Ndari 29 - ÎVUKU RÎA ÛVORO MWARO

Matega ma kîrugo kîa mwaka mûcerû

¹ “Mûthenya wa mbere wa mweri wa mûgwanja, mûgaacemanagia vamwe nîguo mûgooce Ngai-Mûnene. Mûthenya ûcio mûtikarute wîra. Ûcio nî mûthenya wa kûvuva tûrumbeta.

² Mûkaarutagîra Ngai-Mûnene matega ma kûvîvua marî na mûtararûko mwaro ma ndegwa îmwe îtarî ngûrû, ndûrûme îmwe, na tûtûrûme mûgwanja tûrî na ûkûrû wa mwaka ûmwe. Cionthe ciîthagîrwe itarî na wonje.

³ Mûkaarutaga matega ma irio cia mûgûnda ma mûtu ûtukanîtue na maguta ma ndamaiyû: kilo ithatû cia mûtu kûrî wa ndegwa îmwe, kilo igîrî kûrî wa ndûrûme,

⁴ na kilo îmwe kûrî wa gatûrûme.

⁵ Mûcoke mûrute nthenge îmwe îrî îtega rîa kûtheria mevia menyu.

⁶ Mûkaarutaga indo ino vamwe na irîa irutagwa irî matega ma kûvîvua ma mûthenya wa mbere wa mweri, matega ma kûvîvua ma wa mûthenya wa mûthenya marî vamwe na matega ma cio ma irio cia mûgûnda, na îtega rîa cio rîa indo cia kûnyuwa. Matega mama marî mûtararûko mwaro ûkenagia Ngai-Mûnene.

Matega ma mûthenya wa kûtherua mevia

⁷ “Mûthenya wa îkûmi wa mweri wa mûgwanja mûgacemanagia nîguo mûgooce Ngai. Mûthenya ûyû nwanginya mwînyerekagie na mûtikarutage wîra.

⁸ Mûkaarutaga matega ma kûvîvua kûrî Ngai-Mûnene marî na mûtararûko mwaro ma: ndegwa îmwe îtarî ngûrû, ndûrûme îmwe na tûtûrûme mûgwanja tûrî na ûkûrû wa mwaka ûmwe, na cionthe ciîthîrwe itarî na wonje.

⁹ Rutagani matega ma cio ma irio cia mûgûnda ma mûtu ûtukanîtue na maguta ma ndamaiyû: kilo ithatû cia mûtu kûrî wa ndegwa, kilo igîrî kûrî ndûrûme

¹⁰ na kilo îmwe kûrî wa gatûrûme.

¹¹ Mûcoke mûrute nthenge îmwe îrî îtega rîa kûtheria mevia. Îtega rîîrî rîkaarutanagîrua vamwe na îtega rîa kûtheria mevia menyu, îtega rîa kûvîvua rîa wa mûthenya vamwe matega ma cio ma irio cia mûgûnda, na matega ma cio ma indo cia kûnyuwa.

Matega ma kîrugo gîa tûnyomba

¹² “Mûthenya wa îkûmi na îtano wa mweri wa mûgwanja, mûgacemanagia nîguo mûgooce Ngai. Mûgaakûngûagîra kîrugo gîa tûnyomba nîûndû wa Ngai-Mûnene îvinda rîa mîthenya mûgwanja mûtakûruta wîra.

¹³ Mûkaarutaga îtega rîa kûvîvua kûrî Ngai-Mûnene rîrî na mûtararûko mwaro rîa: ndegwa îkûmi na ithatû itarî ngûrû, ndûrûme igîrî, tûtûrûme îkûmi na tûna twa ûkûrû wa mwaka ûmwe, na cionthe ciîthagîrwe itarî na wonje.

¹⁴ Rutaga matega ma cio ma irio cia mûgûnda marîa magîrîrîte ma mûtu ûtukanîtue na maguta ma ndamaiyû: kilo ithatû cia mûtu kûrî wa ndegwa îmwe, kilo igîrî kûrî wa ndûrûme,

¹⁵ na kilo îmwe kûrî wa gatûrûme.

¹⁶ Mûkarutaga nthenge îmwe îrî îtega rîa kûtheria mevia. Îtega rîrî rîkaarutanagîrua vamwe na îtega rîa kûvîvua rîa wa mûthenya, na îtega rîarîo rîa irio cia mûgûnda na îtega rîa rîo rîa indo cia kûnyuwa.

¹⁷ “Mûthenya wa kaîrî, mûrutage ndegwa igîrî, ndûrûme igîrî, na tûtûrûme îkûmi na tûna twa ûkûrû wa mwaka ûmwe, na cionthe ciîthagîrwe itarî na wonje.

¹⁸ Mûkaarutaga îtega rîa irio cia mûgûnda na îtega rîa indo cia kûnyuwa kûrî ndegwa, ndûrûme, na tûtûrûme wata ûrîa watho ugîte.

¹⁹ Vamwe na îtega rîa kûvîvua rîa wa mûthenya, îtega rîa rîo rîa irio cia mûgûnda, na matega ma rîo ma indo cia kûnyuwa mûkaarutaga nthenge îmwe ya îtega rîa kûtheria mevia.

²⁰ “Mûthenya wa kathatû mûkaarutaga ndegwa îkûmi na îmwe itarî ngûrû, ndûrûme igîrî, tûtûrûme îkûmi na tûna twa ûkûrû wa mwaka ûmwe, na cionthe ciîthagîrwe itarî na wonje.

