Ndari 22 - ÎVUKU RÎA ÛVORO MWARO

Balaki nîwatûmanîre Balaamu

¹ Andû a Isiraeli nîmambîrîrie rûgendo rîngî na makîthiî magîkara kûndû kûrîa kwaraganu vûrûrirî wa Moabu, mwena wa îrathîro wa rûnjî rwa Jorodani, kûrorania na îtûûra rîa Jeriko.

² Mûthamaki Balaki mûvîcî wa Zipori, nîwamenyire maûndû monthe marîa andû a Isiraeli meekîte Aamori.

³ Balaki na Amoabu onthe nîmaanyitirwe nî guoya mûno nîûndû wa andû a Isiraeli. Nîmaametigîre mûno nîûndû maarî eengî.

⁴ Kwoguo andû a Moabu nîmeerire atongoria a Midiani atîrî, “Andû aya onthe, kûminjia na kûminjûkia, nîmethîrwa macûkangîtie kîndû kîonthe gatagatîrî getû, wata ûrîa ndegwa îrîcaga nyaki mûgûndarî.”

⁵ Kwoguo Balaki mûvîcî wa Zipori, na nîke warî mûthamaki wa Moabu vîndî îo, nîwatûmire anjaama magete Balaamu mûvîcî wa Beori. Balaamu aarî Pethori vakuvî na rûnjî rwa Farati vûrûrirî wa Amawi. Balaki nîwerire Balaamu atîrî, “Kûrî na rûrîrî rumîte Misiri na rûrî kûndû kuonthe gûkû nthî, na nîmarenda gwoca vûrûri wakwa.

⁶ Ûka ûnumîre andû aya, nîûndû nî eengî gûtûkîra na marî na vinya gûtûkîra. Twavota kûmavoota na kûmengata nîguo matigatonye vûrûri wetû. Nîmbîcî atî mûndû ûrîa we ûrathimaga nîarathimîkaga na mûndû ûrîa we ûrumaga ekaraga arî mûrume.”

⁷ Kwoguo atongoria a Moabu na a Midiani nîmaaumire makîthiî kûrî Balaamu makuîte îrîvi rîa kûragûrîrwa. Makinya nîmaaveere Balaamu ndûmîrîri ya Balaki.

⁸ Nake Balaamu nîwamerire atîrî, “Rarani gûkû ûmûnthî na rûyû nîngamwîra ûrîa wonthe Ngai-Mûnene akethîrwa ambîrîte.” Kwoguo atongoria a Moabu nîmeekarire na Balaamu.

⁹ Ngai nîwathiîre kûrî Balaamu na akîmûria atîrî, “Nî andû arîku aya mûrî nao?”

¹⁰ Balaamu nîwacokerie Ngai atîrî, “Balaki mûthamaki wa Moabu atûmire andû aya mambîre atî,

¹¹ kûrî na andû maumîte Misiri, na manyagarûkîte nthî yonthe. Balaki ambîra nthiî nîmûrumîre andû acio nîguo avote kûrûa nao na amengate mathiî.”

¹² Ngai nîwerire Balaamu atîrî, “Tî mûthiî nao na tîûmaruma nîûndû nînîmarathimîte.”

¹³ Kwoguo Balaamu nîwaramûkire kîraûko na akîra atongoria arîa maatûmîtwe nî Balaki atîrî, “Thiîni vûrûrirî wenyu nîûndû Ngai-Mûnene nîwarega tûthiî namue.”

¹⁴ Kwoguo atongoria a Moabu nîmaaûkîrire magîcoka kûrî Balaki makîmwîra atîrî, “Balaamu nîaregire gûka vamwe natue.”

¹⁵ Balaki nîwatûmire rîngî atongoria engî eengî na maarî îgweta gûkîra arîa aatûmîte mbere.

¹⁶ Nîmaathiîre kûrî Balaamu na makîmûva ndûmîrîri kuuma kûrî Balaki yaugaga atîrî, “Geria wone atî ndûrî na ûndû ûngîgiria ûke varî nie.

¹⁷ Nîngûgwîka ûndû ûrî na gîtîîo kînene, na ûndû wa wonthe ûkambîra mbîke nie nîngeka. Nakûthaitha ûka ûrume andû aya.”

¹⁸ Nwatî Balaamu nîwacokerie ndungata cia Balaki atîrî, “Wana kethîrwa nîkwa Balaki akûmva nyomba yake îcûrîte sîlûva na thaavu, ndingîvota kuna watho wa Ngai-Mûnene, Ngai wakwa nîûndû wa ûndû wana ûrîkû.

¹⁹ Nwatî namûthaitha mûrarîrîre gûkû ta arîa engî, nîguo menye kana kûrî na ûndû wîngî Ngai-Mûnene arenda kûmbîra.”

²⁰ Ûtukû ûcio Ngai nîwerire Balaamu atîrî, “Ethîrwa anjaama acio matûmîtwe maûke magwîte ûkîra na mûthiî nao, nwatî wîkage ûrîa tu ngaakwîraga wîke.”

²¹ Kwoguo Balaamu nîwaûkîrire kîraûko na akîvarîria mvunda ciake, na makîthiî na atongoria a Moabu.

