Nehemia 13 - ÎVUKU RÎA ÛVORO MWARO

Kwamûkana kuuma kûrî Ageni

¹ Mûthenya ûcio andû nîmaathomerwe na mûgambo mûnene Watho kuuma îvukuurî rîa Musa. Wathorî ûcio nîmaathomire vandû varîa vaaugîte atî gûtirî vîndî wana îrîkû andû a Aamoni kana Amoabu mageetîkîrua gûtonya kîûnganorî Kîam andû a Ngai.

² Gîtûmi Kîam ûndû ûcio nî atî matianava andû a Isiraeli irio kana manjî vîndî îrîa maaumaga Misiri. Vandû va ûguo, Aamoni na Amoabu maavere Balaamu mbeca nîguo arume Aisiraeli kîrumi. Nwatî Ngai wetû nîwagarûrire kîrumi kîu gîgîtuîka kîrathimo.

³ Vîndî îrîa andû a Isiraeli meegwire Watho ûcio wathomwa, nîmaamûkanire na andû onthe arîa maarî ageni.

Nehemia nîwaretire ûgarûrûku

⁴ Mbere ya ûndû ûyû wîkîke, Eliashibu ûrîa warî mûthînjîri-Ngai, na nîke wathuurîtwe arî mûrûngamîrîri wa tûnyomba twa hekarû tûrîa twaigagwa indo, ethîrîtwe arî mûrata wa Tobia.

⁵ Eliashibu nîwetîkîrîtie Tobia atûmîre nyomba îmwe nene îrîa mbererî yaigagwa matega ma irio cia mûgûnda, ûbani, indo irîa ciavûthagîrwa hekarûrî, gîcunjî gîa îkûmi Kîam matega ma irio, ndivei, na maguta, indo irîa ciavecagwa Alawi, aini a nyîmbo, na arangîri a ivingo, na athînjîri-Ngai kûringana na Watho.

⁶ Ndiarî Jerusalemu vîndî îrîa maûndû mama mekîkaga, nîûndû mwakarî wa mîrongo îthatû na îîrî îrîa Aritakiserikise ethîrîtwe arî mûthamaki wa Babuloni nînathiîte kûmûmenyithia maûndû. Vuvarî nînacokire ngîûria mûthamaki amve rûtha nthiî,

⁷ na nînacokire Jerusalemu. Nacoka Jerusalemu nînamenyire ûndû mûcûku ûrîa Eliashibu eekîte wa kûva Tobia rûtha rwa gûtûmîra nyomba îrîa yarî kîvarorî Kîam nyomba ya Ngai.

⁸ Nînaarakarire mûno nî ûndû ûcio, kwoguo nînarutire indo cia Tobia cionthe kuuma nyomba na ngîcikia na kûu nja.

⁹ Nînacokire ngîvecana watho atî nyomba icio ithondekerwe îgongoona rîa kûitheria, na indo cia gûtûmîrwa nyombarî ya Ngai, na matega ma irio cia mûgûnda, na ûbani icokue.

¹⁰ Wana nînamenyire atî Alawi matiavecagwa gîcunjî Kîamo. Kwoguo Alawi na aini a nyîmbo arîa maarutîte wîra na vau kavere nîmaacokete wa mûndû mûgûndarî wake.

¹¹ Kwoguo nînatetirie anene nîûndû wa gûtûma nyomba ya Ngai îtiganîrua. Nînaretire Alawi na aini a nyîmbo vamwe na ngîmacokia mawîrarî mao.

¹² Andû onthe a Juda nîmaambîrîrie rîngî kûreta gîcunjî gîa îkûmi Kîam irio cia mîgûnda, ndivei, na maguta. Indo icio nîciaigirwe nyombarî cia kwigwa indo.

¹³ Nînathuurire Shelemia mûthînjîri-Ngai; Zadoku, mûndû warî mûûgî maûndûrî ma Watho, na Pedaia Mûlawi matuîke arûngamîrîri a nyomba cia kwigwa indo. Nake Hanani mûvîcî wa Zakuri wa Matania atuîke wa kûmatethagia. Andû acio nîmecîkene atî nî evokeku na wîra wao warî wa kûgaîra andû ao indo.

¹⁴ Ndirikana Ngai wakwa. Ndûkariganîrwe nî maûndû maro marîa mbîkîte nîûndû wa nyomba yaku na ûtungata waku.

