire!

¹⁹ Nwatî ndwamatiganîria kûu werûrî, nîûndû ntha ciaku nî nyîngî. Îtu rîrîa rîamatongoragia mûthenya rîtîamathengutîra, na ndwamathengutîria mwaki kuuma îtuurî ûrîa wamamûrîkagîra njîra ûtukû.

²⁰ Nîwamathomithirie maûndû na njîra ya Roho waku mwaro, na nîwamavaithirie na irio cia maana, na ûkîmava manjî ma kûnyua.

²¹ Nîwamamenyerere îvinda rîa mîaka mîrongo îna marî werûrî na matiatura kîndû, nguo ciao itiathira kana magûrû mao maimba.

²² “Nîwamavere mothamaki na ndûrîrî, na nîwamagaîre mîena yonthe ya vûrûri. Kwoguo nîmegwatîre Heshiboni vûrûri wa mûthamaki Sihoni, na makîîgwatîra Bashani vûrûri wa mûthamaki Ogu.

²³ We nîwatûmire njiarwa ciao ciongerereke wata njata cia îgûrû. Nîwamavere vûrûrirî ûrîa werîrîte methe mao ma tene atî magaûtonya mawîgwatîre ûtuîke wao.

²⁴ Kwoguo njiarwa ciao nîciatonyire na nîciegwatîre vûrûri ûcio, na nîwavootire andû arîa maatûûraga kuo. Andû acio maarî Akanaani, nîwavere andû aku vinya, nîguo meke wa ûrîa mangîendire andû a Kanaani vamwe na Athamaki.

²⁵ Andû aku nîmegwatîre matûûra manene marîa maarî magitîre, na vûrûri ûrîa warî mûnoru. Nîmegwatîre nyomba ciarî na indo cionthe mbaro igîtuîka ciao, iriko cia manjî irîa ciarî mînje, mîgûnda ya mîthavibu na ya mîtamaiyû îrîa îciaraga matunda, wa vamwe na mîtî mîngî ya matunda. Kwoguo nîmaarîre makîvaa, makînora na magîkenerera indo cionthe irîa wamaveere.

²⁶ “Kûnarî ûguo andû aku nîmaaregire kwathîka, na nîmaareganire nawe. Nîmaareganire na Watho waku na makîûraga arathi arîa maameraga makûgarûrûkîre, na mavinda meengî nîmaakûrumire.

²⁷ Kwoguo nîwamanenganîre kûrî nthû ciao na nthû icio ikîmaûkîrîra. Vîndî ya mînyamaaro îo nîmaagûkaîre, nawe ûrî îgûrû nîwegwire kîrîro Kîamo. Nîûndû wa ntha ciaku nyîngî nîwamavere atongoria, arîa maamavonokirie kuuma kûrî nthû ciao.

²⁸ Rîrîa maagîre na thayû nîmeevirie rîngî, nawe nîwamatiganîrie nîguo maathwe nî nthû ciao. Nwatî rîrîa maaverire na magîkûrîrîra nîwamegwire ûrî îgûrû. Na mavinda meengî nîwamavonokirie nîûndû wa ûrîa ntha ciaku ciîngîvîte.

²⁹ Nîwamakaanirie nîguo magarûrûkîre Watho waku. Kûnarî ûguo nîûndû wa mwîtîîo wao nîmaaregire kwathîkîra maathani maku. Nîmaareganire na mawatho maku marîa mûndû angîmathîkîra nwa atûûre mwoyo. Nîmaatuîkire aremi na makîûmia ciongo ciao, na nîmaaregire kwathîka.

³⁰ Îvinda rîa mîaka mîngî nîwamakirîrîrie, na nîwavere arathi Roho waku nîguo makaanie andû acio. Nwatî matiakûthikîrîria. Kwoguo nîwamarekererie kûrî andû a ndûrîrî ciîngî.

³¹ Nwatî kûnarî ûguo nîûndû ûrî ntha nyîngî mûno, ndwanamathiria kana ûmatiganîria. Ngai, we ûrî mwaro na ûrî ntha!

³² “Kwoguo, Ngai wetû ûrî Ngai mûnene na wî vinya! Wî Ngai wa kûmakania na nîûvingagia kîrîkanîro gîaku na wendo ûtathiraga. Mathîna marîa maûkîte kûrî tue na kûrî athamaki etû, kûrî anene etû na athînjîri-Ngai etû, arathi etû na kûrî methe metû, na andû onthe etû kuuma vîndî ya athamaki a Asîria, nginya ûmûnthî ndûkariganîrwe nîmo!

³³ Ûtûverithîtie na njîra îrîa yagîrîrîte, we ûrî mwîvokeku na tue twîkîte maûndû ma waganu.

³⁴ Athamaki etû, atongoria etû, athînjîri-Ngai etû, na methe metû matianathîkîra watho waku. Matiarûmîrîra maathani maku kana maûndû marîa wamakaanirie.

³⁵ Rîrîa maarî athamaki vûrûrirî wao matianagûtungata, na rîrîa maakenagîrîra maûndû meengî maro marîa wamaveete; vûrûrirî warî mûnene na mûnoru, nwatî matiatiga gwîka maûndû macûku.

³⁶ Rîu tûrî ngombo nginya ûmûnthî vûrûrirî ûrîa waveere methe metû, vûrûri ûrîa wamaveere marîcage matunda maguo na indo ciaguo mbaro.

³⁷ Ûtonga wa vûrûri ûyû ûthiîcaga kûrî athamaki arîa waigire matwathage, nîûndû tue nîtwevirie matwîkaga wa ûrîa makwenda vamwe na ndîthia cietû. Tûrî na thîna nyîngî mûno!”

Andû a Isiraeli nîmaathondekire kîrîkanîro

³⁸ Nîûndû wa maûndû monthe marîa mekîkîte, nîtwathondeka kîrîkanîro kîrûmu na twandîkanîra. Nao atongoria etû, Alawi, athînjîri-Ngai wetû nîmekîra mîvûri yao kîrîkanîrorî kîu.