Ndari 31 - ÎVUKU RÎA ÛVORO MWARO

Ngai-Mûnene nîwerire Aisiraeli makarûe na Amidiani

¹ Ngai-Mûnene nîwerire Musa atîrî,

² “Rîvîrîria andû a Isiraeli kûrî andû a Midiani nîûndû wa maûndû macûku marîa maamekire. Vuva wa ûguo nî ûgaacoka ûkue.”

³ Kwoguo Musa nîwerire andû atîrî, “Varîriani andû a mbaara nîguo makatharîkîre Amidiani na mamaverithie nîûndû wa ûrîa meekire Ngai-Mûnene.

⁴ Tûma arûme ngiri îmwe kuuma kûrî wa mûvîrîga wa andû a Isiraeli a kûthiî mbaararî.”

⁵ Kwoguo arûme ngiri îkûmi na igîrî nîmaathuurirwe kuuma kûrî mîvîrîga îkûmi na îîrî ya andû a Isiraeli, na onthe nîmeevarîrie kûthiî mbaararî.

⁶ Musa nîwatûmire arûme acio mbaararî. Nao maatongoretue nî Finehasi mûvîcî wa Eliazaru mûthînjîri-Ngai. Finehasi athiîre akuuîte indo cia Vandû Varîa Vatheru vamwe na tûrumbeta twa kûvuva nîûndû wa mbaara.

⁷ Nao nîmaatharîkîre Amidiani wata ûrîa Ngai-Mûnene aathîte Musa, na makîûraga arûme onthe,

⁸ vamwe na athamaki atano a Midiani: Evi, Rekemu, Zuri, Huri na Reba. Nîmaacokire makîûraga Balaamu mûvîcî wa Beori.

⁹ Andû a Isiraeli nîmaatavire aka a Midiani na ciana ciao, ndîthia ciao cia ng'ombe na mbûri, na magîoca ûtonga wao wonthe.

¹⁰ Nîmaavîvirie matûûra na icagi ciao cionthe.

¹¹ Nîmaathiîre na indo cionthe irîa maatavîte, andû wana ndîthia,

¹² na makîivira kûrî Musa na Eliazaru, mûthînjîri-Ngai, na andû onthe a Isiraeli kûrîa maambîte magema vûrûrirî ûrîa mwaraganu wa Moabu, mûringo wa Jorodani vakuvî na Jeriko.

Gûcoka kuuma mbaararî

¹³ Musa, mûthînjîri-Ngai Eliazaru na atongoria onthe a andû a Isiraeli nîmaaumire kûrîa maambîte magema na makîthiî gûtûnga athigari a mbaara.

¹⁴ Musa nîwarakarirue nî anene a athigari a mbaara arîa maarûngamîrîrîte ikundi cia athigari ngiri, na ikundi cia athigari magana arîa maacokire kuuma mbaararî.

¹⁵ Musa nîwamaûririe atîrî, “Mwaregire kûûraga aka aya onthe nîkî?

¹⁶ Ririkanani atî aka nîo maathikîrîrie ûtaaro wa Balaamu na magîtûma andû a Isiraeli maregana na Ngai-Mûnene marî Peori. Ûndû ûcio nîguo watûmire andû a Ngai-Mûnene mathirua nî mîrimû mîcûku.

¹⁷ Kwoguo ûragani twana tuonthe twa tûvîcî na aka onthe arîa maanamenyana kîîmwîrî na mûndûmûrûme.

¹⁸ Nwatî mwîtigîrie erîtu onthe arîa mataanamenyana kîîmwîrî na mûndûmûrûme.

¹⁹ Muonthe arîa mûragîte mûndû kana mûvutîtie kimba nwanginya mwîkare nja ya kûrîa mwambîte magema îvinda rîa mîthenya mûgwanja. Mûthenya wa kathatû na mûthenya wa mûgwanja, mwîtherie vamwe na aka arîa mûtavîte.

²⁰ Nwanginya mûtherie nguo cionthe, kîndû kîonthe kîrûthîtwe na rûûo, guoya wa ng'ondu kana mûtî.”

²¹ Eliazaru, mûthînjîri-Ngai nîwerire arûme onthe arîa maacokete kuuma mbaararî atîrî, “Mama nîmo mawatho marîa Ngai-Mûnene avete Musa.

²² Indo ta: thaavu, sîlûva, gîcango, cuuma, îvati, na cuuma ya mvûrûvûrû,

²³ nî indo cionthe irîa itangîvîvua nî mwaki nacio nîikaavîtûkîrîrua mwakirî nîguo itherue. Kûnarî ûguo nwanginya ivîtûkîrîrue manjîrî ma kûitheria. Nacio indo icio ciîngî cionthe irîa ivîcaga nî mwaki nîikaavîtûkîrîrua manjîrî ma kûitheria.

²⁴ Mûthenya wa mûgwanja nwanginya mûkaathambia nguo cienyu; na vîndî îo mûkethîrwa mûrî atheru na nîmûgetîkîrua gûtonya kûrîa andû mambîte magema.”

Kûgaana andû na indo irîa ciatavirwe

²⁵ Ngai-Mûnene nîwerire Musa atîrî,

²⁶ “We, Eliazaru, mûthînjîri-Ngai na atongoria a mîvîrîga ya andû a Isiraeli, tarani indo cionthe, andû, na nyamû cionthe irîa mûtavîte.

