Ndari 26 - ÎVUKU RÎA ÛVORO MWARO

Andû nî maatarirwe riita rîa kaîrî

¹ Vuva wa mûthiro Ngai-Mûnene nîwerire Musa na Eliazaru mûvîcî wa Aroni mûthînjîri-Ngai atîrî,

² “Tara andû onthe a vûrûri wa Isiraeli, wa mûndû na nyomba yake. Tara andû arîa marî na ûkûrû wa mîaka mîrongo îîrî kûthiî na mbere, arîa mangîvota kûrûa mbaara.”

³ Musa na Eleazaru mûthînjîri-Ngai nîmaarîrie andû marî kûndû kûrîa kwaraganu vûrûrirî wa Moabu mûringo wa rûnjî rwa Jorodani na vakuvî na îtûûra rîa Jeriko makîmeera

⁴ matare andû arîa marî na ûkûrû wa mîaka mîrongo îîrî kûthiî na mbere wata ûrîa Ngai-Mûnene aathire Musa eke. Andû a Isiraeli arîa maaumire vûrûri wa Misiri nî aya:

⁵ Andû a mbere maarî a mûvîrîga wa Reubeni îrikithathi rîa Jakovu. Mbarî ya Hanoku, Palu,

⁶ Hezironi na Karîmi.

⁷ Icio nîcio mbarî cia mûvîrîga wa Reubeni. Arûme onthe arîa maatarirwe maarî ngiri mîrongo îna na ithatû, na magana mûgwanja ma mîrongo îthatû (43,730).

⁸ Njiarwa cia Palu ciarî Eliabu,

⁹ na anake ake maarî Nemueli, Dathani na Abiramu. (Dathani na Abiramu nîo arîa maathuurîtwe gatagatîrî ka andû a Isiraeli. Nwatî nîmaareganire na Musa na Aroni, na makînyitanîra na arûmîrîri a Kora gûkararia Ngai-Mûnene.

¹⁰ Nayo nthî nîyathamirie îkîmameria onthe magîkua. Maakwire vamwe na Kora wana arûmîrîri ake rîrîa mwaki wavîvirie andû magana maîrî ma mîrongo îtano (250). Ûndû ûcio watuîkire wa gûkaania andû acio engî a Isiraeli kûregana na Ngai-Mûnene.

¹¹ Nwatî avîcî a Kora matiakua.)

¹² Andû a mûvîrîga wa Simeoni maarî: mbarî ya Nemueli, mbarî ya Jamini, mbarî ya Jakini,

¹³ mbarî ya Zera na mbarî ya Shauli.

¹⁴ Andû acio a mûvîrîga wa Simioni maarî arûme ngiri mîrongo îîrî na igîrî na magana maîrî (22,200).

¹⁵ Andû a mûvîrîga wa Gadi maarî: mbarî ya Zefoni, mbarî ya Hagai, mbarî ya Shuni,

¹⁶ mbarî ya Ozini, mbarî ya Eri,

¹⁷ mbarî ya Arodi na mbarî ya Areli.

¹⁸ Andû acio a mûvîrîga wa Gadi maarî arûme ngiri mîrongo îna na magana matano (40,500).

¹⁹ Anake aîrî a Juda, Eri na Onani maakuîrîre Kanaani.

²⁰ Andû acio engî a mûvîrîga wa Juda maarî: mbarî ya Shela, mbarî ya Perezi na mbarî ya Zera.

²¹ Kuuma kûrî Perezi kwarî na mbarî ya Hezironi na mbarî ya Hamuli.

²² Andû acio a mûvîrîga wa Juda maarî arûme ngiri mîrongo mûgwanja na atandatû na magana matano (76,500).

²³ Andû a mûvîrîga wa Isakaru maarî: Mbarî ya Tola, mbarî ya Pua,

²⁴ mbarî ya Jashubu na mbarî ya Shimuroni.

²⁵ Andû acio a Isakaru maarî arûme ngiri mîrongo îtandatû na inya, na magana mathatû (64,300).

²⁶ Andû a mûvîrîga wa Zebuluni maarî: mbarî ya Seredi, mbarî ya Eloni na mbarî ya Jahileeli.

²⁷ Andû acio a Zebuluni maarî arûme ngiri mîrongo îtandatû na magana matano (60,500).

²⁸ Josefu aarî na anake aîrî, Manase na Efiraimu.

²⁹ Andû a mûvîrîga wa Manase maarî: Makiru. Makiru aarî îthe wa Gileadi. Andû a mûvîrîga wa Gileadi maarî:

³⁰ mbarî ya Iezeri, mbarî ya Heleki,

³¹ mbarî ya Asirieli, mbarî ya Shekemu,

³² mbarî ya Sheminda na mbarî ya Heferi.

³³ Zelofehadi, mûvîcî wa Heferi ndaagîa na ciana cia anake. Agîîre na erîtu atheri. Nao nî Mahila, Noa, Hogila, Milika na Tiriza.

³⁴ Andû a mûvîrîga wa Manase maarî arûme ngiri mîrongo îtano na igîrî na magana mûgwanja (52,700).

³⁵ Andû a mûvîrîga wa Efiraimu maarî: mbarî ya Shuthela, mbarî ya Bekeri na mbarî ya Tahani.