Balaamu na mvunda yake

²² Ngai nîwarakarire nîûndû Balaamu nîwathiîre Moabu. Aathiîre kuo akuuîtwe nî mvunda yake marî na ndungata ciake ciîrî. Kwoguo arî njîrarî Mûraika wa Ngai-Mûnene nîwarûngamire mbere yake nîguo agirie athiî.

²³ Rîrîa mvunda yonire mûraika wa Ngai-Mûnene arûngamîte njîrarî anyitîte rûviû, nîyaumire njîrarî îkîthiî ya mîgûndarî. Balaamu nîwarivire mvunda îo nîguo amîcokie njîrarî.

²⁴ Nake Mûraika nîwarûngamire varîa njîra yacekeverete, gatagatîrî ka mîgûnda îîrî ya mîthavibu yairigîtwe na rûthingo rwa îthiga mîena yoîrî.

²⁵ Rîrîa mvunda yonire mûraika wa Ngai-Mûnene nîyathiîre îgiritanîtie na rûthingo nakuo kûgûrû kwa Balaamu nîgwakûrûnyûrirwe nî rûthingo. Balaamu nîwaringire mvunda rîngî.

²⁶ Wa rîngî mûraika wa Ngai-Mûnene nîwathiîre na akîrûngama vandû vaceke mûno vataarî na vandû vangîvîtûkîrwa mwena wa ûmotho kana wa ûrîo.

²⁷ Rîrîa mvunda yonire mûraika wa Ngai-Mûnene nîyamamire nthî. Nake Balaamu nîwarakarire na akîambîrîria kûriva mvunda na mûragi wake.

²⁸ Ngai-Mûnene nîwavotithirie mvunda kwaria na îkîûria Balaamu, “Ngwîkîte atîa nîguo ûninge maita mau mathatû?”

²⁹ Balaamu nîwerire mvunda îo atîrî. “Nîûndû we ûnduîte kîrimû! Kethîrwa nîrarî na rûviû, nîkwa nîngîakûraga!”

³⁰ Nwatî mvunda nîyerire Balaamu atîrî, “Anga ndiîthîrîtwe nîrî mvunda yaku îrîa wîthîrîtwe ûkîthiî wîkarîrîte ûtûrorî waku wonthe nginya ûmûnthî? Nanagwîka ûndû ta ûyû rîngî?” Balaamu nîwacokirie atîrî, “Naarî.”

³¹ Ngai-Mûnene nîwavotithirie Balaamu kwona mûraika wa Ngai-Mûnene arûngamîte vau mbere na arî na rûviû. Balaamu nîwacokire agîturumithia ûthiû wake nthî.

³² Nake Mûraika wa Ngai-Mûnene nîwamûririe atîrî, “Nîndûî gîatûma ûringe mvunda yaku ûguo maita mathatû? Naûka gûkûrigîrîria nîûndû ndwagîrîrwe nî kûthiî rûgendo rûrû.

³³ Mvunda yaku îmonete maita mathatû îkîeraga. Tiga nî ûguo îkire, nîngîkûragire ngînatiga mvunda yaku îrî mwoyo.”

³⁴ Balaamu nîwacokire akîra mûraika ûcio wa Ngai-Mûnene atîrî, “Nînjîvîtie, Ndiraicî atî ûrûngamîte njîrarî ûmvingîrîrie ndikavîtûke. Kwoguo ethîrwa ndûrona kwagîrîrîte nthiî na mbere na rûgendo rûrû, nîngûcoka mûciî.”

³⁵ Nwatî mûraika nîwacokerie Balaamu atîrî, “Thiî na andû aya, nwatî ûkaaragia tu maûndû marîa ngaakwîraga.” Kwoguo Balaamu nîwathiîre vamwe na andû acio.

Balaki nîwagwatire Balaamu ûgeni

³⁶ Rîrîa Balaki eegwire atî Balaamu arî njîrarî aûkîte, nîwathiîre kûmûtûnga îtûûrarî rîa Ari, îtûûra rîrîa rîatumîtwe vakuvî na rûnjî rwa Arinoni mûvakarî wa Moabu.

³⁷ Balaki nîwaûririe Balaamu atîrî, “Nîndûî kîgiririe ûûke nagûtûmanîra riita rîa mbere? Nîkwa wîciririe ndirî na kîndû nîngîkûva?”

³⁸ Balaamu nîwamûcokerie atîrî, “Taroria nînaûka nîrî ava. Nwatî nîrî na ûvoti wa kwaria wanarî ûndû? Nîmbaria ûrîa tu Ngai akwenda mbarie.”

³⁹ Kwoguo Balaamu nîmaathiîre na Balaki îtûûrarî rîa Kiriathi-huzothi.

⁴⁰ Marî kûu, Balaki nîwathînjire ndegwa na ng'ondu na akîva Balaamu na atongoria arîa maarî nake nyama imwe.

Ûrathi wa Balaamu wa mbere

⁴¹ Kîraûko Kîam mûthenya ûcio wîngî Balaki nîwocire Balaamu na akîmûvira nginya Bamothibaali. Marî kûu Balaamu nîwonaga andû amwe a Isiraeli.