²⁷ Gaaniani indo icio mûtavîte maita maîrî. Gîcunjî kîmwe kîthiî na athigari a mbaara, nakîo kîu kîngî kîthiî na andû acio engî onthe.

²⁸ Kuuma kûrî gîcunjî Kîam athigari mûrute mûndû ûmwe kuuma kûrî wa andû magana matano arîa matavîtwe, na mwîgana wata ûcio kuuma kûrî ng'ombe, mvunda, ng'ondu na mbûri, nîguo mûrute irî gooti ya Ngai-Mûnene.

²⁹ Nengerani Eliazaru, mûthînjîri-Ngai indo icio irî îtega rîa mwanya kûrî Ngai-Mûnene.

³⁰ Kuuma kûrî gîcunjî kîrîa Kîamveerwe andû arîa engî, ocani mûndû ûmwe kuuma kûrî wa andû mîrongo îtano arîa matavîtwe, na gîcunjî wata kîu kuuma kûrî ng'ombe, mvunda, ng'ondu na mbûri, mûinenganîre kûrî Alawi arîa mamenyagîrîra îgema rîa Ngai-Mûnene.”

³¹ Musa na Eliazaru, mûthînjîri-Ngai nîmeekire ûrîa maathirwe nî Ngai-Mûnene.

³² Indo irîa ciatigarire athigari marîkia gwoca ciao nî: mbûri na ng'ondu ngiri magana matandatû ma mîrongo mûgwanja na ithano (675,000),

³³ ng'ombe ngiri mîrongo mûgwanja na igîrî (72,000),

³⁴ mvunda ngiri mîrongo îtandatû na îmwe (61,000);

³⁵ na erîtu ngiri mîrongo îthatû na igîrî (32,000) arîa mataanamenyana kîîmwîrî na arûme.

³⁶ Nuthu ya indo irîa ciagaîrwe athigari arîa maathiîte mbaararî nî: ng'ondu, na mbûri ngiri magana mathatû ma mîrongo îthatû na mûgwanja na magana matano (337,500).

³⁷ Gîcunjî Kîam gooti ya Ngai-Mûnene gîa cio Kîamrî Kîam ng'ondu na mbûri magana matandatû ma mîrongo mûgwanja na ithano (675).

³⁸ Ndegwa ciarî ngiri mîrongo îthatû na ithathatû (36,000). Nayo gooti ya Ngai-Mûnene yacio yarî ndegwa mîrongo mûgwanja na igîrî (72).

³⁹ Mvunda ciarî ngiri mîrongo îthatû na magana matano (30,500), na mvunda mîrongo îtandatû na îmwe (61) ciacio yarî gooti ya Ngai-Mûnene.

⁴⁰ Andû maarî ngiri îkûmi na ithathatû (16,000), na andû mîrongo îthatû na aîrî (32) ao maarî gooti ya Ngai-Mûnene.

⁴¹ Musa nîwanenganîre gooti îrîa yarutîtwe îrî îtega rîa Ngai-Mûnene kûrî Eliazaru, mûthînjîri-Ngai wata ûrîa Ngai-Mûnene aathanîte.

⁴² Musa nîwagaanirie indo na andû arîa maatavîtwe maita maîrî. Nuthu ya indo na ya andû yanengerwe andû a Isiraeli, nayo nuthu îo îngî yanengerwe athigari.

⁴³ Andû maanengerwe ng'ondu na mbûri magana mathatû ma mîrongo îthatû na mûgwanja na magana matano (337,500),

⁴⁴ ng'ombe ngiri mîrongo îthatû na ithathatû (36,000).

⁴⁵ Mvunda ngiri mîrongo îthatû na magana matano (30,500)

⁴⁶ na andû ngiri îkûmi na ithathatû (16,000),

⁴⁷ Musa nîwocire nyamû îmwe na mûndû ûmwe kuuma kûrî wa nyamû mîrongo îtano na andû mîrongo îtano arîa maatavîtwe kuuma kûrî gîcunjî kîrîa Kîamgaîrîtwe andû a Isiraeli na akîva Alawi arîa maamenyagîrîra îgema rîa Ngai-Mûnene. Ûguo nîguo Ngai-Mûnene aathîte Musa eke.

⁴⁸ Anene arîa maatongoragia athigari a mbaara nîmaathiîre kûrî Musa

⁴⁹ na makîmwîra atîrî, “Mwathi wetû, tue ndungata ciaku nîtwatara athigari arîa marî rungu rwetû na twona atî gûtirî wanarî ûmwe ûtarî vo.

⁵⁰ Kwoguo nîtûretete matega ma indo cia thaavu ta mbete, mîkathî, mvang'iri, mindo, na ciûma irîa wa ûmwe wa cietû ocete. Tûiretete kûrî Ngai-Mûnene nîguo atûtherie mevia metû.

⁵¹ Musa na Eliazaru, mûthînjîri-Ngai nîmoocire indo icio cionthe ciarutîtwe cia thaavu.

⁵² Thaavu yonthe îrîa yarutirwe nî anene acio makîvirîra Ngai-Mûnene yarî vakuvî kilo magana maîrî.

⁵³ Athigari arîa mataarî anene nîmeigîre wa mûndû kîrîa aatavîte.

⁵⁴ Kwoguo Musa na Eliazaru, mûthînjîri-Ngai nîmaamûkîre thaavu îo kuuma kûrî anene a athigari, na makîmîvira îgemarî rîa Ngai-Mûnene, nîguo îtuîke kîririkano Kîam andû a Isiraeli kûrî Ngai-Mûnene.”