¹⁵ Kavinda kau nînonire andû a Juda makîviva thavibu mûthenya wa thavatû na nîmaaretaga irio cia mîgûnda maikuithîtie mvunda. Na engî nîmaaretaga ndivei, thavibu, na ndamaiyû îtûûrarî rîa Jerusalemu mûthenya wa thavatû maikuîte na mvunda. Nînaamakaanirie na ngîmeera matikendie indo mûthenya wa thavatû.

¹⁶ Andû a kuuma Turo arîa maatûûraga Jerusalemu nîmaaretaga nthamaki na indo cia mîthemba yonthe mûthenya wa thavatû na makendagîria andû a Juda na Jerusalemu.

¹⁷ Nînacokire ngîkararania na atongoria a Juda na ngîmeera atîrî, “Taroria maûndû marîa macûku mûreka! Mue nîmûratûma thavatû îthîrwe îtarî ntheru.

¹⁸ Anga ûndû ta ûyû tîguo wekirwe nî methe menyu na Ngai akîretithîria andû maûndû macûku wa vamwe na îtûûra rîîrî? Na rîu nwa mûraretithîria Aisiraeli marakara meengî ma Ngai na njîra ya gwîkîra thavatû mûgiro.”

¹⁹ Kwoguo nînavecanire watho atî ivingo cia îtûûra rîa Jerusalemu ivingagwe vîndî yonthe kîvwaî mbere ya thavatû na itikavingûrwe nginya rîrîa thavatû îkaathira. Nînacokire ngiga ndungata imwe ciakwa ivingorî nîguo cione atî gûtirî kîndû kîngîatonyagua îtûûrarî mûthenya wa thavatû.

²⁰ Itonga na andû arîa meendagia indo cia mîthemba yonthe nîmaararire vau nja ya îtûûra rîa Jerusalemu riita rîmwe kana maita maîrî.

²¹ Nwatî nînaamakaanirie na ngîmeera atîrî, “Mûrarara ava rûthingorî nîkî? Mweka ûguo rîngî nîngaamwîngata na vinya.” Kuuma vîndî îo matiacoka gûka mûthenya wa thavatû.

²² Nînathire Alawi metherie na mathiî makarangîre ivingo nîguo mone atî thavatû nîgwîkara îrî nyamûre. Ngai wakwa, ndirikana nîûndû wa ûndû ûyû wanaguo na ûmbîguîre ntha nîûndû wa wendo waku ûtathiraga.

²³ Kavindarî wa kau nînaamenyire atî Ayahudi eengî nîmaavikîtie aka kuuma Ashidodi, Aamoni, na Moabu.

²⁴ Nuthu ya ciana ciao ciaragia rûthiomi rwa Ashidodi kana rwa mûndû ke mwene, nwatî matingîavotire kwaria rûthiomi rwa Juda.

²⁵ Nînakararanirie nao na ngîmaruma irumi, amwe ao ngîmariva na ngîmakûranga njuîrî cia ciongo. Nînaamevîtithirie na rîîtwa rîa Ngai atî gûtirî vîndî îngî o kana ciana ciao ikaavikia kana ivikue nî andû acio.

²⁶ Nînaugire atîrî, “Aka ageni nîo maatûmire mûthamaki Solomoni evia. Gatagatî ka ndûrîrî irîa ciîngî gûtirî mûthamaki wekariî take. Nîwendetwe nî Ngai wake na Ngai nîwamûtuire mûthamaki wa Isiraeli kuonthe. Kûnarî ûguo aka acio ageni nîmaatûmire evia.

²⁷ Nîkwa tûkûmûthikîrîria na twîke ûndû ûyû mûcûku wa kûregana na Ngai na njîra ya kûvikia aka ageni?”

²⁸ Ûmwe wa avîcî a Jehoiada, mûvîcî wa Eliashibu, Mûthînjîri-Ngai mûnene aavikîtie mwîrîtu wa Sanibalati. Sanibalati aarî wa kuuma Horoni. Kwoguo nînengatire Jehoiada aume Jerusalemu.

²⁹ Ngai wakwa, ririkana andû acio nîûndû nîmagwatîtie ûthînjîri-Ngai mûgiro wa vamwe na kîrîkanîro Kîam ûthînjîri Ngai na Kîam Alawi.

³⁰ Kwoguo nînaamatheririe kuuma kûrî ûndû wonthe mûgeni. Nînagaaire mawîra ma athînjîri-Ngai na Alawi, wa mûndû ngîmûgaîra wîra wake.

³¹ Nînavangire ûrîa ngû ikaaretagwa mavinda marîa maagîrîru, na matega ma matunda ma mbere vîndî îrîa matunîva. Ndirikana we Ngai wakwa, nîûndû wa maûndû mau monthe.