Ndari 18 - ÎVUKU RÎA ÛVORO MWARO

Mawîra ma athînjîri-Ngai na Alawi

¹ Ngai-Mûnene nîwerire Aroni atîrî, “We, avîcî aku, vamwe na andû a nyomba yaku nî mue mûkaaverithua kûngîkaagîa na mavîtia marûthîrîtwe varîa Vatheru. Nwatî we na avîcî aku nîmue mûkaaverithua nîûndû wa mavîtia marîa makaaumana na ûthînjîri-Ngai.

² Kwoguo îta andû enyu a mûvîrîga wa Lawi nîguo mamûtethagie rîrîa we na avîcî aku mûratungata îgemarî rîa gûcemanîrua.

³ Makaarutaga mawîra marîa ûkaamavecaga, na matungatage îgemarî. Nwatî matiagîrîrwe nî gûkuvîvîria indo cia vandû varîa vatheru kana metha ya kîgongoona, nîûndû mûngîgeeka ûguo, we wana o, nî mûgaakua.

⁴ Mûkaarutithanagia wîra vamwe nao, na mûrutage mawîra monthe ma îgema rîa Ngai-Mûnene. Gûtirî mûndû wîngî ûkaagûkuvîvîria.

⁵ We vamwe na avîcî aku nwanginya mûmenyagîrîre Vandû varîa Vatheru wa vamwe na metha ya kîgongoona nîguo ndikarakare rîngî nîûndû wa andû a Isiraeli.

⁶ Nie nînie nthuurîte andû enyu, Alawi kuuma kûrî andû a Isiraeli marî kîveo kûrî mue, na ngamûrîrwa o nîguo matungatage îgemarî rîa Ngai-Mûnene.

⁷ Nwatî we na avîcî aku muenga mûkaarutaga na kinyi mawîra monthe marîa mûthînjîri-Ngai agîrîrwe nî kûruta metharî ya kîgongoona na varîa vatheru Mûno. Mau nîmo mawîra marîa mûkaarutaga, nîûndû nînîmûvete kîveo Kîam gûtuîka athînjîri-Ngai. Mûndû wîngî wa wonthe ûrîa ûgaakuvîvîria varîa vatheru Mûno nî akaaûragagwa.”

Gîcunjî kîa athînjîri-Ngai

⁸ Ngai-Mûnene nîwerire Aroni atîrî, “Nînakûva we vamwe na njiarwa ciaku matega monthe marîa ndutîrîtwe nî andû a Isiraeli. Nînamûva indo icio cionthe irî gîcunjî kîenyu na nîitûûra irî cienyu.

⁹ Gatagatîrî ka matega marîa matheru ma indo irîa itavîvagîrua îgûrû rîa metha ya kîgongoona nîcio ikethagîrwa irî cienyu: matega ma irio cia mûgûnda, matega ma kûtheria mevia, matega ma kûthiria mavîtia. Indo cionthe irîa ndegagîrwa irî ntheru mûno ikethagîrwa irî ciaku na avîcî aku.

¹⁰ Mûkaarîcaga indo icio mûrî vandû varîa vatheru Mûno. Arûme onga nîo makairîcaga, na kûrî mue indo icio ikethagîrwe irî ntheru.

¹¹ “Matega mengî marîa andû a Isiraeli makandutagîra makethagîrwa marî maku. Nînakûva cio we, avîcî aku, erîtu aku nîguo matûûre marî menyu. Mûndû wa wonthe wa mûciî waku ûrîa ûkethagîrwa arî mûtheru nîakaarîcaga matega mau.

¹² “Nînakûva matega monthe maro marîa andû a Isiraeli makaandutagîra wa mwaka. Namo nî: maguta ma ndamaiyû, ndivei na irio cia mîgûnda.

¹³ Maciaro ma mbere ma irio cia mîgûnda irîa mategagîra Ngai-Mûnene nî ciaku. Mûndû wa wonthe wa mûciî waku ûrîa ûkethagîrwa arî mûtheru nîakaarîcaga irio icio.

¹⁴ “Indo cionthe irîa nyamûre na irî Isiraeli nî cienyu.

¹⁵ “Marikithathi monthe ma anake kana ma nyamû cia nûme marîa ngaarutagîrwa nî andû a Isiraeli makethagîrwa marî menyu. Nwatî nwanginya mûrutage îrîvi rîa gûkûûra marikithathi monthe ma anake, na mûrutage îrîvi rîa gûkûûra marikithathi monthe ma nyamû cia nûme irîa irî mûgiro.

¹⁶ Ciana cia anake igaakûûragwa irî na ûkûrû wa mwaka ûmwe. Igaakûûragwa na tûcunjî tûtano twa sîlûva, kûringana na kîthimi kîrîa gîtîkîrîku.

