Ndari 35 - ÎVUKU RÎA ÛVORO MWARO

Matûûra ma Alawi

¹ Musa arî Moabu kûndû kûrîa kwaraganu kûroranîtie na îtûûra rîa Jeriko mûringo wa rûnjî rwa Jorodani, Ngai-Mûnene nîwamwîrire atîrî,

² “Atha andû a Isiraeli magaîre Alawi matûûra ma gûtûûra kuuma vûrûrirî ûrîa maagaîrwe, na kûndû gwa kûrîthia ndîthia ciao kûthiûrûrûkîrîtie matûûra mau.

³ Matûûra mau magaatuîka ma Alawi ma gûtûûra, na kûndû kûu gwa kûrîthia gûkeethîrwa kûrî gwa kûrîthia ng'ombe ciao, na nyamû icio ciîngî cionthe ciao.

⁴ Kûndû gwa kûrîthia kûrîa kûthiûrûrûkîrîtie matûûra marîa mûkaagaîra Alawi, gûkethîrwa kûrî na ûraca wa mita magana mana ma mîrongo îtano (450) kuuma nthingorî kûthiûrûrûkîria matûûra mau.

⁵ Kwoguo kûndû kûu gwa kûrîthia gûkeethîrwa kwîganene mîena yonthe îna: mwena wa îrathîro mita magana kenda (900), mwena wa îthûîro mita magana kenda (900), mwena wa rûgûrû mita magana kenda (900) na mwena wa îveti mita magana kenda (900). Îtûûra rîkeethîrwa rîrî gatagatî ga kûndû kûu gwa kûrîthia.

⁶ Nîmûkaava Alawi matûûra manene matandatû ma kûthiî kwîthitha kûrîa mûndû angîûrîra aûragîte mûndû ûrîa wîngî atakwenda. Nîmûgaacoka mûve Alawi matûûra mengî manene mîrongo îna na maîrî.

⁷ Matûûra monthe marîa mûkaava Alawi makeethîrwa marî mîrongo îna na manana vamwe na kûndû gwa kûrîthia kûrîa kûthiûrûrûkîrîtie matûûra mau.

⁸ Mwîgana wa matûûra marîa mûkaava Alawi kuumana na kûrîa andû a Isiraeli maagaîrwe gûkaringana na ûrîa mûvîrîga wîgana. Mûvîrîga ûrîa mûnene nîûkaavecana matûûra mengî naguo mûvîrîga ûrîa mûnini ûvecane matûûra manini. Wa mûvîrîga nîûkaava Alawi matûûra kûringana na mwîgana wa vûrûri ûrîa maagaire.”

Matûûra marîa andû maaûragîra

⁹ Ngai-Mûnene nîwerire Musa atîrî,

¹⁰ “Îra andû a Isiraeli atî vîndî îrîa mûkaaringa rûnjî rwa Jorodani na mûtonye vûrûrirî wa Kanaani,

¹¹ nîmûkaathuura matûûra marîa mûndû angîthiî kwîthitha angîûraga mûndû ûrîa wîngî atakwenda.

¹² Matûûra mau nî ma kûthiî kwîthitha nîguo mûndû ûcio ûraganîte ndakaûragwe nî ûrîa ûngîenda kûrîvîrîria ûrîa ûûragîtwe, ûcio ûûraganîte atacirithîtue.

¹³ Nîmûkaavecana matûûra menyu matandatû ma kwîthitha.

¹⁴ Matûûra mathatû makeethîrwa marî mwena wa îrathîro wa rûnjî rwa Jorodani na mathatû methîrwe marî vûrûrirî wa Kanaani.

¹⁵ Matûûra mau matandatû nî ma kwîthithwa nî andû a Isiraeli, ageni arîa mûtûûranagia nao na evîtûkîri.

¹⁶ “Nwatî mûndû ûrîa ûkaaringa mûndû ûrîa wîngî na cuuma akue, mûndû ûcio nî mûragani na nwanginya wanake akaaûragwa.

¹⁷ Mûndû ûrîa ûkaaringa mûndû ûrîa wîngî na îthiga akue, mûndû ûcio nî mûragani, na nwanginya wanake akaaûragwa.

