Nehemia 5 - ÎVUKU RÎA ÛVORO MWARO

Kûvinyîrîrua kwa andû arîa athîni

¹ Vîndî îmwe nîkwagîre na îteta înene kuuma kûrî arûme na aka ao nîûndû wa Ayahudi amwe ao.

² Amwe nîmaaugaga atîrî, “Tue vamwe na anake etû na erîtu etû tûrî eengî. Kwoguo nîtûvewe irio nîguo tûtigakue.”

³ Nao engî nîmaaugaga atîrî, “Tue twanenganîre mîgûnda yetû, mîtî yetû ya mîthavibu na nyomba cietû nîguo twone irio cia kûrîa tûtigakue nî yûra.”

⁴ Kûrî na engî maaugaga atîrî, “Twakombire mbeca na mîgûnda yetû na mîtî yetû ya mîthavibu nîguo tûrîve gooti ya mûthamaki.

⁵ Tûrî a nthakame îmwe na Ayahudi acio etû. Ciana cietû nî ûndû ûmwe na ciana ciao. Nwatî rîu ciana cietû tûraitua ngombo. Erîtu etû amwe nîmendetue ta ngombo. Nwatî tûtingîvota gwîtethia, nîûndû tûrî acune mîgûnda yetû na mîtî yetû ya mîthavibu nî andû engî.”

⁶ Vîndî îrîa neguire mateta mao, nînaarakarire.

⁷ Nîneciririe na ngîtua ûrîa ngwîka. Nînaareganire na atongoria na anene a andû na ngîmeera atîrî, “Mue nîmûravinyîrîria Ayahudi arîa engî enyu!” Nînaacokire ngîta andû na tûkîgomana tûrî gîkundi kînene nîûndû wao,

⁸ na ngîmera atîrî, “Tue, kûringana na ûvoti wetû twîthîrîtwe tûkîgûra andû etû a Ayahudi arîa meendetue kûrî andû a Ndûrîrî nîguo macoke kûrî tue. Nwatî mue mwendagia aa mûrwanyûkwe nîguo natue tûcoke twenderue o!” Atongoria acio nwa gûkira maakirire matarî na ûndû mangiuga.

⁹ Kwoguo nînaugire atîrî, “Ûndû ûcio mûreka tî mwaro! Mwagîrîrwe nî kwathîkîra Ngai na mwîke ûrîa kwagîrîrîte. Na mweka ûguo tîmûva nthû cietû na nîo andû a ndûrîrî kamweke ga gûtûthekerera.

¹⁰ Îgûrû rîa ûguo nie, aa mûrwaiya, na ndungata ciakwa nîtûrakombithia andû acio mbeca na ngano. Kwoguo nîtûtigane na ûndû ûcio wa kuga tûrîvwe.

¹¹ Mûtikanamere mamûrîve thirî wenyu ûrîa marî naguo wa mbeca kana wa ngano, kana wa ndivei, kana wa maguta ma ndamaiyû. Mûcoke mûmacokerie mîgûnda yao, mîtî yao ya mîthavibu, na ya mîtamaiyû îrîa îciaraga matunda, na nyomba ciao.”

¹² Nao atongoria nîmaacokirie atîrî, “Nîtûgwîka ûguo wauga, na nîtûkûmacokeria indo ciao tûtagwîtia kîndû.” Nînaacokire ngîta athînjîri-Ngai na ngîtûma mevîte na mauge atî nîmagwîka ûguo meranîra.

¹³ Nînarutire nguo yakwa îrîa nerigicîrîtie kîûnû na ngîmîrivariva na ngiuga atîrî, “Ûguo nîguo Ngai akaarivariva mûndû wa wonthe ûtakaavingia ûrîa eranîra. Ngai nîakaamûcuna nyomba cienyu na indo cionthe irîa mûrî nacio, amûtige mûtarî na kîndû.” Nao andû onthe arîa maagomanîte vau nîmaaugire “Ameni” na nîmaagocire Ngai. Nao andû nîmeekire ûrîa meeranîrîte.

Nehemia aarî mûtaana

¹⁴ Natwirwe mûnene wa vûrûri wa Juda mwakarî wa mîrongo îîrî kuuma mûthamaki Aritakiserikise ambîrîria kwathana nginyagia mwakarî wake wa mîrongo îthatû na îîrî. Naarî mûnene îvinda rîa mîaka îkûmi na îîrî. Kavinda kau konthe nekarire nîrî mûnene, ndiarîa irio irîa naagîrîrwe nîkûrîa nîrî mûnene wana andû etû matiairîa.

¹⁵ Anene onthe arîa maathanaga mbere yakwa nîmaaigîrîrîte andû mîrigo mîrito. Nîmeetagia kuuma kûrî wa mûndû sîlûva mîrongo îna na îgûrû rîa icio magetia irio na ndivei. Wana ndungata ciao nîciavinyagîrîria andû. Nwatî nie ndieka ûguo, nîûndû nînetigagîra Ngai.

¹⁶ Narutire wîra wa gûtuma rûthingo rîngî na vinya wakwa wonthe na gûtirî kîndû negîrîre nakîo. Nethagîrwa na ndungata ciakwa cionthe wîrarî ûcio wa gûtuma rûthingo.

¹⁷ Îgûrû rîa ûguo, wa mûthenya nînavecaga andû ta îgana rîmwe rîa mîrongo îtano irio, a Ayahudi na anene a andû metharî yakwa. Wana nînavecaga irio andû arîa maûkaga kûrî nie kuuma ndûrîrî irîa ciarî vakuvî natue.

¹⁸ Wa mûthenya nîkwathondekagwa kîndû gîa kûrîwa. Irio icio ciarî ndegwa îmwe, ng'ondu irîa mbaro mûno ithathatû, na ngûkû nyîngî. Wa mîthenya îkûmi yathira nînavecanaga ndivei ya kûrugwa wa rîo. Kavinda kau konthe ndietia irio irîa mûnene aagîrîrwe nî gwîtia nîûndû nînaicî ûrîa andû maarî na mûrigo mûnene.

¹⁹ Nînakûvoya, Ngai ûririkane kûmbîka waro nîûndû wa maûndû monthe marîa naneka andû aya.