Ndari 28 - ÎVUKU RÎA ÛVORO MWARO

Matega ma wa mûthenya wa mûthenya

¹ Ngai-Mûnene nîwerire Musa atîrî,

² “Atha andû a Isiraeli mandutagîre matega ma kûvîvua marî na mûtararûko mwaro îvinda rîrîa rîagîrîru.

³ Mama nîmo matega ma kûvîvua marîa makandutagîra wa mûthenya: tûtûrûme twîrî tûrî na ûkûrû wa mwaka ûmwe na tûtarî na wonje.

⁴ Gatûrûme kamwe gagaategagîrwa Ngai kîraûko na kau kengî kîvwaî.

⁵ Wa gatûrûme gakaarutagwa vamwe na matega ma irio cia mûgûnda, na nîcio; kilo îmwe ya mûtu îtukanîtue na lita îmwe ya maguta maro ma ndamaiyû.

⁶ Îtega rîîrî rîa kûvîvua nî rîa wa mûthenya na rîambîrîrie kîrîmarî gîa Sinai rîrî îtega rîa irio, rîrî na mûtararîka mwaro ûkenagia Ngai-Mûnene.

⁷ Wa gatûrûme ga îtega rîa kûvîvua rîkaarutanagîrua na lita îmwe ya îtega rîarîo rîa indo cia kûnyuwa. Îtega rîu rîa ndivei rîgetûrûragwa metharî ya kîgongoona ya Ngai-Mûnene.

⁸ Gatûrûme kau kengî gakaarutagwa kîvwaî karî îtega rîa kûvîvua. Gakaarutanagîrua na irio cia mûgûnda na matega ma indo cia kûnyuwa wata irîa cia îtega rîa kîraûko. Rîîrî nî îtega rîrî mûtararûko mwaro ûkenagia Ngai-Mûnene.

Îtega rîa thavatû

⁹ “Mûthenya wa thavatû mûkaarutaga îtega rîa tûtûrûme twîrî tûtarî na wonje twa ûkûrû wa mwaka ûmwe, kilo igîrî cia mûtu ûtukanîtue na maguta ma ndamaiyû rîrî îtega rîa irio cia mûgûnda, na îtega rîa ndivei.

¹⁰ Îtega rîîrî rîa kûvîvua rîkaarutagwa wa mûthenya wa thavatû, vamwe na matega marîa mengî ma wa mûthenya na matega na ndivei.

Îtega rîa mûthenya wa mbere wa Mweri

¹¹ “Kîambîrîria Kîam wa mweri wonthe mûkaarutagîra Ngai-Mûnene îtega rîa kûvîvua rîa ndegwa igîrî itarî ngûrû, ndûrûme îmwe, na tûtûrûme mûgwanja twa ûkûrû wa mwaka ûmwe na tûtarî na wonje.

¹² Wa ndegwa îkaarutanagîrua na kilo ithatû cia mûtu ûtukanîtue na maguta ma ndamaiyû, na wa ndûrûme îkaarutanagîrua na kilo igîrî cia mûtu ûtukanîtue na maguta ma ndamaiyû,

¹³ na wa gatûrûme gakaarutanagîrua na kilo îmwe ya mûtu îtukanîtue na maguta, rîrî îtega rîa irio cia mûgûnda. Mûtararûko wa îtega rîîrî nîûkenagia Ngai-Mûnene.

¹⁴ Mwîgana wa ndivei îrîa yendekanaga nîûndû wa îtega nî lita igîrî kûrî wa ndegwa îmwe, lita îmwe na nuthu kûrî wa gatûrûme, na lita îmwe kûrî wa ndûrûme. Ûyû nîguo watho wa kûrûmagîrîrwa wa mûthenya wa mbere wa kwambîrîria mweri, mwaka mûgima.

¹⁵ Vamwe na matega ma kûvîvua ma wa mûthenya na matega ma ndivei, mûkaarutaga nthenge îmwe rîrî îtega rîa kûtheria mevia.

Matega vîndî ya kîrugo kîa pasaka

¹⁶ “Kûngûagîrani Pasaka ya Ngai-Mûnene mûthenya wa îkûmi na îna wa mweri wa mbere.

¹⁷ Mûthenya wa îkûmi na îtano wa mweri nî wa kwambîrîria kîrugo kîrîa gîkaraga mîthenya mûgwanja. Mîthenya îo mûgwanja mûkaarîcaga mîgate îtarî mîkîre ndawa ya kwimbia.

¹⁸ Mûthenya wa mbere mûgaacemanagia vamwe kûgooca, na gûtirî wîra mûrito ûkaarutagwa mûthenya ûcio.

¹⁹ Mûkaarutaga îtega rîa kûvîvua rîrî îtega rîa irio kûrî Ngai-Mûnene. Mûkaarutaga ndegwa igîrî ino itarî ngûrû, ndûrûme îmwe, tûtûrûme mûgwanja twa ûkûrû wa mwaka ûmwe na cionthe ciîthagîrwe itarî na wonje.

²⁰ Matega ma irio cia mûgûnda marîa makaarutagwa vamwe nacio nî: mûtu ûtukanîtue na maguta ma ndamaiyû kilo ithatû kûrî wa ndegwa, kilo igîrî kûrî wa ndûrûme,

²¹ na kilo îmwe kûrî wa gatûrûme ga tûtûrûme tûrîa mûgwanja.

²² Wana mûkaarutaga nthenge îmwe nîûndû wa kûtheria mevia menyu.

²³ Mûkaarutaga matega mama vamwe na matega marîa mengî ma kûvîvua marîa mûrutaga wa mûthenya kîraûko.

²⁴ Mûkaarutaga îtega rîa kûvîvua na njîra wa îo, îvinda rîa mîthenya mûgwanja. Îtega rîîrî rîrî mûtararûko ûkenagia Ngai-Mûnene. Mûkaarutaga îtega rîîrî vamwe na îtega rîa wa mûthenya rîa kûvîvua vamwe na îtega rîarîo rîa indo cia kûnyuwa.

²⁵ Mûthenya wa mûgwanja mûcemanagie vamwe mûkagooca Ngai-Mûnene, na mûtikarutage wîra mûrito.

Matega vîndî ya kîrugo kîa maketha

²⁶ “Mûthenya wa mbere wa vîndî ya kîrugo Kîam maketha, rîrîa mûkethagîrwa mûkîvirîra Ngai-Mûnene matega ma mbere, mûgaacemanagia nîguo mûgooce Ngai-Mûnene na gûtirî wîra mûrito mûkaarutaga.

²⁷ Mûkaarutagîra Ngai-Mûnene îtega rîrî na mûtararûko mwaro rîa ndegwa igîrî itarî ngûrû, ndûrûme îmwe, na tûtûrûme mûgwanja twa ûkûrû wa mwaka ûmwe, na cionthe ikethagîrwa itarî na wonje.

²⁸ Matega ma irio marîa makaarutagwa vamwe na mama nî: mûtu ûtukanîtue na maguta ma ndamaiyû kilo ithatû kûrî wa ndegwa îmwe, kilo igîrî kûrî wa ndûrûme îmwe,

²⁹ na kilo îmwe kûrî wa gatûrûme kamwe.

³⁰ Mûkaarutaga nthenge îmwe îrî îtega rîa kûtheria mevia menyu.

³¹ Mûkaarutaga indo ino wa vamwe na matega mengî ma kûvîvua marîa mûrutaga wa mûthenya na matega ma cio ma indo cia kûnyuwa.