Ndari 20 - ÎVUKU RÎA ÛVORO MWARO

Manjî kuuma îthigarî

¹ Mweri wa mbere, andû onthe a Isiraeli nîmaakinyire werûrî wa Zini na makîamba magema mao Kadeshi. Miriamu nîwakuîrîre kûu na akîthikwa wa kuo.

² Nakuo kûu Aisiraeli maambîte magema mao gûtiarî na manjî, kwoguo nîmaagomanire vamwe na magîûkîrîra Musa na Aroni,

³ na magîtetia Musa makiugaga atîrî, “Wana kava tûngîakuîrîre mbere ya îgema rîa gûcemanîrua vamwe na Aisiraeli acio engî.

⁴ Watûretire gûkû werûrî nîguo tûkuîre kuo vamwe na ndîthia yetû?

⁵ Watûrutire Misiri nîkî na ûgîtûrete gûkû gûcûku ûguo na gûtakûraga kîndû? Gûtirî irio cia mîgûnda, ngûû, thavibu, kana ngûngûmanga; na gûtirî manjî ma kûnyua.”

⁶ Musa na Aroni nîmaathengutîre andû na makîthiî makîrûngama mûromorî wa îgema rîa Ngai-Mûnene. Nîmaaturumithirie mothiû mao nthî, naguo riiri wa Ngai-Mûnene ûkîmaumîrîra.

⁷ Ngai-Mûnene nîwerire Musa atîrî,

⁸ “Oca mûragi waku, na mûrî na mûrwanyûkwe Aroni mwîte andû onthe a Isiraeli vamwe, ûcoke wîre îthiga riume manjî andû onthe makîonaga. Ûguo nîguo ûkaaruta manjî kuuma îthigarî ma kûnyuwa nî andû, makaanyua onthe vamwe na ndîthia yao.”

⁹ Musa nîwathiîre na agîoca mûragi wata ûrîa aathîtwe nî Ngai-Mûnene.

¹⁰ Ke na Aroni nîmeetire andû onthe na magîcemania vau mbere ya îthiga. Musa nîwamerire atîrî, “Rîu tanthikîrîriani mue aregi aya! Nîmûkwenda tûmûrutîre manjî îthigarî rîîrî?”

¹¹ Musa nîwacokire agîûkîrîria mûragi wake na akîringa îthiga rîu naguo maita maîrî. Namo manjî meengî mûno nîmaaumire îthigarî rîu. Nao andû onthe a Isiraeli vamwe na ndîthia ciao nîmaanywire manjî.

¹² Ngai-Mûnene nîwacokire akîra Musa na Aroni atîrî, “Nîûndû nîmwaregire kûmbîtîkia na kwonania ûtheru wakwa mbere ya andû a Isiraeli, mûtigaakinyia andû aya vûrûrirî ûrîa namaveere.”

¹³ Ûndû ûyû wekîkîre Meriba, kûrîa andû a Isiraeli maateterie Ngai-Mûnene, na marî kûu nîwamoonirie ûtheru wake.

Mûthamaki wa Edomu nîwaregire Aisiraeli mavîtûka

¹⁴ Musa nîwatûmire anjaama kuuma Kadeshi mathiî kûrî mûthamaki wa Edomu. Anjaama acio nîmaaugire atîrî, “Mûrwanyûkwe Isiraeli auga atî, we nîwîcî mathîna monthe marîa twonete.

¹⁵ Nîmwîcî ûrîa methe metû maathiîre Misiri, na ûrîa twatûûrire Misiri mîaka mîngî, wana ûrîa andû a Misiri maatûnyamaririe wa vamwe na methe metû,

¹⁶ na tûkîrîrîra Ngai-Mûnene nîguo atûtethie. Ngai-Mûnene nîwegwire kîrîro gîetû na agîtûma mûraika ûrîa watûrutire Misiri. Rîu tûrî Kadeshi, îtûûra rîrîa rîrî mûvakarî wa vûrûri waku.

¹⁷ Rîu twîtîkîrie tûvîtûkîrîre vûrûrirî waku. Tue vamwe na ndîthia cietû tîtuma njîrarî kana tûthiî kîthakarî, kana mîgûndarî yaku na tîtûnyua manjî ithimarî ciaku. Nîtwîkara njîrarî îrîa îtagwa Njîra ya Mûthamaki nginya rîrîa tûkauma vûrûrirî waku.”

¹⁸ Nwatî andû a Edomu nîmaamûcokerie atîrî, “Tue nîtwarega mûvîtûkîrîra vûrûrirî wetû. Mûngîgeria kûvîtûkîrîra kuo, nîtûka na tûmûtharîkîre.”

¹⁹ Nao andû a Isiraeli nîmaaugire atîrî, “Tue nîtwîkara Njîrarî ya Mûthamaki, na ethîrwa tue kana ndîthia cietû nîtûkaanyua manjî kuuma ithimarî cienyu, nîtûkamûrîva. Ûndû ûrîa tue tûrenda nî kûvîtûka tu.”

²⁰ Nwatî mûthamaki ûcio nîwamacokerie wa rîngî atîrî, “Mûtikaavîtûkîrîra kuo.” Nîwacokire akîthithûkîra andû a Isiraeli na mbûtû nene ya athigari marî na indo cia mbaara.

²¹ Aisiraeli nîmaagarûrûkire na makîthiî njîra îngî nîûndû mûthamaki wa Edomu nîwaregire mavîtûkîrîra vûrûrirî wake.

Gûkua kwa Aroni

²² Andû onthe a Isiraeli nîmaaumire Kadeshi na magîkinya kîrîmarî Kîam Hori,

²³ kîrîa Kîamrî mûvakarî wa vûrûri wa Edomu. Nake Ngai-Mûnene nîwerire Musa na Aroni atîrî,

²⁴ “Aroni tîatonya vûrûri ûrîa neranîre atî nîngaava andû a Isiraeli. Ke nîagûkua nîûndû mue muoîrî nîmwareganire na ûrîa namwathire nîrî Meriba.

²⁵ Oca Aroni na mûvîcî Eliazaru mûthiî kîrîmarî Kîam Hori,

²⁶ ûcoke ûrute Aroni nguo ciake cia ûthînjîri-Ngai na ûciîkîre mûvîcî Eliazaru. Vau nîvo Aroni agaakuîra.”

²⁷ Nake Musa nîwekire ûrîa Ngai-Mûnene aamwathire. Nîmaaunûkirie kîrîmarî Kîam Hori kûrîa andû onthe maarî.

²⁸ Musa nîwarutire Aroni nguo cia ûthînjîri-Ngai na agîciîkîra Eliazaru mûvîcî wa Aroni. Aroni nîwakuîrîre kûu îgûrû rîa kîrîma, nake Musa na Eleazaru makiuma kîrîmarî.

²⁹ Rîrîa andû onthe a Isiraeli maamenyire atî Aroni nîwakua, nîmaamûcakaîre îvinda rîa mîthenya mîrongo îthatû.