Ndari 36 - ÎVUKU RÎA ÛVORO MWARO

Îgai rîa aka arîa aviku

¹ Atongoria a nyomba cia mbarî ya Gileadi mûvîcî wa Makiru, mûvîcî wa Manase, Manase mûvîcî wa Josefu, nîmaathiîre na makîaria na Musa na atongoria acio engî a mîvîrîga ya andû a Isiraeli.

² Nîmaaugire atîrî, “Mwathi wetû, Ngai-Mûnene aakwathire ûgaîre andû a Isiraeli vûrûri na njîra ya kûthîra, na agîkwatha ûve erîtu a Zelofehadi ûrîa mûrwaiya îgai rîa îthe wao.

³ Nwatî mangîvikua nî arûme a mîvîrîga îngî ya andû a Isiraeli, îgai rîao rîkaauma mûvîrîgarî wetû rîthiî mîvîrîgarî îrîa maavikire. Kwoguo îgai rîetû nîrîkaanyivanyiva.

⁴ Mûthenya wa mambura ma kîririkano, îgai rîao nî rîgaataranîrua vamwe na îgai rîa mûvîrîga ûrîa erîtu acio makaavika. Kwoguo îgai rîao nîrîkaarutwa kuuma kûrî îgai rîa mûvîrîga wetû na tûtikaarînyita rîngî.”

⁵ Kwoguo Musa nîwerire andû a Isiraeli wata ûrîa aathîtwe nî Ngai-Mûnene atîrî, “Andû a mûvîrîga wa Josefu mararia ûma.

⁶ Ngai-Mûnene nîwaugire atî erîtu a Zelofehadi marî na wîyathi wa kûvikua nî mûndû wa wonthe makwenda, nwatî mavike mûvîrîgarî wao,

⁷ nîguo îgai rîa andû a Isiraeli rîtikaume kwao, rîthiî mûvîrîgarî wîngî. Mûisiraeli wa wonthe agekaraga kûrîa îgai rîa mûvîrîga wake rîrî.

⁸ Mwîrîtu wa wonthe ûkagîcaga na îgai kuuma mûvîrîgarî wa andû a Isiraeli, akaavikagua nî andû a mbarî ya mûvîrîga wa îthe nîguo Mûisiraeli wa wonthe anyitage îgai kuuma kûrî methe make ma tene.

⁹ Kwoguo gûtirî îgai rîkaauma mûvîrîgarî ûmwe rîthiî ûrîa wîngî. Wa mûvîrîga wa wonthe wa Isiraeli ûgeekaraga kûrîa îgai rîaguo rîrî.”

¹⁰ Nao erîtu a Zelofehadi nîmeekire wata ûrîa Ngai-Mûnene aathire Musa.

¹¹ Erîtu acio nî: Mahila, Tiriza, Hogila, Milika na nîmaavikirue nî aa mûrwethe.

¹² Maavikirue nî andû a nyomba ya mûvîrîga wa Manase mûvîcî wa Josefu narîo îgai rîao rîtiauma mûvîrîgarî wa îthe.

¹³ Mau nîmo Maathani na mawatho marîa Ngai-Mûnene aaveere andû a Isiraeli na njîra ya Musa marî kûndû kûrîa kwaraganu kwa Moabu mûringo wa rûnjî rwa Jorodani vakuvî na îtûûra rîa Jeriko.