Nehemia 8 - ÎVUKU RÎA ÛVORO MWARO

Ezira nîwathomere andû Watho

¹ Andû onthe a Isiraeli nîmaagomanire vamwe kîvarorî vakuvî na Kîvingo Kîam Manjî. Nao nîmaaûririe Ezira ûrîa warî mwandîki arete îvuku rîa Watho wa Musa ûrîa Ngai aaveete andû a Isiraeli.

² Kwoguo Ezira mûthînjîri-Ngai nîwaretire îvuku rîa Watho varîa andû maagomanîte. Andû acio maarî arûme, aka na ciana irîa ingîataûkîrwe nî maûndû. Mûthenya ûcio nîguo warî wa mbere wa mweri wa mûgwanja.

³ Ezira arî vau kîvarorî Kîvingorî Kîam Manjî nîwathomere andû onthe watho, arûme, aka na ciana kuuma kîraûko tene nginya mûthenya gatagatî, na andû onthe nîmaathikîrîrîtie waro.

⁴ Ezira nîwarûngamire vandû vatûgîru vaathodeketwe na mbaû nîguo arie arî vo. Mwena wake wa ûrîo nîvaarûngamîte Matithia, Shema, Anaia, Uria, Hilikia na Maaseia. Naguo mwena wake wa ûmotho nîvaarûngamîte Pedaia, Mishaeli, Malikija, Hashumu, Hashibadana, Zekaria na Meshulamu.

⁵ Ezira arûngamîte vandû vatûgîru na andû onthe makîmwonaga, nîwavingûrire îvuku nao andû onthe nîmaarûngamire.

⁶ Ezira nîwaugire atîrî, “Ngai-Mûnene, Ngai ûrîa mûnene nîakumue!” Andû onthe nîmaambararirie njara na îgûrû rîerarî na magîcokia atîrî, “Ameni! Ameni!” Nao nîmaaturirie maru magîturumithia mothiû mao nthî na makîgooca Ngai-Mûnene.

⁷ Alawi aya nîmaatethererie andû gûtaûkîrwa nî watho: Jeshua, Bani, Sherebia, Jamini, Akubu, Shebethai, Hodia, Maaseia, Kelita, Azaria, Jozabadi, Hanani, na Pelaia. Vîndî îo andû maarûngamîte wa vau maarî.

⁸ Nao nîmaathomire kuuma îvukuurî rîa watho wa Ngai na magîtaarîria ûrîa kûthomithanîtue wathorî ûcio nîguo andû mataûkîrwe nîguo.

⁹ Rîrîa andû onthe meegwire ûrîa watho waugire nîmaambîrîrie kûrîra. Nehemia ûrîa warî mûnene, Ezira mûthînjîri-Ngai na mwandîki, na Alawi arîa maathomithagia andû watho nîmaacokire makîra andû onthe atîrî, “Ûmûnthî nî mûthenya mûtheru wa Ngai-Mûnene, Ngai wenyu. Kwoguo mûtikaarîre kana mwîgue kîeva.

¹⁰ Thiîni na kwenyu mîciî na mûthondeke kîrugo, mûrîe na mûnyue ndivei îrîa mbaro na mûgaîre arîa matarî na kîndû irio icio cienyu nîûndû ûmûnthî nî mûthenya mûtheru wa Mwathani wetû, kwoguo mûtikegue kîeva. Gîkeno Kîam Ngai-Mûnene nîkîo vinya wenyu.”

¹¹ Kwoguo Alawi nîmaathiîre magîkiragia andû makîmeeraga matikethîrwe marî na kîeva nîûndû ûyû nî mûthenya mwamûre.

¹² Kwoguo andû onthe nîmeenûkire mîciî kwao na nîmaarîre na makînyua marî na gîkeno. Nîmaacokire makîgaîra andû arîa mataarî na kîndû nîûndû nîmaataûkîrwe nî ciugo irîa maathomerwe.

Kîrugo gîa tûnyomba

¹³ Mûthenya wa kaîrî atongoria a mbarî cia andû onthe, wa vamwe na athînjîri-Ngai na Alawi nîmaathiîre kûrî Ezira marî vamwe nîguo makathome kîrîra Kîam Watho.

¹⁴ Nao nîmoonire kwandîkîtwe Wathorî ûrîa Ngai-Mûnene aathanire na njîra ya Musa atî andû a Isiraeli mekarage tûnyombarî vîndî ya kîrugo Kîam mweri wa mûgwanja.

¹⁵ Nîmaacokire makîandîka na magîtûma maûndû mau Jerusalemu kuonthe na matûûrarî mao. Nao nîmaaugire atîrî, “Thiîni na kûu irîmarî mûkarete mvûa cia mîtî ya mîtamaiyû îrîa îciaraga matunda, na mîtamaiyû îrîa îciaraga matunda ya kîthakarî, mîandathi na mvûa cia mîkîndû na cia mîtî îngî îrîa îrî na mathangû nîguo tûtume tûnyomba wata ûrîa Watho wandîkîtwe.”

¹⁶ Kwoguo andû nîmaathiîre na makîrete mvûa icio na magîtuma wa mûndû kanyomba gake. Wa mûndû nîwatumire kanyomba kamwe îgûrû rîa nyomba yake, na kengî kamwe nja ya nyomba, na kengî kamwe nja ya nyomba ya Ngai, na kanyomba kengî kîvarorî kîrîa kîrî vakuvî na Kîvingo Kîam Manjî, na kengî kîvarorî vakuvî na Kîvingo Kîam Efiraimu.

¹⁷ Andû onthe arîa maaûkîte kuuma îthamîriorî nîmaatumire tûnyomba magîtûûra kuo. Kuuma vîndî ya Joshua mûvîcî wa Nuni nginya mûthenya ûcio andû a Isiraeli matiagîte na kîrugo gîa tûnyomba. Andû a Isiraeli nîmaagîre na gîkeno kînene mûno.

¹⁸ Kuuma mûthenya wa mbere wa kîrugo, Ezira nîwamathomagîra gîcunjî Kîam Watho wa Ngai wa mûthenya wa mûthenya. Nîmaakûngûîre kîrugo kîu kavinda ka mîthenya mûgwanja, na mûthenya wa kanana nîmaagomanire vamwe kûgooca wata ûrîa watho waugîte.