Ndari 21 - ÎVUKU RÎA ÛVORO MWARO

Andû a Kanaani nîmaavootirwe

¹ Mûthamaki wa Kanaani atûûraga mwena wa îveti wa vûrûri wa Kanaani. Rîrîa eegwire atî andû a Isiraeli maavîtûkîrîrîte njîrarî ya Atharimu, nîwamatharîkîre na akînyita andû amwe ao.

² Nao andû a Isiraeli nîmeerîre Ngai-Mûnene na mwîvîtwa atîrî, “Ûngîtûvotithia tûvoote andû aya, nîtûcûkangia matûûra mao monthe.”

³ Ngai-Mûnene nîwathikîrîrie andû a Isiraeli, na akîmavotithia kûvoota Akanaani. Andû a Isiraeli nîmaacûkangirie Akanaani viû, wa vamwe na matûûra mao, na magîtuîra vandû vau rîîtwa Horima.

Njoka ya gîcango

⁴ Andû a Isiraeli nîmaaumire Hori na makîthiî na njîra îrîa îthiîte îria Îtune nîguo makinye gûkuvî na vûrûri wa Edomu. Wa marî njîrarî, andû nîmaaremirwe nî kûmîrîria.

⁵ Nîmaambîrîrie gûtetia Ngai na Musa makiugaga atîrî, “Mwatûrutire Misiri tûke tûkûre werûrî nîkî? Gûkû gûtirî irio kana manjî, wana tûrî atimbe nî irio ino.”

⁶ Ngai-Mûnene nîwarekirie njoka irîa irî ûrogi na ikîrûma andû a Isiraeli eengî na magîkua.

⁷ Nao andû nîmaathiîre kûrî Musa na makîmwîra atîrî, “Nîtwîvirie rîrîa tûreganire na Ngai-Mûnene na twaregana nawe. Rîu voya Ngai-Mûnene nîguo atûthengutirie njoka ino.” Kwoguo Musa nîwavoere andû.

⁸ Nake Ngai-Mûnene nîwerire Musa atîrî, “Rûtha njoka ya gîcango na ûmîtwîthie vandû îgûrû rîa gîtugî. Mûndû wa wonthe ûkaarûmagwa nî njoka, na wa rîmwe arorie njoka îo, akaavonaga.”

⁹ Kwoguo Musa nîwarûthire njoka ya gîcango na akîmîtwîthia gîtugîrî îgûrû. Mûndû wa wonthe warûmagwa nî njoka, na akîroria njoka îo ya gîcango nîwavonaga.

Rûgendo rwa kûthiî Moabu

¹⁰ Andû a Isiraeli nîmaathiîre na mbere na rûgendo na magîkara Obothi.

¹¹ Kuuma kûu nîmaathiîre kinya Iye-abarimu, werûrî mwena wa îrathîro wa Moabu.

¹² Kuuma kûu nîmaathiîre na magîkara Kîamndarî gîa Zeredi.

¹³ Nîmaacokire makiuma kûu makîthiî na magîkara mwena wa rûgûrû wa rûnjî rwa Arinoni rûrîa rûvîtûkîrîrîte werûrî wa Amori. (Arinoni nîguo warî mûvaka wa Amoabu na Aamori.)

¹⁴ Kîu nîkîo gîatûmire kwandîkwa îvukuurî rîa mbaara cia Ngai-Mûnene atî: “Îtûûra rîa Wahebu rîrî vûrûrirî wa Sufa, ciandarî cia rûnjî rwa Arinoni,

¹⁵ ciandarî kûndû kûrîa kûnyûrûrûku, na kûthiîte nginya îtûûrarî rîa Ari, vakuvî na mûvaka wa Moabu.”

¹⁶ Kuuma kûu nîmaathiîre Beeri. Gîkî nî kîthima varîa Ngai-Mûnene eerîre Musa atîrî, “Îta andû vamwe na nîngûmava manjî.”

¹⁷ Vîndî îo andû a Isiraeli nîmaainire atîrî, “Kîthima nîkîauma manjî, nîtûkûngûîre.

¹⁸ Kîthima kîrîa athamaki meenjire na gîkînjwa nî atongoria a andû, na mûragi wa ûtongoria na mîtî yao.” Andû a Isiraeli nîmaaumire werûrî na makîthiî Matana.

