Ndari 3 - ÎVUKU RÎA ÛVORO MWARO

Avîcî a Aroni

¹ Ino nîcio njiarwa cia Aroni na Musa îvindarî rîrîa Ngai-Mûnene aarîrie Musa arî Kîrîmarî gîa Sinai.

² Avîcî a Aroni maarî: Nadabu ûrîa warî îrikithathi, Abihu, Eliazaru, na Ithamaru.

³ Nao nîmeetîrîrue maguta na makîamûrwa nîguo matungatage marî athînjîri-Ngai.

⁴ Nwatî Nadabu na Abihu nîmaakwire nîûndû wa gûtegera Ngai-Mûnene mwaki ûtarî mûtheru kûu werûrî wa Sinai. Nadabu na Abihu matiarî na ciana. Kwoguo Eliazaru na Ithamaru nîmaatungatire marî athînjîri-Ngai ûtûûrorî wonthe wa îthe Aroni.

Wîra wa Alawi

⁵ Ngai-Mûnene nîwerire Musa atîrî,

⁶ “Virani andû a mûvîrîga wa Lawi kûrî mûthînjîri-Ngai Aroni nîguo makamûtethagîrîrie.

⁷ Andû acio makaarutaga wîra vandûrî va Aroni na va andû onthe marî îgemarî rîa Ngai-Mûnene na marî vandû varîa vatheru Mûno.

⁸ Nîo makaamenyagîrîra indo cionthe cia îgema rîa Ngai-Mûnene na marutage mawîra vandûrî va andû a Isiraeli rîrîa magûtungata marî vandû varîa vatheru Mûno.

⁹ Alawi mathuurîtwe kuuma kûrî andû a Isiraeli nîguo matethagîrîrie Aroni na avîcî ake gûtungataga.

¹⁰ Nî ûkathuura Aroni na avîcî ake matuîke athînjîri-Ngai, nwatî mûndû wîngî wa wonthe ûkaageria kûruta wîra ûcio, nîakaaûragwa.”

¹¹ Ngai-Mûnene nîwerire Musa atîrî,

¹² “Nînyamûrîte Alawi kuuma kûrî andû a Isiraeli îthenya rîa marikithathi monthe ma andû a Isiraeli methagîrwe marî akwa. Anake onthe marikithathi ma Alawi nî akwa,

¹³ nîûndû marikithathi monthe nî makwa. Vîndî îrîa naaûragire marikithathi monthe ma Misiri, nînaamûrire marikithathi monthe ma andû na ma nyamû ma andû a Isiraeli matuîke makwa. Nie nînie Ngai-Mûnene.”

Gûtara Alawi

¹⁴ Musa arî werûrî wa Sinai nîwathirwe nî Ngai-Mûnene

¹⁵ atare Alawi na amandîke wa mûndû kûringana na mûvîrîga wake na nyomba yake, kwambîrîria kaana ga kavîcî ga ûkûrû wa mweri ûmwe kûthiî na mbere.

¹⁶ Kwoguo Musa nîwatarire andû wata ûrîa Ngai-Mûnene aamwathire.

¹⁷ Avîcî a Lawi maarî: Gerishoni, Kohathu na Merari.

¹⁸ Avîcî a Gerishoni maarî Libuni na Shimei.

¹⁹ Avîcî a Kohathu maarî Amuramu, Iziharu, Heburoni na Uzieli.

²⁰ Nao avîcî a Merari maarî Mahili na Mushi. Icio nîcio mbarî cia Alawi kûringana na mûvîrîga wao.

²¹ Mbarî ya Gerishoni yarûthîtwe nî nyomba ya Libuni na ya Shimei.

²² Arûme onthe arîa maarî na ûkûrû wa kwambîrîria mweri ûmwe na makîria maarî ngiri mûgwanja na magana matano (7,500).

²³ Mbarî ya Gerishoni yagîrîrwe nî kwamba magema mao mwena wa îthûîro vuva wa îgema rîa gûcemanîrua.

²⁴ Eliasafu mûvîcî wa Laeli nîke warî mûtongoria wa mbarî îo.

²⁵ Avîcî a Gerishoni nîo maamenyagîrîra îgema rîa gûcemanîrua, vandû varîa vatheru mûno na gîtambaa gîa kûvakunîkîra, na gîtambaa Kîam mûromo wa îgema rîa Ngai-Mûnene,

²⁶ kûmenyerera itambaa cia kîvaro kîrîa kîthiûrûrûkîrîtie îgema rîa gûcemanîrua na metha ya kîgongoona, na gîtambaa Kîam mûromo wa kîvaro. Acio nîo moonaga atî indo icio nîciaruta wîra wonthe wacio.

²⁷ Mbarî ya Kohathu yarûthîtwe nî nyomba ya Amuramu, Iziharu, Heburoni, na nyomba ya Uzieli.

²⁸ Arûme onthe arîa maarî na ûkûrû wa kuuma mweri ûmwe na kûthiî na mbere maarî ngiri inyanya na magana matandatû (8,600).

²⁹ Andû a mbarî ya Kohathu maambire magema mao mwena wa îveti wa îgema rîa gûcemanîrua.