³⁶ Andû a mbarî Erani maarî njiarwa cia Shuthela.

³⁷ Andû a mûvîrîga wa Efiraimu maarî arûme ngiri mîrongo îthatû na igîrî, na magana matano (32,500).

³⁸ Andû a mûvîrîga wa Benjamini maarî: mbarî ya Bela, mbarî ya Ashibeli, mbarî ya Ahiramu,

³⁹ mbarî ya Shefufamu na mbarî ya Hufamu.

⁴⁰ Mbarî ya Aridi na mbarî ya Naamani ciarî njiarwa cia Bela.

⁴¹ Andû a mûvîrîga wa Benjamini maarî ngiri mîrongo îna na ithano, na magana matandatû (45,600).

⁴² Andû a mûvîrîga wa Dani maarî: mbarî ya Shuhamu.

⁴³ Nao maarî arûme ngiri mîrongo îtandatû na inya na magana mana (64,400).

⁴⁴ Andû a mûvîrîga wa Asheri maarî: mbarî ya Imina, mbarî ya Ishivi na mbarî ya Beria.

⁴⁵ Andû a mbarî ya Heberi na mbarî ya Malikieli maarî njiarwa cia Beria.

⁴⁶ Asheri aarî na mwîrîtu wetagwa Sera.

⁴⁷ Andû a mbarî ya Asheri maarî arûme ngiri mîrongo îtano na ithatû, na magana mana (53,400).

⁴⁸ Andû a mûvîrîga wa Nafutali maarî: mbarî ya Jahazeli, mbarî ya Guni,

⁴⁹ mbarî ya Jezeri na mbarî ya Shilemu.

⁵⁰ Nao onthe maarî arûme ngiri mîrongo îna na ithano, na magana mana (45,400).

⁵¹ Arûme onthe a vûrûri wa Isiraeli maarî arûme ngiri magana matandatû na îmwe, na magana mûgwanja ma mîrongo îthatû (601,730).

⁵² Ngai-Mûnene nîwerire Musa atîrî,

⁵³ “Gaîra mîvîrîga îno yonthe vûrûri ûyû ûtuîke îgai rîao, wata ûrîa andû a wa mûvîrîga megana.

⁵⁴ Gaîra mûvîrîga ûrîa mûnene gîcunjî kînene, naguo mûvîrîga ûrîa mûnini ûûgaîre gîcunjî kînini. Ûgaîre wa mûvîrîga îgai rîaguo kûringana na ûrîa andû aguo megana.

⁵⁵ Nwatî, ûgai ûcio wa vûrûri ûgeekwa na njîra ya kûthîra. Wa mûvîrîga ûkaavewa îgai rîaguo kûringana na marîîtwa ma methe mao.

⁵⁶ Îgai rîa wa mûvîrîga rîkaavecanwa na njîra ya gwikia mîtî, na wa mûvîrîga ûkaanyita îgai rîaguo kûringana na ûnene kana ûnini waguo.”

⁵⁷ Andû a mûvîrîga wa Lawi maarî: mbarî ya Gerishoni, mbarî ya Kohathu na mbarî ya Merari.

⁵⁸ Njiarwa irîa ciîngî cia Lawi ciarî; nyomba ya Libuni, nyomba ya Heburoni, nyomba ya Mahali, nyomba ya Mushi na nyomba ya Kora. Kohathu aarî îthe wa Amuramu.

⁵⁹ Mûka wa Amuramu eetagwa Jokebedi mwarî wa Lawi. Jokebedi aaciarîrwe Misiri. Jokebedi aaciarîre Amuramu anake aîrî: Aroni na Musa, na mwîrîtu ûmwe wetagwa Miriamu.

⁶⁰ Aroni nîwagîre na anake ana; Nadabu, Abihu, Eliazaru na Ithamaru.

⁶¹ Nadabu na Abihu nîmaakwire rîrîa maarutîre Ngai-Mûnene matega ma kûvîvua na mwaki ûtarî mwîtîkîrie.

⁶² Arûme onthe a mûvîrîga wa Alawi arîa maarî na ûkûrû wa mweri ûmwe kûthiî na mbere maarî ngiri mîrongo îîrî na ithatû. Andû acio engî a Isiraeli magîtarwa, Alawi matiatarwa nîûndû matiagaîrwa îgai Aisiraeli acio engî makîgaîrwa.

⁶³ Acio nîo arûme a Isiraeli arîa maatarirwe nî Musa na Eliazaru, mûthînjîri-Ngai marî vûrûrirî ûrîa mwaraganu wa Moabu, mûringo wa rûnjî rwa Jorodani, vakuvî na Jeriko.

⁶⁴ Gûtirî mûndû wanarî ûmwe watigirwe gatagatîrî ka arîa maatarîrîtwe werûrî wa Sinai riita rîa mbere nî Musa na Aroni, mûthînjîri-Ngai.

⁶⁵ Ngai-Mûnene aarî mugu atî onthe magaakuîra werûrî. Gûtirî mûndû wanarî ûmwe gatagatîrî kao watigarire tiga Kalebu mûvîcî wa Jefune na Joshua mûvîcî wa Nuni.