Ndari 27 - ÎVUKU RÎA ÛVORO MWARO

Aarî a Zelofehadi

¹ Aarî a Zelofehadi maarî Mahila, Noa, Hogila, Milika, Tiriza. Zelofehadi aarî mûvîcî wa Heferi, Heferi aarî mûvîcî wa Gileadi, Gileadi aarî mûvîcî wa Makiru, Makiru aarî mûvîcî wa Manase, Manase aarî Mûvîcî wa Josefu.

² Aarî acio nîmaathiîre makîrûngama mbere ya Musa na Eliazaru mûthînjîri-Ngai, na mbere ya atongoria onthe a Isiraeli vau mûromorî wa îgema rîa Ngai-Mûnene na makiuga atîrî,

³ “Vava aakuîrîre werûrî na ndaarî na mwana wa kavîcî. Ke ndaarî ûmwe wa arûmîrîri a Kora, arîa maagomanire na makîregana na Ngai-Mûnene. Ke aakwire nîûndû wa mevia make.

⁴ Rîîtwa rîa vava nîrîriganîra Isiraeli nîûndû atî ndaarî na kavîcî? Tûgaîre mîgûnda gatagatîrî ka andû ao.”

⁵ Musa nîwavirire mateta mao kûrî Ngai-Mûnene.

⁶ Nake Ngai-Mûnene nîwerire Musa atîrî,

⁷ “Ûguo aarî acio a Zelofehadi marauga, nî ûvoro wama. Manengere îgai rîao gatagatîrî ka aa mûrwang'ina na îthe, nîguo magîe na îgai rîa îthe.

⁸ Ûcoke wîre andû onthe a Isiraeli atî, mûndûmûrûme wa wonthe angîkua atarî na mwana wa kavîcî, îgai rîake rîkaanengerwa mwarî.

⁹ Ethîrwa atarî na mwarî, îgai rîake rîkaavewa aa mûrwang'ina.

¹⁰ Ethîrwa atarî na aa mûrwang'ina îgai rîake rîkaathiî na aa mûrwang'ina na îthe.

¹¹ Nake îthe ethîrwa atarî na aa mûrwang'ina, îgai rîake rîkaathiî kûrî mûndû wa mbarî yake ûrîa makonenie mûno rîtuîke rîake. Ûndû ûyû ûkethagîrwa ûrî watho wa kûrûmagîrîrwa nî andû a Isiraeli wata ûrîa Ngai-Mûnene aathire Musa.”

Joshua nîwathuurirwe atuîke mûtongoria vandûrî va Musa

¹² Ngai-Mûnene nîwerire Musa atîrî, “Unûkia kîrîmarî Kîam Abarimu na ûrorie vûrûri ûrîa naveere andû a Isiraeli.

¹³ Warîkia kwona vûrûri ûcio we nîûgûkua ta ûrîa mûrwanyûkwe Aroni aakwire,

¹⁴ nîûndû mûtiathîkîra watho wakwa rîrîa mwarî werûrî wa Zini. Vîndî îrîa andû amwe maatetire nîûndû wakwa marî Meriba, makîenda mavewe manjî ndwatûma riiri wakwa wonekane mbere yao.” (Meriba nî kîthima kîrîa Kîamrî Kadeshi werûrî wa Zini.)

¹⁵ Musa nîwavoire Ngai-Mûnene atîrî,

¹⁶ “Ngai-Mûnene, Ngai, we kiumo Kîam ûtûûro wonthe, nîrakûvoya ûthuure mûndû wa kûrûngamîrîra andû aya ûrîa ûkaamatongoragia

¹⁷ na ûrîa ûkaamathaga marî mbaararî nîguo matigekare ta ng'ondu itarî na mûrîthi.”

¹⁸ Ngai-Mûnene nîwerire Musa atîrî, “Oca Joshua mûvîcî wa Nuni mûndû ûrî na ûvoti, na ûmwigîrîre njara ûmûthuure.

¹⁹ Ûcoke ûmûrûngamie mbere ya Eliazaru, mûthînjîri-Ngai na mbere ya andû onthe a Isiraeli na ûmûve wathani makîonaga.

²⁰ Mwîtîkîrie arutage mawîra mamwe maku ma wathani nîguo andû onthe a Isiraeli mamwathîkagîre.

²¹ Eliazaru, mûthînjîri-Ngai nîke ûkaamûmenyithagia wendi wakwa na njîra ya gûtûmîra Urimu na Thumimu. Na njîra îo, Eleazaru agaatongoragia Joshua na andû onthe a Isiraeli maûndûrî mao monthe.”

²² Musa nîwekire wata ûrîa aathirwe nî Ngai-Mûnene. Nîwocire Joshua na akîmûrûngamia mbere ya Eliazaru, mûthînjîri-Ngai na andû onthe a Isiraeli.

²³ Musa nîwacokire akîmwigîrîra njara kîongorî akîmûthuura na akîmûva wathani wata ûrîa aathirwe nî Ngai-Mûnene.