Ndari 17 - ÎVUKU RÎA ÛVORO MWARO

Mûragi wa Aroni

¹ Ngai-Mûnene nîwerire Musa atîrî,

² “Îra andû a Isiraeli makûve mîragi îkûmi na îîrî. Mûtongoria wa wonthe wa mûvîrîga nîakûve mûragi ûmwe, na wandîke rîîtwa rîake mûragirî ûcio wake.

³ Andîka rîîtwa rîa Aroni mûragirî ûrîa ûrûngamîrîrîte mûvîrîga wa Alawi. Mûtongoria wa wonthe wa mûvîrîga nîethîrwe arî na mûragi ûmwe.

⁴ Vira mîragi îo îgemarî rîa Ngai-Mûnene vau mbere ya îthandûkû rîa kîrîkanîro, varîa njemanagia nawe.

⁵ Mûragi wa mûndû ûrîa ngaathuura nîûkaauma mathangû. Ûguo nîguo ngaathiria mateta marîa andû a Isiraeli methagîrwa namo îgûrû rîaku.”

⁶ Kwoguo Musa nîwaririe na andû a Isiraeli. Nao atongoria ao nîmaamûnengere mûragi ûmwe kuuma kûrî wa mûtongoria wa mûvîrîga. Mîragi yonthe yarî îkûmi na îîrî. Mûragi wa Aroni nîwaigirwe vamwe na mîragi îo.

⁷ Musa nîwacokire akiga mîragi îo mbere ya Ngai-Mûnene kûu îgemarî rîa gûcemanîrua.

⁸ Rîrîa Musa aathiîre îgemarî rîa gûcemanîrua mûthenya ûcio warûmîrîrîte, nîwamakire ona mûragi wa Aroni, ûrîa warûngamîrîrîte mûvîrîga wa Lawi nîwaumîte mathangû, ûkathundia, ûgatumûra marao na ûgaciara matunda matune ma mûrothi.

⁹ Musa nîwocire mîragi yonthe na akîonia andû a Isiraeli. Nao nîmoonire ûrîa gwekîkire na wa mûtongoria nîwocire mûragi wake.

¹⁰ Nake Ngai-Mûnene nîwerire Musa atîrî, “Cokia mûragi wa Aroni na ûwige vau mbere ya îthandûkû rîa kîrîkanîro. Naguo ûkethagîrwa ûrî wa gûkaania andû a Isiraeli arîa magûkararagia atî marega gûtiga gûteta nîmagaakua.”

¹¹ Musa nîwekire wata ûrîa Ngai-Mûnene aamwathire.

¹² Nao andû a Isiraeli nîmeerire Musa atîrî, “Taroria! Nîtwathira! Nîtwathira tuonthe!

¹³ Mûndû wa wonthe ûgaakuvîvîria îgema rîa Ngai-Mûnene nîagaakua. Nîkwa tûgaakua tuonthe?”