Ndari 30 - ÎVUKU RÎA ÛVORO MWARO

Mawatho megiî mevîta

¹ Musa nîwerire atongoria a mîvîrîga ya andû a Isiraeli atî Ngai-Mûnene augîte atîrî,

² “Rîrîa mûndû evîta mbere ya Ngai-Mûnene, kana eranîra na mwîvîtwa atî nîakûvingia ûndû, nwanginya avingie ûrîa eranîrîte atî nîageka.

³ “Rîrîa mwîrîtu ûtarî mûviku eranîra ûndû kûrî Ngai-Mûnene na evîta atî nwanginya avingie ûndû ûcio,

⁴ na îthe egue na etîkanie na mwîvîtwa na ciîranîro ciake mwîrîtu ûcio nîakaavingia mwîvîtwa na ciîranîro ciake.

⁵ Nwatî rîrîa îthe akeegua maûndû mau mwarî eranîrîte na aregane namo, mwîvîtwa ûcio nîûkaathira na Ngai-Mûnene nî akaamûrekera, nîûndû îthe nîwareganire na mwîvîtwa na ciîranîro cia mwarî.

⁶ “Mwîrîtu angîîvîta kana eranîre ûndû atambîte gwîciiria waro acoke avike,

⁷ nake mûthuuri wake acoke egue ûvoro ûcio akînakira, mwîrîtu ûcio nwanginya avingie mwîvîtwa na ciîranîro icio.

⁸ Nwatî mûthuuri wake angîgua ûvoro wîgiî mwîvîtwa ûcio na aregane naguo, mwîvîtwa nîûkaathira na Ngai-Mûnene nîakaarekera mwîrîtu ûcio.

⁹ “Nwatî mwîvîtwa kana kîîranîro wa kîonthe Kîam mûka wa ndigwa kana mûndûmûka ûtiganîte na mûrûme ndûthiraga.

¹⁰ Mûndûmûka wa wonthe angîvîta kana eranîre ûndû arî kwa mûthuuriwe,

¹¹ na mûthuuriwe egue ûndû ûcio, angîkira arega kuga ûndû, nwanginya mûndûmûka ûcio akaavingia maûndû mau monthe evîtîte na akeranîra.

¹² Nwatî mûthuuriwe angîgua mwîvîtwa na ciîranîro icio mûka eranîrîte akînaregana nacio, mwîvîtwa ûcio nîûthiraga na Ngai-Mûnene nîakaamûrekera nîûndû mûthuuriwe nîareganîte na mwîvîtwa ûcio.

¹³ Mûthuuri ethagîrwa arî na ûvoti wa kûregana kana wa gwîtîkîra ûndû ûrîa mûka eranîrîte kûrî Ngai-Mûnene.

¹⁴ Nwatî mûthuuriwe angîrega kwîra mûka wanarî ûndû mûthenya mûgima kuuma egua mwîvîtwa na kîîranîro Kîam mûka, nwanginya mûka akaavingia maûndû monthe marîa evîtîte kana akeranîra. Gûkira kwa mûthuuriwe kwonanagia atî nî mwîtîkaniu na maûndû marîa mûka eranîrîte.

¹⁵ Nwatî mûthuuriwe angîthiria mîthenya acoke ericûkwe na aregane na maûndû mau mûka eranîrîte, mûthuuri nîke ûkaaûrua maûndû mau.”

¹⁶ Mau nîmo mawatho marîa Ngai-Mûnene aaveere Musa megiî athuuri na aka ao na megiî mwîrîtu atarî mûviku arî kwa îthe, na megiî îthe.