¹⁹ Kuuma kûu nîmaathiîre Nahalieli, na kuuma Nahalieli nîmaathiîre Bamothi.

²⁰ Kuuma Bamothi nîmaathiîre Kîamndarî Kîam vûrûri wa Moabu îgûrû rîa kîrîma Kîam Pisiga kîrîa kîroretie werûrî.

Andû a Isiraeli nîmaûragire athamaki aîrî: Sihoni na Ogu

²¹ Andû a Isiraeli nîmaatûmire anjaama kûrî Sihoni mûthamaki wa Amori makamwîre atîrî,

²² “Twîtîkîrie tûvîtûkîrîre vûrûrirî waku. Tue wana ndîthia cietû tîtuma njîrarî atî nîguo twathûkie mîgûndarî yenyu ya mîthavibu na tîtûnyua manjî ma ithima cienyu. Nîtûthiîra njîrarî îrîa îtagwa Njîra ya Mûthamaki nginya rîrîa tûkauma vûrûrirî waku.”

²³ Nwatî Sihoni ndetîkîria andû a Isiraeli mavîtûkîra vûrûrirî wake. Nîwetire athigari ake a mbaara vamwe na makîthiî Jahazi werûrî na akîtharîkîra andû a Isiraeli.

²⁴ Nwatî andû a Isiraeli nîmaamaûragire, makîmavoota na makîîgwatîra vûrûri wa Amori ûgîtuîka wao, kuuma rûnjîrî rwa Arinoni nginya karûnjîrî ka Jaboku. Maatavire vûrûri ûcio wonthe nginya mûvakarî wa Aamoni ûrîa wagitîrîtwe mûno.

²⁵ Kwoguo andû a Isiraeli nîmegwatîre matûûra monthe ma vûrûri wa Amori, Heburoni na icagi cionthe ciamo.

²⁶ Heshiboni rîarî îtûûra înene rîa mûthamaki Sihoni. Sihoni nîwarûîte na mûthamaki wa Moabu ûrîa wa mbere, na nîwamûvootete na akegwatîra vûrûri wake wonthe nginya rûnjîrî rwa Arinoni.

²⁷ Kîu nîkîo gîtûmaga mwini aina atîrî, “Ûkani Heshiboni îtûûrarî rînene rîa mûthamaki Sihoni, ûkani tûrîtume rîngî.

²⁸ Athigari a mbaara nîmaaumire Heshiboni, maaumire îtûûrarî rînene rîa Sihoni mekariî ta nînîmbî cia mwaki. Maacûkangirie îtûûra rîa Ari vûrûrirî wa Moabu, na magîcûkangia tûrîma twa rûnjî rwa Arinoni.

²⁹ Mue andû a Moabu mûrî arume! Mue andû a arîa mûgocaga Kemoshi mûrî acûkangie; ngai yenyu nîyatûmire arûme matuîke mbûrûrû, na aka matuîke mîgwate ya mûthamaki Sihoni wa Amori.

³⁰ Kwoguo njiarwa ciao nîciacûkangirue, kuuma Heshiboni nginya Diboni, na kuuma Nashimu nginya Nofa vakuvî na Medeba.”

³¹ Kwoguo andû a Isiraeli nîmaatûûrire vûrûrirî wa Amori,

³² nake Musa agîtûma andû makathigane îtûûra rîa Jazeri. Andû a Isiraeli nîmaarînyitire wa vamwe na icagi irîa ciariganîtie na îtûûra rîu, na makîngata Amori arîa maatûûraga kuo.

³³ Andû a Isiraeli nîmaacokire vuva na makîrûmîrîra njîra îrîa yathiîte Bashani. Nake Ogu mûthamaki wa Bashani nîwaumire na athigari ake na makîmatharîkîra marî Ederei.

³⁴ Nwatî Ngai-Mûnene nîwerire Musa atîrî, “Ndûkamwîtigîre, nîûndû nîngûkûvotithia kûmûvoota, andû ake onthe wana vûrûri wake. Mwîke wata ûrîa wekire Sihoni, mûthamaki wa Amori ûrîa wathanaga Heshiboni.”

³⁵ Kwoguo andû a Isiraeli nîmaaûragire Ogu, avîcî ake, na andû ake onthe. Gûtirî mûndû wanarî ûmwe watigarire arî mwoyo. Nîmaacokire magîoca vûrûri wake ûgîtuîka wao.