Nehemia 6 - ÎVUKU RÎA ÛVORO MWARO

Mîvango ya kûregana na Nehemia

¹ Sanibalati, Tobia, Geshemu ûrîa warî Mûarabu, na nthû cietû cionthe nîmegwire atî nîtwatumîte rûthingo rûkathira na gûtirî mwanya watigîtwe ûtarî mûtume. Nwatî vîndî îo ndiekîrîte mîrango ya ivingo.

² Sanibalati na Geshemu nîmaandûmanîre na makiuga atî nthiî tûgacemania nao îtûûrarî rîmwe rîrîa rîrî kûndû kûrîa kwaraganu vûrûrirî wa Ono. Nwatî meendaga kûmbîka ûndû mûcûku.

³ Nînatûmire anjaama kûrî o makerwe atîrî, “Nînîraruta wîra wa vata ndingîvota gûka. Kûrî na vata ûrîkû wîra ûrûngame nîûtiganîrîtie wa nîguo mbûke kûrî mue.?”

⁴ Maatûmanire kûrî nie maita mana na wa vîndî cionthe maatûmana, nie naamatûmagîra macokio wa mau.

⁵ Sanibalati nîwacokire agîtûma ndungata yake îmwe kûrî nie rita rîa gatano. Nayo ndûmîrîri îrîa aatûmire yarî maarûarî îtarî mvinge na

⁶ yaugaga atîrî, “Ûvoro nîwîrîtwe ndûrîrî irîa îtûthiûrûrûkîrîtie na Geshemu wanake nîwarîtie guo, atî we na Ayahudi nîmûrenda kûregana na thirikari, na kîu nîkîo kîratûma mûtuma rûthingo. Wana nîûgîte atî we ûrenda gûtuîka mûthamaki wao

⁷ na atî nîûvangîte arathi makaanîrîre ûvoro Jerusalemu atî, ‘Kûrî na mûthamaki Juda’. Mwathi wetû mûthamaki nîakerwa ûvoro ûcio; kwoguo ûka wa rîu twarie ûvoro ûcio tûrî vamwe.”

⁸ Nînatûmanire macokio kûrî ke ngiuga atîrî, “Gûtirî ûndû wanarî ûmwe mwîkîku wa maûndû marîa ûrauga. Nîwe ûthondekete maûndû mau monthe we mwene.”

⁹ Meendaga gûtûmakia magîciria nîtûgûtiga kûruta wîra. Nwatî nînavoire ngiuga atîrî, “Ngai tûma ngîe na vinya.”

¹⁰ Kavindarî wa kau Nînathiîre gûcerera Shemaia mûvîcî wa Delaia. Delaia aarî mûvîcî wa Mehetabeli ûrîa wekaraga avingîrîtwe gwake nyomba. Nake nîwambîrire atîrî, “Tiga tûkethithe varîa vatheru Mûno hekarû ndaarî na tûvinge mîrango, nîûndû marenda gûka gûkûraga. Vîndî wa cionthe ûtukû magaaûka makûûrage.”

¹¹ Nînaamûcokerie atîrî, “Mûndû tanie anga nwa aûre? Mûndû tanie nwa athiî kwîthitha hekarûrî atî nîguo avonokie mwoyo wake? Tî nthiî kuo.”

¹² Rîrîa neciririe îgûrû rîa ûndû ûcio, nînaamenyire atî Ngai ndaatûmîte Shemaia, nwatî aaragia ûguo nîûndû Tobia na Sanibalati nîmaamûnengerete kîndû nîguo avote kwaria ûguo aaragia.

¹³ Maamûrîvîte ambîkîre guoya nîguo njîvie, nao mambigîrîre rîîtwa îcûku nîguo manyararithie.

¹⁴ Nînavoire Ngai ngiuga atîrî, “Ngai wakwa, ririkana maûndû marîa Tobia na Sanibalati mekîte, wana ûririkane mûrathi ûrîa mûndûmûka wîtagwa Noadia na arathi acio engî arîa maageragia kûmbîguithia guoya.”

Kûrîkia wîra

¹⁵ Wîra wonthe wa gûtuma rîngî rûthingo nîwathirire mûthenya wa mîrongo îîrî na îtano wa mweri wa Eluli. Wîra ûcio warutirwe îvinda rîa mîthenya mîrongo îtano na îîrî.

¹⁶ Rîrîa nthû cietû cionthe na ndûrîrî irîa ciatûthiûrûrûkîrîtie ciegwire atî wîra wa gûtuma rîngî rûthingo nî mûrîku, nîmaamakire na makîgua maconokete mûno. Nîmaacokire makîmenya atî nî Ngai ûtûtethetie kûruta wîra.

¹⁷ Kavinda kau konthe atongoria a Juda nîmaatûmagîra Tobia maarûa, na Tobia nîwamatûmagîra maarûa ciake.

¹⁸ Andû eengî a Juda nîmeevîtîte atî nîmethîrwa marî mwena wa Tobia nîûndû nîwavikîtie mwarî wa Shekania mûvîcî wa Ara. Shekania aarî Mûyahudi. Nake mûvîcî wa Tobia wetagwa Jehohanani nîwavikîtie mwarî wa Meshulamu mûvîcî wa Berekia.

¹⁹ Nîmaaragia ûvoro wîgiî ciîko mbaro cia Tobia nîrî vo, nao nîmaamwîraga maûndû monthe marîa naaragia. Tobia eekaraga wa akîndûmagîra maarûa cia kûmbîgwithia guoya.