Ndari 6 - ÎVUKU RÎA ÛVORO MWARO

Mawatho ma Anazari

¹ Ngai-Mûnene nîwathire Musa

² ere andû a Isiraeli atî, mûndûmûrûme kana mûndûmûka wa wonthe wîyamûrîrîte Ngai-Mûnene na akagîa na mwîvîtwa wa mwanya, agaatuîkaga Mûnazari na

³ ndagîrîrwe nî kûnyua ndivei na njovi. Ndagîrîrwe nî kûnyua thiki yumîte kûrî ndivei kana njovi, wana kana anyue manjî ma thavibu, kana arîe thavibu îrî nyûmithie kana îtarî nyûmithie.

⁴ Îvinda rîonthe rîrîa agûtûûra arî Mûnazari ndagîrîrwe kûrîa kîndû kîrûthîtwe na thavibu, mvîndî kana makoro ma thavibu.

⁵ Mûndû ûcio wîvîtîte agatuîka Mûnazari ndakeenjwa kana atinue njuîrî ûtûûrorî wake wonthe ûrîa eyamûrîrîte Ngai-Mûnene. Agekaraga arî mûtheru na nîakaarekereria njuîrî ciake iracave.

⁶ Mavinda monthe marîa eyamûrîrîte Ngai-Mûnene, ndakaathiî vakuvî na kimba,

⁷ kîrî Kîam îthe, ng'ina, mûrwang'ina kana mwarwang'ina. Njuîrî ciake nî cia kwonania atî nîeyamûrîrîte Ngai-Mûnene. Kwoguo ndagîrîrwe nî kwîgwatia gîko.

⁸ Mavinda monthe marîa agûtûûra arî Mûnazari akethagîrwa eyamûrîrîte Ngai-Mûnene.

⁹ Mûndû angîkua wa rîmwe arî vakuvî na Mûnazari na njuîrî cia Mûnazari igîe gîko, njuîrî icio nwanginya ikeenjwa vuva wa mîthenya mûgwanja nîûndû ûcio nîguo mûthenya wa kwîtheria.

¹⁰ Mûthenya wa kanana, Mûnazari ûcio nîakaavira macîa maîrî kana ndutuura igîrî kûrî mûthînjîri-Ngai vau mûromorî wa îgema rîa Ngai-Mûnene.

¹¹ Mûthînjîri-Ngai nîagaatega ndutuura îmwe îrî îtega rîa kûtheria mevia, na îo îngî îrî îtega rîa kûvîvua. Mau makeethîrwa marî mambura ma kwîtheria nîûndû wa kûvutania na kimba. Mûthenya ûcio nwaguo njuîrî ciake ikaamûrwa rîngî,

¹² na eyamûrîre Ngai-Mûnene rîngî arî Mûnazari. Îvinda rîu rîa mbere rîarî rîa mana nîûndû njuîrî ciake irîa ciarî nyamûre ciarî ngwatie gîko. Nîakaaruta gatûrûme ga ûkûrû wa mwaka ûmwe rîrî îrîvi rîa mavîtia make.

¹³ Watho wa Mûnazari nî atî: îvinda rîrîa Mûnazari eyamûrîrîte Ngai-Mûnene rîathira nîakaathiî mûromorî wa îgema rîa Ngai-Mûnene

¹⁴ na arutîre Ngai-Mûnene nyamû ithatû itarî na wonje. Nacio nî: ndûrûme ya ûkûrû wa mwaka ûmwe rîrî îtega rîa kûvîvua, mwatî wa ûkûrû wa mwaka ûmwe rîrî îtega rîa kûtheria mevia, na ndûrûme ya îtega rîa thayû.

¹⁵ Nîakaaruta gîkavu gîcûrîte mîgate îtekîrîtwe ndawa ya kwimbia: geki irugîtwe na mûtu mûvinyu ûtukanîtue na maguta ma ndamaiyû, tûmîgate tûceke tûvakîtwe maguta ma ndamaiyû vamwe na matega ma irio cia mûgûnda na matega ma indo cia kûnyuwa.

¹⁶ Mûthînjîri-Ngai nîakaavira indo icio cionthe kûrî Ngai-Mûnene irî matega ma mevia na matega ma kûvîvua.

¹⁷ Mûthînjîri-Ngai nîakaaruta ndûrûme îo kûrî Ngai-Mûnene îrî îgongoona rîa thayû, vamwe na gîkavu Kîam mîgate îtekîrîtwe ndawa ya kwimbia, na îtega rîa irio cia mûgûnda na îtega rîa indo cia kûnyuwa.

¹⁸ Mûnazari nîakaathiî mûromorî wa îgema rîa Ngai-Mûnene, enje njuîrî ciake, na acikie mwakirî ûrîa ûravîvia matega ma thayû.

¹⁹ Vîndî îrîa kûgûrû kwa mbere kwa ndûrûme gûkaatherûkua mûthînjîri-Ngai nîakaagwoca vamwe na geki îmwe na kamûgate kamwe gaceke kuuma gîkavurî na acigîrîre njararî cia Mûnazari.

²⁰ Mûthînjîri-Ngai nîakaanenganîra indo icio irî matega ma mwanya kûrî Ngai-Mûnene. Indo icio nî ntheru cia gûtûmîrwa nî mûthînjîri-Ngai. Vamwe na indo icio, nîgûkethîrwa na kîthûri na kûgûrû kwa ndûrûme. Vuva wa ûguo Mûnazari nwa anyue ndivei.

²¹ Mau nîmo mawatho ma Mûnazari. Nwatî Mûnazari angîranîra kîndû kînene makîria, nwanginya avingie ciîranîro cionthe.

Ûrîa Athînjîri-Ngai makaarathimanaga

²² Ngai-Mûnene nîwathire Musa

²³ ere Aroni na avîcî ake atî makaarathimaga andû a Isiraeli ta û:

²⁴ Ngai-Mûnene arokûrathima na akûmenyagîrîre.

²⁵ Ngai-Mûnene arogûtuga na agwîke maûndû maro.

²⁶ Ngai-Mûnene arokûmenyerera na akûve thayû.

²⁷ Ngai-Mûnene nîwaugire atîrî, “Mangîkaarathima andû a Isiraeli makîgwetaga rîîtwa rîakwa, nîngaamarathima.”