Nehemia 11 - ÎVUKU RÎA ÛVORO MWARO

Andû arîa maatûûraga Jerusalemu

¹ Atongoria a andû a Isiraeli maatûûraga Jerusalemu. Nao andû acio engî nîmaaikirie mîtî nîguo mathuure mbarî îmwe gatagatî ka mbarî îkûmi arîa maarî mathiî gûtûûra Jerusalemu îtûûra rîtheru, nacio mbarî kenda itigwe matûûrarî mau mengî.

² Andû nîmaakumirie arîa onthe meerutire na kwîyendera magatûûre Jerusalemu.

³ Matûûrarî mau mengî ma andû a Isiraeli, athînjîri-Ngai, Alawi, aruti wîra a hekarû, na njiarwa cia ndungata cia Solomoni maatûûraga mîciîrî yao ene matûûrarî mao.

⁴ Andû a mûvîrîga wa Juda na mûvîrîga wa Benjamini nîo maatûûraga Juda. Andû a Juda maarî: Athaia mûvîcî wa Uzia, îthe wa Uzia aarî Zakaria mûvîcî wa Amaria. Amaria aarî mûvîcî wa Shefatia, Shefatia aarî mûvîcî wa Mahalaleli. Aya onthe maarî njiarwa cia Perezi.

⁵ Maaseia aarî mûvîcî wa Baruku. Baruku aarî mûvîcî wa Kolihoze, mûvîcî wa Hazaia. Hazaia aarî mûvîcî wa Adaia. Adaia aarî mûvîcî wa Joiaribu. Joiaribu aarî mûvîcî wa Zekaria, Zekaria aarî mûvîcî wa Shela, Shela aarî mûvîcî wa Juda.

⁶ Njiarwa cionthe cia Perezi maarî arûme maarî na ûvoti. Onthe maatûûraga Jerusalemu na maarî arûme magana mana ma mîrongo îtandatû na inyanya (468).

⁷ Andû a mûvîrîga wa Benjamini maarî: Salu mûvîcî wa Meshulamu, Meshulamu mûvîcî wa Joeli, Joeli mûvîcî wa Pedaia. Pedaia aarî mûvîcî wa Kolaia, Kolaia aarî mûvîcî wa Maaseia. Maaseia aarî mûvîcî wa Ithieli, mûvîcî wa Jeshaia.

⁸ Gabai na Salai nîmaakonenie na Salu. Onthe maarî arûme magana manana ma mîrongo îîrî na anana (928) na maatûûraga Jerusalemu.

⁹ Joeli mûvîcî wa Zikiri nîke warî mûtongoria wao, na Juda mûvîcî Hasenua nîke warî wa kaîrî wa anene a îtûûra înene rîa Jerusalemu.

¹⁰ Nao athînjîri-Ngai maarî: Jedaia mûvîcî wa Joiaribu, Jakini,

¹¹ Seraia mûvîcî wa Hilikia, Hilikia mûvîcî wa Meshulamu, Meshulamu mûvîcî wa Zadoku, Zadoku mûvîcî wa Meraiothi, Meraiothi mûvîcî wa Ahitubu ûrîa warî mûnene wa nyomba ya Ngai.

¹² Acio onthe vamwe na aa mûrwang'ina arîa maarutaga wîra hekarûrî maarî arûme magana manana ma mîrongo îîrî na aîrî (822). Wa vamwe na acio, kwarî na Adaia, mûvîcî wa Jerohamu, Jerohamu mûvîcî wa Pelalia, Pelalia mûvîcî wa Amuzi, Amuzi mûvîcî wa Zakaria, Zakaria mûvîcî wa Pashihuri, Pashihuri mûvîcî wa Malikija

¹³ na aa mûrwang'ina arîa maarî atongoria a nyomba cia methe mao. Onthe maarî arûme magana maîrî ma mîrongo îna na aîrî (242). Wana kwarî na Amashisai mûvîcî wa Azareli, Azareli aarî mûvîcî wa Ahizai, Ahizai aarî mûvîcî wa Meshilemothi, Meshilemothi aarî mûvîcî wa Imeri,

¹⁴ na aa mûrwang'ina, njamba ciarî na vinya. Onthe maarî arûme îgana rîa mîrongo îîrî a anana (128). Mûtongoria wao aarî Zabudieli mûvîcî wa Hagedolimu.

