Ndari 23 - ÎVUKU RÎA ÛVORO MWARO

¹ Balaamu nîwacokire akîra Balaki atîrî, “Ndumîra metha mûgwanja cia kîgongoona ava na ûndetere ndegwa mûgwanja na ndûrûme mûgwanja.”

² Balaki nîwekire wata ûrîa Balaamu amwîrîte eke, nake Balaki na Balaamu nîmaarutire ndegwa na ndûrûme kûrî wa metha ya kîgongoona.

³ Balaamu nîwacokire akîra Balaki atîrî, “Rûngama ava vakuvî na îtega rîaku rîa kûvîvua nîguo nanie nthiî vandû nîrî wenga ngone kana Ngai-Mûnene nîakûnyumîrîra. Angîmbarîria nîngûkwîra maûndû monthe marîa akûmbîra.” Kwoguo nîwaunûkirie kîrîmarî arî wenga,

⁴ na Ngai akîmumîrîra. Balaamu nîwerire Ngai atîrî, “Nie nîndumîte metha mûgwanja cia kîgongoona na nîndutîrîte ndegwa îmwe na ndûrûme îmwe kûrî wa metha icio mûgwanja cia kîgongoona.”

⁵ Ngai-Mûnene nîwerire Balaamu ûrîa akûthiî kwîra Balaki na akîmwatha acoke kûrî Balaki akamûve ndûmîrîri îo.

⁶ Kwoguo Balaamu nîwathiîre na akîthîrîria Balaki arûngamîte vakuvî na îtega rîake rîa kûvîvua marî na atongoria onthe a Moabu.

⁷ Balaamu nîwaririe ûrathi wake akiuga atîrî, “Balaki mûthamaki wa Moabu nîandutîte Sîria, na irîma cia mwena wa îrathîro. ‘Ûka ûnumîre andû a Jakovu, ûka warie ûndû mûcûku kûrî andû a Isiraeli.’

⁸ Nîngîruma andû arîa Ngai atarumîte atîa, kana mbarie ûndû mûcûku wîgiî andû arîa Ngai-Mûnene atarîtie ûndû mûcûku wao?

⁹ Nîrî îgûrû rîa irîma nînîmoonaga, nînîmaroragia nîrî îgûrû rîa irîma. Acio nî andû matûûraga marî onga; nîmaicî atî nî arathime gûkîra andû a mavûrûri marîa mengî!

¹⁰ Njiarwa cia Isiraeli ciîngîvîte ta rûkûngû, nî eengî mûno ûndû matangîtarîka. Tiga nthirie mîthenya yakwa ta ûmwe wa andû a Ngai. Tiga ngue na thayû ta mûndû mûthingu.”

¹¹ Balaki nîwacokire akîra Balaamu atîrî, “Nîkwa wambîka atîa? Nie nakûretire gûkû nîguo ûrume nthû ciakwa, nwatî ûrîa weka nîkwa wamarathima.”

¹² Balaamu nîwacokirie atîrî, “Mbagîrîrwe nî kuga ûrîa tu Ngai-Mûnene ambîra mbuge.”

Ûrathi wa Balaamu wa kaîrî

¹³ Balaki nîwacokire akîra Balaamu atîrî, “Ûka tûthiî nawe vandû vengî varîa we ûkûvota kwona amwe ao. Numîra o ûrî vau.”

¹⁴ Kwoguo Balaki nîwavirire Balaamu mûgûndarî wa Zofimu îgûrû rîa kîrîma Kîam Pisiga. Nîwatumire metha mûgwanja cia kîgongoona, na kûrî wa metha ya kîgongoona nîwategire ndegwa na ndûrûme.

¹⁵ Balaamu nîwerire Balaki atîrî, “Rûngama ava vakuvî na îtega rîîrî rîaku rîa kûvîvua, nanie nthiî varîa ngacemanie na Ngai-Mûnene.”

¹⁶ Ngai-Mûnene nîwaumîrîre Balaamu na akîmwîra ûrîa akûthiî kwîra Balaki, na akîmwatha acoke kûrî Balaki akamûve ndûmîrîri îo.

¹⁷ Kwoguo Balaamu nîwacokire na akîthîrîria Balaki arûngamîte vakuvî na îtega rîake rîa kûvîvua marî na atongoria a Moabu. Balaki nîwaûririe ûrîa Ngai-Mûnene aaugîte.

¹⁸ Nake Balaamu nîwarathire atîrî, “Ûka Balaki mûvîcî wa Zipori, ûthikîrîrie ûrîa nguga.

¹⁹ Ngai ndekariî ta mûndû atî nwa aveenanie, kana ta mûndû wa nthî atî nwa ericûkwe. Ûndû wa wonthe eranagîra nîavingagia. Ke aaragia na ûrîa auga ûgatuîkîka.

²⁰ Ke amveere watho wa kûrathimana, Ngai arathimana ndingîvota kûgarûra kîrathimo kîu.

²¹ Gûtirî ûndû mûcûku Ngai-Mûnene onete kûrî andû a Jakovu. Gûtirî îvîtia onete kûrî andû a Isiraeli. Ngai-Mûnene, Ngai wao arî vamwe nao, maugaga atî nîke mûthamaki wao.

²² Ngai aamarutire vûrûri wa Misiri; amarûagîrîra ta mbogo ya njamba.

²³ Gûtirî mûndû ûngîroga andû a Jakovu, gûtirî ûgo ûngînyita andû a Isiraeli. Andû makaaugaga atîrî, ‘Taroriani mwone magegania marîa Ngai ekîte kûrî andû a Isiraeli.’

²⁴ Taroria andû a Isiraeli maûkagîra ta mûnyambû wa nga, marûngamaga ta mûnyambû wa njamba. Ndûmamaga ûtarîte kîrîa ûragîte, na ûnyue nthakame ya kîrîa ûragîte.”

²⁵ Balaki nîwacokire akîra Balaamu atîrî, “Ndûkamarume kana ûmarathime wana vanini.”

²⁶ Nwatî Balaamu nîwacokerie Balaki atîrî, “Na kinthî ndiakwîrire atî ngeka ûrîa wonthe Ngai-Mûnene akambîra mbîke?”

Ûrathi wa Balaamu wa kathatû

²⁷ Kwoguo Balaki nîwerire Balaamu atîrî, “Ûka tûthiî nawe na nîngûkûvira vandû vengî. Nwa kwîthîrwa Ngai nîagûgwîtîkîria ûnumîre o ûrî vandû vau.”

²⁸ Kwoguo Balaki nîmaathiîre na Balaamu nginya kathûrûmûndû ga kîrîma Kîam Peori, varîa mûndû angîrûngama akona werû.

²⁹ Balaamu nîwerire Balaki atîrî, “Ndumîra metha mûgwanja cia kîgongoona ava na ûndetere ndegwa mûgwanja na ndûrûme mûgwanja.”

³⁰ Balaki nîwekire wata ûguo eerirwe nî Balaamu. Nîwarutire wa kûrî metha ya kîgongoona ndegwa îmwe na ndûrûme îmwe.