Nehemia 4 - ÎVUKU RÎA ÛVORO MWARO

Nehemia nîwavootire andû arîa maareganaga na wîra wake

¹ Rîrîa Sanibalati eegwire atî tue Ayahudi nîtûratuma rîngî rûthingo, nîwarakarire mûno na nîwambîrîrie gûtûnyarara.

² Nîwaririe arî mbere ya aa mûrwang'ina na mbere ya mbûtû ya athigari a Samaria akiuga atîrî, “Ayahudi aya matanarî na vinya mareka atîa? Marenda gûtuma rûthingo rîngî? Mareciria na njîra ya kûrutîra Ngai magongoona nwa mavote kûrîkia wîra ûcio na mûthenya ûmwe? Nwa mavote gûcokia mathiga ma gûtuma ûrîa meekariî kuuma ciûmbwarî ino maaûmbirwe mavîvua?”

³ Tobia ûrîa Mûamoni aarî vo rîrîa Sanibalati aaugire ûguo na Tobia akiuga atîrî. “Rûthingo rûu maratuma wana mbwe îgatwa îgûrû rîaruo nî kwomomoka!”

⁴ Nanie nînavoire Ngai ngiuga atîrî, “Ngai wetû twîgue. Andû aya nî maratûnyarara. Tiga kînyararo Kîamo kîmacokere. Tiga indo ciao irîa irî vata ciîwe na mavirwe njeera vûrûri mûgeni.

⁵ Ndûkamarekere maûndû macûku marîa mareka na ndûkariganîrwe nî mevia mao, nîûndû nîmatûrumîte tue andû arîa tûratuma rûthingo.”

⁶ Kwoguo nîtwatumire rûthingo rîngî na rûgîkinya nuthu ya ûraca waruo kûthiî na îgûrû nîûndû andû maarî na wendo wa kûruta wîra.

⁷ Nwatî rîrîa Sanibalati, Tobia na andû a Arabia, Aamoni, na Ashidodi meegwire atî wîra wa gûtuma rûthingo rwa Jerusalemu rîngî nwa ûrathiî na mbere na kûrîa kwarî na mîanya nîkûravingwa nîmaarakarire mûno.

⁸ Kwoguo nîmaavangire marî vamwe matharîkîre Jerusalemu nîguo kûgîe na kîvîngîcî wîrarî wa gûtuma.

⁹ Nîtwavoire Ngai wetû na tûkîthuura andû a kûrangagîra arîa maatumaga rûthingo rîngî ûtukû na mûthenya.

¹⁰ Nao andû a Juda nîmaaugire atîrî, “Vinya wetû wa gûkuua mîrigo nîûrathira na kûrî na gîko kîngî mûno; tûtiravota wîra wa gûtuma rûthingo.”

¹¹ Nthû cietû cieciragia atî tûtikaamona kana tûmenya ûrîa maavangaga gûtumîrîra wa rîmwe na kwambîrîrie gûtûûraga nîguo wîra wetû ûkinyie mûthiia.

¹² Nwatî Ayahudi arîa maatûûraga gatagatîrî ka nthû cietû nîmaaûkire kûrî tue maita îkûmi na magîtwîra atîrî, “Nthû cienyu kuuma kûrîa kuonthe itûûraga nîiravanga mîvango mîcûku îtwîgiî.”

¹³ Kwoguo vuva wa rûthingo mîanyarî kûrîa rûtaarî rûriku, nînaigire andû kûringana na nyomba ciao. Andû acio nînaamavere mviû, matumû na moota.

¹⁴ Nînaroririe ngîona atî andû maarî amaku mûno. Kwoguo nînameerire wa vamwe na atongoria na anene ao atîrî, “Mûtikamakue nî nthû cietû. Ririkanani ûrîa Mwathani arî mûnene na arî vinya na mûrûîrîre andû enyu, ciana cienyu, aka enyu, na mîciî yenyu.”

¹⁵ Nthû cietû nîciegwire atî nîtwamenyire ûrîa maavangaga, na nîmaamenyire atî Ngai nîwacûkangîtie mîvango yao. Kwoguo tuonthe nîtwacokire kûruta wîra wa gûtuma rîngî rûthingo.

¹⁶ Kuuma mûthenya ûcio na kûthiî na mbere, nuthu ya andû akwa nîmaarutaga wîra wa gûtuma rûthingo. Nayo nuthu îo îngî yarutaga wîra wa kûrangîra mekîrîte tûvuti na manyitîte matumû, ngo, na moota. Nao atongoria nîmaavecaga andû

¹⁷ arîa maatumaga rûthingo ûtethio. Andû arîa maakuuaga indo cia gûtuma rûthingo, maarî na mûrigo mûrito nîûndû njara îmwe nîyo yatumaga na îo îngî îgakuua indo cia mbaara.

¹⁸ Mûndû wonthe watumaga ethagîrwa overerete rûviû kîûnû. Mûndû ûrîa wavuvaga karumbeta ethagîrwa arî vakuvî nanie.

¹⁹ Nînerire andû onthe, atongoria na anene ao atîrî, “Wîra nî mwîngî na nîûtambîte kûndû kûraca na andû makamûkana wa magîtumaga rûthingo makaracavanîrîria mûno.

²⁰ Kwoguo mwegua mûgambo wa karumbeta mûgaaûka varî tue. Ngai wetû agaatûrûîrîra.”

²¹ Kwoguo wa mûthenya kuuma kîraûko nginya kîvwaî, nuthu ya andû etû meethagîrwa magîtuma rûthingo. Nayo nuthu ya andû acio engî nîmaarûngamaga na matumû matûrangîrîte.

²² Kavindarî wa kau nînerire andû onthe atîrî, “Tiga mûndûmûrûme wonthe na ndungata ciake mathiî magekarage Jerusalemu, nîguo ûtukû tûrangagîre îtûûra na mûthenya tûkaruta wîra.”

²³ Kwoguo nie, aa mûrwaiya, ndungata ciakwa wana arangîri arîa twarî nao tûtiarutaga nguo cietû. Tuonthe twethagîrwa tûnyitîte indo cietû cia mbaara.