Ndari 34 - ÎVUKU RÎA ÛVORO MWARO

Mîvaka ya vûrûri

¹ Ngai-Mûnene nîwerire Musa

² ere andû a Isiraeli atîrî, “Rîrîa mûgaatonya Kanaani vûrûri ûrîa ngaamûva ûtuîke wenyu, mîvaka yakuo îkethîrwa îvana ta û:

³ Mûvaka wenyu wa mwena wa îveti ûkeethîrwa umîte werûrî wa Zini ûvîtûkîrîrîte mwena wa Edomu. Ûkaambîrîria mwena wa îrathîro wa îria rîa Cumbî rîrîa rîrî mwena wa îveti.

⁴ Mûvaka ûcio nîûkaanyûrûrûka mwena wa îveti ûkinye mwanyarî wa Akirabimu ûvîtûkîrîrîte Zini mwena wa îveti nginya Kadeshi-barinea. Mûvaka ûcio nîûgacoka ûvîtûkîrîre Hazari-adari nginya Azimoni.

⁵ Nîûgaacoka ume Azimoni ûthiîrîrîte karûnjîrî ka Misiri, na ûkathirîra îriarî rîa Mediterania.

⁶ “Mûvaka wenyu wa mwena wa îthûîro ûkeethîrwa ûrî îria rîa Mediterania.

⁷ “Mûvaka wenyu wa mwena wa rûgûrû ûkeethîrwa umîte îriarî rîa Mediterania ûthiîte nginya kîrîmarî Kîam Hori.

⁸ Kuuma kîrîmarî Kîam Hori nîûkaathiî ûvîtûkîrîrîte mwanyarî wa Hamathi nginya Zedadi,

⁹ na ûvîtûkîrîre Zifuroni na ûthirîre Hazari-enani.

¹⁰ “Mûvaka wenyu wa mwena wa îrathîro ûkaauma Hazari-enani nginya Shefamu.

¹¹ Kuuma Shefamu ûkaanyûrûrûka nginya Ribula, mwena wa îrathîro wa Aini. Kuuma vau nîûkaanyûrûrûka ûthiîte tûrîmarî tûrîa tûrî mwena wa îrathîro rîa îria rîa Galili.

¹² Mûvaka ûcio nîûgacoka ûnyûrûrûke ûrûmîrîrîte rûnjî rwa Jorodani nginya îriarî rîa Cumbî. Îo nîo îkethîrwa îrî mîvaka ya vûrûri wenyu.”

¹³ Kwoguo Musa nîwerire andû a Isiraeli atîrî, “Ûyû nîguo vûrûri ûrîa mûkagaana na njîra ya gwikia mîtî, na nîguo Ngai-Mûnene aaveere mîvîrîga kenda na nuthu.

¹⁴ Mîvîrîga ya Reubeni, Gadi na nuthu ya mûvîrîga wa Manase nîmarîkîtie kûnyita îgai rîao na makagaana kûringana na mbarî ciao.

¹⁵ Mîvîrîga îo îîrî na nuthu yagaîrwe vûrûri ûrîa ûrî mwena wa îrathîro wa rûnjî rwa Jorodani ûroretie îtûûra rîa Jeriko.”

Atongoria arîa maagaanagia vûrûri

¹⁶ Ngai-Mûnene nîwerire Musa atîrî,

¹⁷ “Mûthînjîri-Ngai Eliazaru, na Joshua mûvîcî wa Nuni nîo makaagaanîria andû vûrûri.

¹⁸ Nîûgoca mûtongoria ûmwe kuuma kûrî wa mûvîrîga nîguo amatethererie kûgaania vûrûri.”

¹⁹ Aya nîo atongoria arîa maathuurirwe: Mûvîrîga wa Juda kwathuurirwe Karebu mûvîcî wa Jefune.

²⁰ Mûvîrîgarî wa Simeoni kwathuurirwe Shelumieli mûvîcî wa Amihudi.

²¹ Mûvîrîgarî wa Benjamini, kwathuurirwe Elidadi mûvîcî wa Kisiloni.

²² Mûvîrîgarî wa Dani, kwathuurirwe Buki mûvîcî wa Jogili.

²³ Mûvîrîgarî wa Manase, mûvîcî wa Josefu kwathuurirwe Hanieli mûvîcî wa Efodi.

²⁴ Mûvîrîgarî wa Efiraimu kwathuurirwe Kemueli mûvîcî wa Shifutani.

²⁵ Mûvîrîgarî wa Zebuluni, kwathuurirwe Elizafani mûvîcî wa Parinaki.

²⁶ Mûvîrîgarî wa Isakaru, kwathuurirwe Palitieli mûvîcî wa Azani.

²⁷ Mûvîrîgarî wa Asheri, kwathuurirwe Ahihudi mûvîcî wa Shelomi.

²⁸ Mûvîrîgarî wa Nafutali, kwathuurirwe Pedaheli mûvîcî wa Amihudi.

²⁹ Acio nîo atongoria arîa Ngai-Mûnene aathire magaîre andû a Isiraeli vûrûri wa Kanaani na ûtonga waguo ûtuîke wao.