Ndari 5 - ÎVUKU RÎA ÛVORO MWARO

Andû arîa matarî atheru

¹ Ngai-Mûnene nîwerire Musa atîrî,

² “Atha andû a Isiraeli mengate kuuma kûrîa mwambîte magema andû onthe arîa marî na mîrimû mîcûku ya ngothi, mûndû wa wonthe uraga na mûndû wa wonthe ûrî na gîko nîûndû wa kûvutania na kimba.

³ Îngatani arûme na aka onthe arîa marî na gîko maume kûrîa mûtûûraga nîguo matikagwatie kûndû kûu gîko nîûndû kûu nîkuo ndûûranagia na andû akwa.”

⁴ Nao andû a Isiraeli nî meengatire andû acio onthe kuuma kûrîa maatûûraga, wata ûrîa Ngai-Mûnene aathîte Musa.

Îrîvi nîûndû wa mavîtia marîa mekîtwe

⁵ Ngai-Mûnene nîwerire Musa eere Aisiraeli atîrî,

⁶ “Rîrîa mûndû wa wonthe ethîrwa atarî mwîvokeku kûrî Ngai-Mûnene na eka mûndû ûrîa wîngî naaî,

⁷ mûndû ûcio nwanginya aumbûre mevia make na acoke arîve mûndû ûrîa avîtîrîtie îrîvi rîonthe, na acoke ongerere icunjî mîrongo îîrî îgûrû rîa îgana, anengere mûndû ûcio avîtîrîtie.

⁸ Nwatî ethîrwa mûndû ûcio wavîtîrîtue nî mûkuû na gûtirî mûndû ûngîmûgaa, îrîvi rîake rîkaaviragîrwa Ngai-Mûnene rîrî rîa mûthînjîri-Ngai. Rîkaaviragwa vamwe na ndûrûme ya kûtheria wîvia wa mûndû ûcio wîvîtie.

⁹ Indo cionthe ntheru irîa andû a Isiraeli marutagîra Ngai-Mûnene nî cia mûthînjîri-Ngai.

¹⁰ Wa mûthînjîri-Ngai agaatûmagîra indo irîa arutîrîtwe.”

Aka arîa matarî evokeku

¹¹ Ngai-Mûnene nîwathire Musa

¹² ere andû a Isiraeli atî, mûka wa mûndû nwa ethîrwe arî na meciria matarî maro na ethîrwe atarî mwîvokeku,

¹³ na kwoguo amenyane kîîmwîrî na mûndûmûrûme wîngî na mûrûme ndamenye nîûndû eekire wîvia ûcio na nthitho, ethagîrwa arî na gîko wana ethîrwa gûtirî mûndû wamwonire.

¹⁴ Nwatî mûrûme angîmwîkûûa atî, nîmwîgwatiu gîko na njîra ya kûmenyana kîîmwîrî na mûndûmûrûme wîngî na ethîrwe ndaaneka guo,

¹⁵ mûrûme nîakaamûvira kûrî mûthînjîri-Ngai akuuîte kilo îmwe ya mûtu wa cairi. Ndagîrîrwe nî gwîkîra maguta kana ûbani mûturî ûcio nîûndû nî îtega rîrutîtwe nî mûndûmûrûme agîîkûûa mûka nîguo ûma ûmenyekane.

¹⁶ Mûthînjîri-Ngai nîakarûngamia mûndûmûka ûcio mbere ya metha ya kîgongoona.

¹⁷ Nîagaacoka eekîre manjî marathime mbakûrirî ya yûmba, na ekîre mûthetu kuo umîte nthî îgemarî rîa gûcemanîrua.

¹⁸ Mûthînjîri-Ngai nîakoovora njuîrî cia mûndûmûka ûcio, na acoke amwigîrîre îtega rîu njararî ciake. Mûthînjîri-Ngai nîakaanyita mbakûri îo îrî na manjî ma ûrûrû marîa maretaga kîrumi.

¹⁹ Mûthînjîri-Ngai nîagaatûma mûndûmûka ûcio anyue muma akîmwîraga atîrî, “Ethîrwa kuuma wavika ndwanegwatia gîko na njîra ya kûmenyana kîîmwîrî na mûndûmûrûme wîngî, gûtirî kîndû kîngîgûcûkia kiumanîte na manjî mama marûrû na maretaga kîrumi.

²⁰ Nwatî ethîrwa nîûgîte na meciria matarî maro ûkamenyana kîîmwîrî na mûndûmûrûme wîngî na ûkegwatia gîko,

²¹ Ngai-Mûnene arotûma ûnyitwe nî kîrumi. Arotûma ciîga ciaku cia ûciari ithire vinya na wimbe îvu.

²² Manjî mama marotonya îvurî rîaku na matûme rimbe na ciîga ciaku cia ûciari ithire vinya.” Nake mûndûmûka nîagaacokia atîrî, “Ameni, Ameni.”

²³ Mûthînjîri-Ngai nîagaacoka andîke irumi icio îvukuurî rîa gîkûnjo na acoke athambie mandîko mau na manjî mau marûrû.

²⁴ Mûndûmûka ûcio nîakaavewa manjî mau marûrû maretaga kîrumi nî mûthînjîri-Ngai anyue na nîmagaatûma egue ûrûrû mûno.

²⁵ Mûthînjîri-Ngai nîagaacoka oce îtega rîu rîa mûtu rîa mûndûmûka kuuma njararî ciake, acoke arîambararie mbere ya Ngai-Mûnene na arîvire metharî ya kîgongoona.

²⁶ Mûthînjîri-Ngai nîakaarûma mûtu ûcio na ngundi ûrî ta kîririkania Kîam wîvia na aûvîvîrie îgûrû rîa metha ya kîgongoona. Mûthiiarî nîagaatûma mûndûmûka ûcio anyue manjî mau.

²⁷ Ethîrwa mûndûmûka ûcio nîekîte ciîko cia ûtharia, nîakeegua ûrûrû mwîngî mûno. Nîakaaimba îvu na ciîga ciake cia ûciari ithire vinya, na ethîrwe arî na kîrumi gatagatîrî ka andû ao.

²⁸ Nwatî mûndûmûka ûcio angîkethîrwa atatharîtie, ndakaanyitwa nî kîrumi na nîakaagîcaga na ciana.

²⁹ Ûyû nîguo watho ûrîa ûgaatûmagîrwa rîrîa mûndûmûka agîa na meciria matarî maro na amenyane kîîmwîrî na mûndûmûrûme wîngî tiga mûthuuriwe.

³⁰ Mûndûmûka akaarûngamagua mbere ya metha ya kîgongoona nake mûthînjîri-Ngai akaruta îgongoona rîu.

³¹ Mûthuuri ndakeethagîrwa arî na mavîtia, nwatî mûka nîke ûkaaverithagua nîndû wa mavîtia make.