Ndari 19 - ÎVUKU RÎA ÛVORO MWARO

Mambura ma kwîtheria

¹ Ngai-Mûnene nîwathire Musa na Aroni

² meere andû a Isiraeli mamaretere mori ndune îtarî na wonje na îtaanaigîrîrwa îcoki,

³ na mamînenganîre kûrî Eliazaru, mûthînjîri-Ngai. Nayo nîîkarutwa nja ya kûrîa andû matûûraga na yûragwe akîonaga.

⁴ Mûthînjîri-Ngai Eliazaru nîagaatombeka Kîamra gîake nthakamerî ya mori îo na amîminjaminje maita mûgwanja vau nja ya îgema rîa Ngai-Mûnene.

⁵ Nayo mori îo yonthe, rûo, nyama, nthakame, na nyama cia nda ikaavîvua mûthînjîri-Ngai akîonaga.

⁶ Mûthînjîri-Ngai nîagoca mûtî wa mûtarakwe, hisofu na rûrigi rûrû rûtune na acikie mwakirî ûcio.

⁷ Mûthînjîri-Ngai nîagaacoka athambie nguo ciake, na ethambie mwîrî na atonye kûrîa mambîte magema. Nwatî mûthînjîri-Ngai ageekara atarî mûtheru nginya kîvwaî.

⁸ Mûndû ûrîa ûkaavîvia mori nwanginya wanake akaathambia nguo ciake na ethambie mwîrî, nwatî wanake ageekara atarî mûtheru nginya kîvwaî.

⁹ Mûndû ûrîa mûtheru nîagoca mûu wa mori îo, awîkîre vandû vatheru, na awige nja ya kûrîa andû matûûraga. Mûu ûcio nî wa andû a Isiraeli ûrîa magaatûmagîra makîvarîria manjî ma kwîtheria. Mambura mama nîma kûtheria mevia.

¹⁰ Mûndû ûrîa ûkaaûngania mûu nwanginya akaathambia nguo ciake, nwatî akeethîrwa atarî mûtheru nginya kîvwaî. Watho ûyû nîûtûûra ûrûmagîrîrwa nî andû a Isiraeli wa vamwe na ageni arîa matûûranagia nao.

Kûvutania na kimba

¹¹ Mûndû wa wonthe ûkaavutia kimba Kîam mûndû akethagîrwa atarî mûtheru îvinda rîa mîthenya mûgwanja.

¹² Ke aketheragia na manjî mûthenya wa kathatû na mûthenya wa mûgwanja nîguo ethîrwe arî mûtheru. Nwatî angîrega kwîtheria mûthenya wa kathatû na wa mûgwanja, mûndû ûcio akethagîrwa atarî mûtheru.

¹³ Mûndû wa wonthe ûvutagia kimba Kîam mûndû na akarega kwîtheria ethagîrwa atarî mûtheru, nîûndû tî mûminjîrie manjî ma kwîtheria. Angîthiî îgemarî rîa Ngai-Mûnene nwa arîgwatie gîko na ndakethagîrwa arî ûmwe wa andû a Ngai-Mûnene.

¹⁴ Mûndû angîkuîra îgemarî, andû arîa marî îgemarî kavindarî kau na arîa mangîcoka gûtonya îgemarî rîu makeethîrwa matarî atheru îvinda rîa mîthenya mûgwanja.

¹⁵ Mîtûngi na nyûngû irîa ikeethîrwa irî îgemarî na îtarî ngunîke ikeethîrwa itarî ntheru.

¹⁶ Mûndû angîvutia kimba Kîam mûndû aûragîtwe kana akuîte, kana mûndû angîvutia îvîndî rîa mûndû mûkuû, kana mbîrîra, mûndû ûcio akethagîrwa atarî mûtheru îvinda rîa mîthenya mûgwanja.

¹⁷ Nîguo mûthengutie gîko, mûu wa mori nî ûgoocwa wîkîrwe nyûngûrî na aûtukanie na manjî matheru matavîtwe vandû varîa matherûkaga.

¹⁸ Mûndû ûrîa mwîtheriu nîagoca hisofu na amîrinde manjîrî, na acoke aminjaminjîrie îgema, na indo cionthe irîa irî kuo vamwe na andû arîa marî kuo. Nîagaacoka aminjîrie manjî mûndû ûrîa ûkeethîrwa avutîtie îvîndî rîa mûndû mûkuû, kimba kana mbîrîra.

¹⁹ Mûthenya wa kathatû na wa mûgwanja, mûndû ûrîa mûtherie nîakaaminjîria mûndû ûrîa ûtarî mûtherie manjî. Mûthenya wa mûgwanja, nîakaathambia nguo ciake na acoke ethambie mwîrî na ekare atarî mûtheru kinya kîvwaî.

²⁰ Mûndû ûrîa wîthagîrwa atarî mûtheru na akarega kwîtheria, mûndû ûcio akaathengutagua kûrî andû a Ngai-Mûnene nîûndû nîagwatîtie îgema rîa Ngai-Mûnene gîko nîûndû tî mûminjîrie manjî ma kwîtheria.

²¹ Watho ûyû nîûtûûra ûrûmagîrîrwa. Mûndû ûrîa ûminjaminjaga manjî mau ma kwîtheria wanake akathambagia nguo ciake. Mûndû ûrîa ûvutagia manjî mau ma kwîtheria ethagîrwa atarî mûtheru nginya kîvwaî.

²² Kîndû wa kîonthe gîkaavutua nî mûndû atarî mûtheru gîkethagîrwa gîtarî kîtheru, na mûndû wîngî wa wonthe ûkaavutia kîndû kîu akethîrwa atarî mûtheru nginya kîvwaî.