¹⁸ Kana mûndû ûrîa ûkaaringa mûndû ûrîa wîngî na mûtî akue, mûndû ûcio nî mûragani na nwanginya wanake akaaûragwa.

¹⁹ Nake mûndû ûmwe wa arîa metanîtue na mûndû ûcio ûragîtwe nîakaamûrîvîrîria na njîra ya kûraga mûndû ûcio ûraganîte.

²⁰ “Mûndû angîthîrwa arî na ûthû na ûrîa wîngî na amwîthithîre amûmunde, kana amwikie kîndû kîmûringe akue,

²¹ kana amûringe na ngundi akue, mûndû ûrîa ûringîte ûcio wîngî nî mûragani na nwanginya akaaûragwa nî mûndû ûmwe wa arîa metanîtue na mûndû ûcio ûragîtwe.

²² “Nwatî mûndû angîmunda ûrîa wîngî atakwenda na atarî na ûthû kana amwikie kîndû amûringe atamwîthithîrîte,

²³ kana, aringe mûndû na îthiga atakwenda na mûndû ûcio waringwa akue na ûcio wamûringa ethîrwe atarî nthû yake,

²⁴ andû onthe nîmagaatua ciira gatagatî ka mûragani na mûrîvîrîria kûringana na mawatho mau.

²⁵ Andû nîmagaatethûra mûndû ûcio ûraganîte atakwenda kuuma kûrî mûndû ûrîa wîtanîtue na mûndû ûcio ûragîtwe. Andû nîmagaacokia mûndû ûcio ûraganîte atakwenda îtûûrarî rîa kwîthitha, kûrîa aarî mbere. Mûndû ûcio ageekara îtûûrarî rîu nginya rîrîa Mûthînjîri-Ngai mûnene ûrîa wathuurîtwe na njîra ya kûvakwa maguta mamûre agaakua.

²⁶ Nwatî mûndû ûcio ûraganîte angîkaauma îtûûra rîu rîa kwîthitha,

²⁷ nake mûndû ûrîa metanîtue na mûndû ûrîa ûragîtwe oone ûcio ûraganîte arî vau nja ya mûvaka wa îtûûra rîu rîa kwîthitha na acoke amûrage, ke akeethîrwa atekîte wîvia wa kûragana.

²⁸ Mûndû ûcio ûraganîte nwanginya ekare îtûûrarî rîa kwîthitha nginya rîrîa mûthînjîri-Ngai ûrîa mûnene agakua; nwatî rîrîa mûthînjîri-Ngai ûcio mûnene agaakua, mûndû ûcio ûraganîte nwa acoke mûciî.

²⁹ Mawatho mama nîmatûûra marûmagîrîrwa nî njiarwa cienyu cionthe kûrîa kuonthe mûgaatûûra.

³⁰ “Mûndû wa wonthe ûkaaûraga mûndû wîngî nîagaatuîrwa kûragwa ethîrwa aira aîrî kûthiî na mbere nîmakaaruta ûira wa kwonania atî nîaûraganîte. Ûira wa mûndû ûmwe tî mwîganu nîguo mûndû atuîrwe atî nîaûraganîte.

³¹ Mûndû wa wonthe ûkaaûragana na vinya nwanginya akaaûragwa. Gûtirî îrîvi rîngîrutwa nîûndû wa wîvia ta ûcio.

³² Mûtigetîkîre îrîvi kuuma kûrî mûndû ûthiîte îtûûrarî rîa kwîthitha atî nîguo acoke mûciî mbere ya mûthînjîri-Ngai mûnene akue.

³³ Mûtigacûkangie vûrûri ûrîa mûtûûraga na njîra ya kûragana, nîûndû nthakame ya mûndû aûragîtwe nîcûkagia vûrûri. Gûtirî njîra îngî ya kûtheria vûrûri kuumana na wîvia ûcio tiga kûraga mûndû ûcio ûraganîte.

³⁴ Mûtigatûme vûrûri ûrîa mûtûûraga ûgîe gîko kûrîa wananie ndûûraga, nîûndû Nie Ngai-Mûnene ndûûranagia na andû a Isiraeli.”