¹⁵ Nao Alawi maarî: Shemaia mûvîcî wa Hashubu, Hashubu aarî mûvîcî wa Azirikamu. Azirikamu aarî mûvîcî wa Hashabia, Hashabia aarî mûvîcî wa Buni.

¹⁶ Shabethai na Jozabadi maarî atongoria a Alawi arîa maarûngamagîrîra wîra ûrîa warî na kûu nja ya nyomba ya Ngai.

¹⁷ Na kwarî Matania mûvîcî wa Mika, Mika mûvîcî wa Zabudi, Zabudi mûvîcî wa Asafu. Matania nîke warî mûtongoria vîndî ya mavoya ma ngatho. Na kwarî Bakibukia ûrîa warî wa kaîrî gatagatî ka aa mûrwang'ina, na Abida mûvîcî wa Shamua, Shamua aarî mûvîcî wa Galali mûvîcî wa Jeduthuni.

¹⁸ Alawi onthe arîa maatûûraga îtûûra rîrîa rînene rîa Jerusalemu maarî magana maîrî ma mîrongo înana na ana (284).

¹⁹ Akubu, Talimoni na andû a nyomba yao maarî arangagîra a ivingo na onthe marî îgana rîmwe rîa mîrongo mûgwanja na aîrî (172).

²⁰ Andû acio engî a Isiraeli, athînjîri-Ngai na Alawi arîa maatigarire maatûûraga mîciî kwao matûûrarî mau mengî monthe ma Juda.

²¹ Nwatî ndungata cia hekarû ciatûûraga Ofeli na nîmaarutaga wîra marûngamîrîrîtwe nî Ziha na Gishipa.

²² Mûrûngamîrîri wa Alawi arîa maarî Jerusalemu aarî Uzi mûvîcî wa Bani. Bani aarî mûvîcî wa Hashabia, mûvîcî wa Matania. Matania aarî mûvîcî wa Mika na aarî wa njiarwa cia Asafu arîa maarî aini a nyîmbo hekarûrî ya Ngai.

²³ Kwarî na watho wîgiî aini waumîte kûrî mûthamaki, ûrîa wonanagia ûrîa maagîrîrwe nî gwîka wa mûthenya wa mûthenya.

²⁴ Pethahia mûvîcî wa Meshezabeli wa mbarî ya Zera mûvîcî wa Juda nîke warî mwarîrîria wa mûthamaki maûndûrî monthe megiî andû a Juda.

Andû arîa maarî matûûrarî mau mengî

²⁵ Andû amwe a Juda maatûûraga matûûrarî marîa maarî vakuvî na mîgûnda yao. Andû amwe a mûvîrîga wa Juda maatûûraga Kiriathi Ariba, Diboni, na Jekabizeli na icagi irîa ciarî vakuvî na matûûra mau,

²⁶ na Jeshua, Molada, Bethipeleti,

²⁷ Hazarishuali, na Beerisheba wa vamwe na icagi irîa ciamathiûrûrûkîrîtie.

²⁸ Wana nîmaatûûraga îtûûrarî rîa Zikilagi, Mekona vamwe na icagirî ciarîo,

²⁹ na Enirimoni, Zora, na Jarimuthi,

³⁰ na Zanoa, Adulamu vamwe na icagi irîa ciathiûrûrûkîrîtie matûûra mau. Nîmaatûûraga Lakishi na mîgûndarî îrîa yarî vakuvî, na Azeka na icagi irîa ciarî vakuvî. Kwoguo andû a Juda maatûûraga vûrûrirî ûrîa warî gatagatî ka Beerisheba na nginya Kîamndarî Kîam Hinomu.

³¹ Andû a mûvîrîga wa Benjamini wanao maatûûraga kuuma Geba kûthiî na mbere, Mikimashi, Aija, Betheli na icagi cia rîo,

³² Anathothi, Nobu, Anania,

³³ Hazoru, Rama, Gitaimu,

³⁴ Hadidi, Zeboimu, Nebalati,

³⁵ Lodi, na Ono, na Kîamndarî Kîam mavundi.

³⁶ Ikundi imwe cia Alawi irîa ciatûûraga vûrûrirî wa Juda nîmaatukanîrwe vamwe na andû a Benjamini.