³⁰ Elizafani mûvîcî wa Uzieli nîke warî mûtongoria wa andû a mbarî ya Kohathu.

³¹ Wîra wao warî wa kûmenyerera îthandûkû rîa kîrîkanîro, metha, vandû va kwigîrîrwa taa, metha cia magongoona, indo cia vandû varîa vamûre irîa itûmagîrwa nî athînjîri-Ngai magîtungata, na gîtambaa gîa kûgaania vandû varîa vatheru Mûno. Acio nîo moonaga atî indo icio nîciaruta wîra wonthe wacio.

³² Eliazaru mûvîcî wa mûthînjîri-Ngai Aroni nîke warî mûnene wa atongoria a Alawi, na mûrûngamîrîri andû arîa maarutaga wîra Vandû varîa Vatheru.

³³ Mbarî ya Merari yarûthîtwe nî nyomba ya Mahali na Mushi.

³⁴ Arûme onthe arîa maarî na ûkûrû wa kuuma mweri ûmwe kûthiî na mbere maarî ngiri mîrongo kenda na ithathatû na magana maîrî (96,200).

³⁵ Andû a mbarî ya Merari maambire magema mao mwena wa rûgûrû wa îgema rîa gûcemanîrua. Mûtongoria wao aarî Zurieli mûvîcî wa Abihaili.

³⁶ Wîra wao warî wa kûmenyerera mbaû cia îgema rîa gûcemanîrua, mîgamba, itugî, itina cia îgema na indo cionthe cia kûnyitithania îgema. Acio nîo moonaga atî indo icio nîciaruta wîra wonthe wacio.

³⁷ Andû acio nwao maamenyagîrîra itugî irîa ciathiûrûrûkîrîtie kîvaro, itina ciacio, nthugî cia îgema na mîkanda yacio.

³⁸ Musa, Aroni na avîcî ake maambire magema mao mwena wa îrathîro wa îgema rîa Ngai-Mûnene. Wîra wao warî wa gûtungata Vandû varîa Vatheru vandûrî va andû a Isiraeli, na mûndû wîngî wa wonthe ûngîageririe kûruta wîra ûcio nîkwa angîaûragirwe.

³⁹ Kwoguo Musa na Aroni nîmeekire ûrîa maathîtwe nî Ngai-Mûnene. Arûme onthe Alawi arîa maatarirwe marî na ûkûrû wa kuuma mweri ûmwe kûthiî na mbere maarî ngiri mîrongo îîrî na igîrî (22,000).

Alawi nîmoocire vandû va marikithathi ma anake

⁴⁰ Ngai-Mûnene nîwerire Musa atîrî, “Ndarîra na ûmandîkîre marîîtwa ma marikithathi monthe ma anake a Isiraeli arîa marî na ûkûrû wa mweri ûmwe na makîria.

⁴¹ Îthenya rîa marikithathi mau monthe ma andû a Isiraeli, amûra Alawi matuîke akwa! Nie nînie Ngai-Mûnene! Wanayo ndîthia ya Alawi, mîamûre îthenya rîa marikithathi monthe ma ndîthia ya andû a Isiraeli.”

⁴² Kwoguo Musa nîwatarire marikithathi monthe ma arûme ma andû a Isiraeli wata ûrîa Ngai-Mûnene aamwathire.

⁴³ Namo marikithathi monthe ma arûme arîa maarî na ûkûrû wa mweri ûmwe kûthiî na mbere maarî ngiri mîrongo îîrî na igîrî na magana maîrî ma mîrongo mûgwanja na ithatû (22,273).

⁴⁴ Ngai-Mûnene nîwerire Musa atîrî,

⁴⁵ “Îthenya rîa marikithathi monthe ma arûme a Isiraeli nyamûrîra Alawi matuîke akwa. Na îthenya rîa marikithathi ma ndîthia ya andû a Isiraeli nyamûrîra marikithathi ma ndîthia ya Alawi.

⁴⁶ Nîûndû marikithathi ma andû a Isiraeli nî eengî kûrî Alawi na makîria ya andû magana maîrî ma mîrongo mûgwanja na athatû (273), nwanginya ûkûûre andû acio marî îgûrû.

⁴⁷ Ûgaakûûra wa mûndû na tûcunjî tûtano twa sîlûva kûringana na kîthimi kîrîa gîtîkîrîku,

⁴⁸ na ûnengere Aroni na avîcî ake sîlûva icio.”

⁴⁹ Kwoguo Musa nîwathîkire na akîûngania sîlûva icio cia gûkûûra andû acio kuuma kûrî arîa maarî makîria ya arîa maakûûrirwe nî Alawi.

⁵⁰ Nîwaûnganirie kuuma kûrî marikithathi ma andû a Isiraeli sîlûva ngiri îmwe na magana mathatû ma mîrongo îtandatû na ithano (1,365) kûringana na kîthimi kîrîa gîtîkîrîku,

⁵¹ na akîinenganîra kûrî Aroni na avîcî ake wata ûrîa Ngai-Mûnene aamwathire.