¹⁷ Nwatî mûtigaakûûraga marikithathi ma ng'ombe, ng'ondu na mbûri nîûndû nî ntheru. Mûkaaminjaminjaga nthakame yacio metharî ya kîgongoona na mûvîvagie maguta ma cio rîrî îtega rîa irio. Mûtararûko ûcio nîûkenagia Ngai-Mûnene.

¹⁸ Nyama cia nyamû icio ikethagîrwa irî ciaku wata ûrîa nyama ya kîthûri na ya kûgûrû kwa ûrîo kwa vuva cia îtega rîa mwanya ciîthagîrwa irî ciaku.

¹⁹ “Nînakûva we avîcî aku na erîtu aku matega monthe ma mwanya marîa andû a Isiraeli makaandutagîra matûûre marî menyu. Gîkî nîgîtûûra kîrî kîrîkanîro gîakwa nawe na njiarwa ciaku na gîtikaagarûrwa.”

²⁰ Ngai-Mûnene nîwerire Aroni atîrî, “Ndûkagaa wanarî kîndû vûrûri wa andû a Isiraeli, kana ûvewe gîcunjî wanarî kîmwe Kîam vûrûri ûcio. Nie nînie gîcunjî gîaku na îgai rîaku.”

Gîcunjî kîa Alawi

²¹ Ngai-Mûnene nîwaugire atîrî, “Nîmvete Alawi icunjî cionthe cia îkûmi irîa andû a Isiraeli mandutagîra irî îgai rîao rîtuîke îrîvi rîao nîûndû wa gûtungata îgemarî rîa Ngai-Mûnene.

²² Kuuma rîu andû acio engî a Isiraeli matigakuvîvîrie îgema rîa Ngai-Mûnene nîguo matikevie meretera gîkuû.

²³ Nwatî Alawi onga nîo magaatungataga îgemarî rîa Ngai-Mûnene na marîmenyagîrîre. Watho ûyû nîwagûtûûra ûrûmagîrîrwa nî njiarwa cionthe ciaku. Alawi matikagaa kîndû vûrûri wa Isiraeli,

²⁴ nîûndû nînîmavete icunjî cia îkûmi irîa andû a Isiraeli mandutagîra rîrî îgai rîao. Kîu nîkîo gîatûmire nîmere atî matikagaa kîndû vûrûrirî wa Isiraeli.”

Matega ma Alawi

²⁵ Ngai-Mûnene nîwacokire akîîra Musa

²⁶ ere Alawi atîrî, “Mwamûkîra gîcunjî gîa îkûmi kuuma kûrî andû a Isiraeli kîrîa nîmûvete kîrî îgai rîenyu, mûkaarutagîra Ngai-Mûnene gîcunjî gîa îkûmi kuuma kûrî îgai rîu, gîcunjî gîa îkûmi kuuma kûrî gîcunjî gîa îkûmi.

²⁷ Îtega rîu rîkaamûkagîrwa rîrî irio cia mûgûnda na ndivei irîa mûrîmi andutagîra.

²⁸ Ûguo nîguo ûkarutagîra Ngai-Mûnene îtega rîa mwanya kuuma kûrî icunjî cionthe cia îkûmi irîa wamûkagîra kuuma kûrî andû a Isiraeli. Ûkaavecanaga îtega rîu rîa mwanya rîa Ngai-Mûnene kûrî mûthînjîri-Ngai Aroni.

²⁹ Ûkaavecaga Ngai-Mûnene kîveo kîrîa Kîamro mûno kuumana na iveo cionthe irîa ûkaamûkagîra.

³⁰ Warîkia kûvecana kîveo kîrîa Kîamro mûno, nwa wige icio ciîngî wata ûrîa mûrîmi aigaga indo irîa ciatigara arîkia kûruta îtega rîake.

³¹ We na andû a mûciî waku nwa mûrîîre irio icio ciîngî vandû wa vonthe nîûndû rîu nîrîo îrîvi rîenyu nîûndû wa gûtungata îgemarî rîa Ngai-Mûnene.

³² Mûtikethîrwa mwîkîte naaî nîûndû wa kûrîa matega mau, ethîrwa mûkethagîrwa mûrutîrîte Ngai-Mûnene marîa maro mûno kuuma kûrî mo. Nwatî menyagîrîrani mûtigatûmagîre naaî iveo irîa nyamûre cia andû a Isiraeli na njîra ya kûrîa wanarî kîmwe gîa cio mbere ya kîrîa Kîamro mûno gîa cio kîrutîrwa Ngai-Mûnene. Mûngîgeeka ûguo, nîmûkaaûragwa.”