Ndari 25 - ÎVUKU RÎA ÛVORO MWARO

Andû a Isiraeli marî Peori

¹ Rîrîa andû a Isiraeli matûûraga vûrûrirî wa Shitimu, arûme a Isiraeli nîmaamenyanire kîîmwîrî na aka a Moabu arîa maarî kuo.

² Aka acio nîmeetire Aisiraeli mamburarî mao ma kûrutîra ngai ciao magongoona. Andû a Isiraeli nîmaarîre irio na makîgooca ngai cia a Moabu.

³ Kwoguo Aisiraeli nîmaambîrîrie kûgooca Baali ngai ya Peori. Nake Ngai-Mûnene nîwarakarirue nî andû acio a Isiraeli.

⁴ Kwoguo Ngai-Mûnene nîwerire Musa atîrî, “Ûngania atongoria onthe a andû a Isiraeli na ûmaûrage mûthenya andû onthe makîonaga, nîguo marakara makwa îgûrû rîao mathire.”

⁵ Musa nîwerire atirîrîri vûrûri a Isiraeli atîrî, “Wa mûndû gatagatîrî kenyu nîaûrage mûndûmûrûme wa wonthe ûgoocaga Baali ngai ya Peori.”

⁶ Mûisiraeli ûmwe nîwocire mûndûmûka ûmwe Mûmidiani na akîmûvira îgemarî rîake. Mûndû ûcio eekire ûguo Musa na andû onthe a Isiraeli makîonaga marî vau mûromorî wa îgema rîa Ngai-Mûnene magîcakaya.

⁷ Rîrîa Finehasi, mûvîcî wa Eliazaru wa Aroni mûthînjîri-Ngai oonire ûguo, nîwaûkîrire na agîtiga andû acio engî. Nîwocire îtumû,

⁸ na akîrûmîrîria mûndûmûrûme ûcio kûu îgemarî. Nîwamûmundire na îtumû, rîgîtûrîkania na rîkîmunda îvu rîa mûndûmûka ûcio. Na njîra îo, mûthiro ûrîa wacûkangagia Isiraeli nîwathirire.

⁹ Nwatî mûthiro ûcio nîwaûragîte andû ngiri mîrongo îîrî na inya (24,000).

¹⁰ Nake Ngai-Mûnene nîwerire Musa atîrî,

¹¹ Finehasi, mûvîcî wa Eliazaru wa Aroni mûthînjîri-Ngai, nîwathiria marakara makwa kûrî andû a Isiraeli. Finehasi nîwareganire na ûvoro wa kûgooca ngai îngî tiga nie. Kîu nîkîo kîgiririe njûkangia andû a Isiraeli onthe narakara.

¹² Kwoguo mwîre nîngûrûtha kîrîkanîro Kîam thayû nake.

¹³ Finehasi na njiarwa ciake cionthe nîmatûûra marî athînjîri-Ngai nîûndû nîwatuîkire mwîvokeku akîrega kûgooca ngai ciîngî tiga nie. Ke nîwatûmire andû a Isiraeli moverwa mevia mao.

¹⁴ Mûisiraeli ûcio waûragirwe marî na mûndûmûka Mûmidiani, eetagwa Zimuri mûvîcî wa Salu na aarî mûtongoria wa mbarî îmwe ya mûvîrîga wa Simeoni.

¹⁵ Mûndûmûka Mûmidiani ûcio waûragirwe eetagwa Kozibi mwarî wa Zuri. Zuri aarî mûtongoria wa mbarî îmwe ya mîvîrîga ya andû a Midiani.

¹⁶ Ngai-Mûnene nîwerire Musa atîrî,

¹⁷ “Tharîkîra Amidiani na ûmacûkangie,

¹⁸ nîûndû wa maûndû macûku marîa meekire rîrîa maamûveenirie mûrî Peori, na nîûndû wa Kozibi ûrîa waûragirwe vîndî ya mûthiro ûrîa warî Peori.”