²¹ Mûkaarutaga îtega rîa irio cia mûgûnda na matega ma indo cia kûnyuwa kûrî ndegwa, ndûrûme, na tûtûrûme wata ûrîa watho ugîte.

²² Vamwe na îtega rîa kûvîvua rîa wa mûthenya, na îtega rîa rîo rîa irio cia mûgûnda na îtega rîa rîo rîa indo cia kûnyuwa mûkaarutaga nthenge îmwe ya îtega rîa kûtheria mevia.

²³ “Mûthenya wa kana, mûkaarutaga ndegwa îkûmi itarî ngûrû, ndûrûme igîrî, na tûtûrûme îkûmi na twîrî twa ûkûrû wa mwaka ûmwe, na cionthe ciîthagîrwe itarî na wonje.

²⁴ Mûkaarutaga îtega rîa irio cia mûgûnda, matega ma indo cia kûnyuwa kûrî ndegwa, ndûrûme, na tûtûrûme wata ûrîa watho ugîte.

²⁵ Vamwe na îtega rîa kûvîvua rîa wa mûthenya, na îtega rîa irio cia mûgûnda, na îtega rîa rîo rîa indo cia kûnyuwa, mûkaarutaga nthenge îmwe ya îtega rîa kûtheria mevia.

²⁶ “Mûthenya wa gatano, mûkaarutaga ndegwa kenda, ndûrûme igîrî, na tûtûrûme îkûmi na tûna twa ûkûrû wa mwaka ûmwe, na cionthe ciîthîrwe itarî na wonje.

²⁷ Mûkaarutaga îtega rîa irio cia mûgûnda, îtega rîa indo cia kûnyuwa kûrî ndegwa, ndûrûme, na tûtûrûme wata ûrîa watho ugîte.

²⁸ Vamwe na îtega rîa kûvîvua rîa wa mûthenya, îtega rîarîo rîa irio cia mûgûnda na îtega rîarîo rîa indo cia kûnyuwa mûkaaruta nthenge îmwe ya îtega rîa kûtheria mevia.

²⁹ “Mûthenya wa gatandatû, mûkaarutaga ndegwa inyanya itarî ngûrû, ndûrûme igîrî, tûtûrûme îkûmi na tûna twa ûkûrû wa mwaka ûmwe, na cionthe ciîthagîrwe itarî na wonje.

³⁰ Mûkaarutaga îtega rîa irio cia mûgûnda, îtega rîa indo cia kûnyuwa kûrî wa ndegwa, ndûrûme, na tûtûrûme wata ûrîa watho ugîte.

³¹ Vamwe na îtega rîa kûvîvua rîa wa mûthenya, îtega rîa rîo rîa irio cia mûgûnda na matega ma rîo ma indo cia kûnyuwa, mûkaarutaga nthenge îmwe ya îtega rîa kûtheria mevia.

³² “Mûthenya wa mûgwanja, mûkaarutaga ndegwa mûgwanja itarî ngûrû, ndûrûme igîrî, na tûtûrûme îkûmi na tûna, na cionthe ciîthagîrwe itarî na wonje.

³³ Mûkaarutaga îtega rîa irio cia mûgûnda, îtega rîa indo cia kûnyuwa kûrî ndegwa, ndûrûme na tûtûrûme, wata ûrîa watho ugîte.

³⁴ Vamwe na îtega rîa kûvîvua rîa wa mûthenya, îtega rîa rîo rîa irio cia mûgûnda, na îtega rîa indo cia kûnyuwa, mûkaarutaga nthenge îmwe ya kûtheria mevia.

³⁵ “Mûthenya wa kanana, mûgaacemanagia nîguo mûgooce Ngai. Mûthenya ûcio mûtikarutage wîra,

³⁶ nwatî mûkaarutaga îtega rîa kûvîvua kûrî Ngai-Mûnene rîrî na mûtararûko wa kûmûkenia rîa ndegwa, ndûrûme îmwe, na tûtûrûme mûgwanja twa ûkûrû wa mwaka ûmwe, na cionthe ciîthagîrwe itarî na wonje.

³⁷ Mûkaarutaga îtega rîa irio cia mûgûnda, îtega rîa indo cia kûnyuwa kûrî ndegwa, ndûrûme, na tûtûrûme wata ûrîa watho ugîte.

³⁸ Vamwe na îtega rîa kûvîvua rîa wa mûthenya, îtega rîa rîo rîa irio cia mûgûnda, na îtega rîa rîo rîa indo cia kûnyuwa, mûkaarutaga nthenge îmwe îrî îtega rîa kûtheria mevia.

³⁹ “Mama nîmo mawatho marîa megiî matega ma kûvîvua, matega ma irio cia mûgûnda, matega ma thayû, matega ma indo cia kûnyuwa, marîa mûkaarutagîra Ngai-Mûnene vîndî ya irugo cienyu wata ûrîa ivangîtwe. Mûkaarutaga matega mau vamwe na matega marîa mûrutagîra Ngai-Mûnene nîûndû wa kûvingia mwîvîtwa na matega ma kwîyendera.

⁴⁰ Kwoguo Musa nîwerire andû a Isiraeli maûndû monthe marîa aathîtwe nî Ngai-Mûnene.”