Ndari 24 - ÎVUKU RÎA ÛVORO MWARO

¹ Balaamu nîwamenyire atî Ngai-Mûnene nîwendaga kûrathima andû a Isiraeli. Kwoguo ndaathiî gûcaria ago ta ûrîa eekaga mbere, nwatî aaroririe ya werûrî.

² Balaamu nîwaroririe andû a Isiraeli na akîona wa mûvîrîga wambîte magema vandû va guo. Nîwatonyirwe nî Roho wa Ngai,

³ na akîratha atîrî, “Ûyû nî ûrathi wakwa nie Balaamu mûvîcî wa Beori. Ûyû nî ûrathi wa mûndû watumûrirwe metho.

⁴ Ûyû nî ûrathi wa mûndû wîgucaga mûgambo wa Ngai, mûndû wonaga cioneki cia Ngai Mwene Vinya, mûndû wîgwîthagia nthî mbere ya Ngai na akona cioneki.

⁵ Magema menyu nî mathaka mue andû a Jakovu, kûrîa mûtûûraga nî kûthaka mue andû a Isiraeli.

⁶ Nîta mîvari mîraca ya mîtî ya mîkîndû, kana mîgûnda îrî rûtere rwa rûnjî, nîta ithûnjû ivandîtwe nî Ngai-Mûnene, kana ta mîtî ya mîtarakwe îrî rûtere rwa manjî.

⁷ Ndoo ciao ikethagîrwa irî na manjî ma kwîgana, mîgûnda yao îkethagîrwa îrî na mbura ya kwîgana. Mûthamaki wao akethîrwa arî mûnene gûkîra Agagi, ûthamaki wake ûkethagîrwa ûrî mûnene na mwariî.

⁸ Ngai nîwamarutire vûrûri wa Misiri, amarûagîrîra ta mbogo ya njamba. Nîmagaacûkangia nthû ciao na maunange mavîndî mao, na mamarathe na mîguî yao.

⁹ Vûrûri ûcio ûmamîrîrîte ta mûnyambû, rîrîa ûmamiî gûtirî mûndû ûngîûramûkia. Mûndû wa wonthe ûrathimaga Isiraeli akaarathimagwa, mûndû wa wonthe ûrumaga Isiraeli akaarumagwa.”

¹⁰ Balaki nîwarakarire mûno nî Balaamu, na agikia njara na akîra Balaamu atîrî, “Nie nagwîtire ûke ûrume nthû ciakwa, nwatî vandû va ûguo, maita mathatû wîthîrîtwe ûkîmarathima.

¹¹ Rîu, thiî wînûke! Nînakwîrîrîte iveo nyîngî, nwatî ndwarî wendi wa Ngai-Mûnene ûgîe na iveo icio.”

¹² Balaamu nîwerire Balaki atîrî, “Kinthî ndierire anjaama arîa watûmîte gwakwa,

¹³ atî wana ûngîamvere nyomba yaku îcûrîte thaavu na sîlûva, ndingîekire ûndû ûreganîte na ûrîa Ngai-Mûnene aambathîte na njîra ya gwîka ûndû wakwa. Nie ngaragia wa ûrîa tu Ngai-Mûnene ambîrîte mbarie.”

Ûrathi wa Balaamu wa mûthiia

¹⁴ Balaamu nîwerire Balaki atîrî, “Rîu nie nthiîte kûrî andû etû. Nwatî mbere ya nthiî tiga ngûtaare ûvororî wîgiî ûrîa andû a Isiraeli mageeka andû aku mavinda marîa magaaûka.”

¹⁵ Balaamu nîwarathire atîrî, “Îno nîyo ndûmîrîri ya Balaamu mûvîcî wa Beori, ciugo cia mûndû watumûrirwe metho.

¹⁶ Nî ûrathi wa mûndû ûrîa wîgucaga ciugo cia Ngai, na wîcî meciria ma Ûrîa ûrî Îgûrû Mûno, mûndû wonaga kîoneki kuuma kûrî Ngai ûrîa Ûrî Vinya, ûrîa wîgwîthagia nthî na akona cioneki.

¹⁷ Nînîrona ûrîa ûgaaûka vuvarî, nînîramwona nwatî ndarî vakuvî. Nîakaaumîra ta njata kûrî njiarwa cia Jakovu, gatagatîrî ka andû a Isiraeli nîgûkaauma Mûthamaki. Nîakaathiria atongoria a Moabu, na acûkangie njiarwa cionthe cia Sethi.

¹⁸ Isiraeli nîîkavoota Edomu na îîgwatîre vûrûri wao; nwatî Isiraeli nîîkathiî na mbere kûvootana.

¹⁹ Isiraeli nîakaavootana, na athirie andû arîa makethîrwa matigarîte.”

²⁰ Balaamu nîwacokire akîona Amaleki kîonekirî gîake na akîratha atîrî, “Vûrûri wa Amaleki nîguo warî vinya mûno gûkîra mavûrûri marîa mengî, nwatî mûthiiarî nî ûkaathira viû.”

²¹ Nîwacokire akîona Akeni kîonekirî gîake na akîratha atîrî, “Kûrîa mûtûûraga mue Akeni nî kûgitîre, kûgitîrîtwe ta kîomba kîrî nguvarî ya îthiga.

²² Nwatî mue Akeni nîmûgaacûkangua, rîrîa mûgaatavwa nî Ashuri.”

²³ Balaamu nîwacokire akîratha atîrî, “Aia! Nî ûrîkû ûgaatigara Ngai agîka maûndû mama?

²⁴ Meri nîigaakinya ciumîte Kitimu, nîikaatharîkîra Ashuri na Eberi, nwatî wanao nîmakaathira viû.”

²⁵ Kwoguo, Balaamu nîwacokire mûciî nake Balaki akîthiîra.