Ndari 16 - ÎVUKU RÎA ÛVORO MWARO

Kora, Dathani, Abiramu nîmaareganire na Musa

¹ Kora mûvîcî wa Iziharu aarî Mûlawi kuuma mûvîrîgarî wa Kohathu. Kora nîwetire Dathani, Abiramu na Oni a kuuma mûvîrîgarî wa Reubeni,

² na marî vamwe na atongoria magana maîrî ma mîrongo îtano (250) arîa maathuurîtwe kuuma gatagatîrî ka andû a Isiraeli nîmaatuire maregane na ûtongoria wa Musa.

³ Nîmaathiîre kûrî Musa na Aroni na makîmeera atîrî, “Mue rîu nîmwatûra gacere! Andû onthe a Isiraeli nî a Ngai-Mûnene na arî vamwe nao. Musa, nîndûî kîratûma wînenevia gûkîra andû aya onthe a Ngai-Mûnene?”

⁴ Rîrîa Musa eegwire ûguo, nîwaturumithirie ûthiû wake nthî.

⁵ Nîwacokire akîra Kora na arûmîrîri ake onthe atîrî, “Rûyû kîraûko Ngai-Mûnene nîagaatwonia mûndû ûrîa athuurîte atuîke wake. Mûndû ûcio nîke ûkaavotithagua nî Ngai-Mûnene kûthiî metharî yake.

⁶ We Kora na arûmîrîri aku îkani atîrî: ocani tûnyûngû twa kûvîvîria ûbani,

⁷ na rûyû mûgeekîra makara marî na mwaki na ûbani na mûûvîvîrie metharî ya kîgongoona, na nîtûkaamenya mûndû ûrîa Ngai-Mûnene athuurîte. Mue Alawi mûrî atûru gacere!”

⁸ Musa nîwacokire akîra Kora atîrî, “Tathikîrîriani mue Alawi!

⁹ Mue nîmwîcî atî Ngai wa Isiraeli aamûthuurire kuuma gatagatîrî ka andû acio engî a Isiraeli na akîmûtua a gûtungata îgemarî rîa Ngai-Mûnene na gûtongoria andû a Isiraeli kûgooca Ngai-Mûnene na njîra îrîa yagîrîrîte. Nî ûndû ûrîkû wîngî mûrenda?

¹⁰ Ngai-Mûnene nîakûvete gîtîîo gîa kwîthagîrwa ûrî vakuvî nake we mwene na Alawi acio engî. Rîu nîkwa wana mûrenda gûtuîka athînjîri-Ngai?

¹¹ Kwoguo rîrîa we na arûmîrîri aku onthe mûrateta nî Ngai-Mûnene mûraregana nake. Aroni nû atî nîguo mûtete nîke?”

¹² Musa nîwatûmanîre Dathani na Abiramu avîcî a Eliabu metwe. Nwatî nîmaaugire atîrî, “Tîtûka!

¹³ Ûguo wekire nî mwîganu! Watûrutire Misiri vûrûri warî na îriia na ûûkî, na ûgîtûrete gûkû werûrî nîguo ûtûragîre kuo? Wana rîu ûrenda gûtwatha?

¹⁴ Nama we ndwanatûkinyia vûrûrirî ûrîa wîcûrîte îriia na ûûkî, na ndwanatûgaîra ithaka na mîgûnda ya mîthavibu îtuîke yetû. Ûreciria nwa ûveenie andû aya onthe? Tîtûka!”

¹⁵ Musa nîwarakarire mûno na akîra Ngai-Mûnene atîrî, “Ndûkamûkîre matega mao. Gûtirî kîndû wanarî kîmwe Kîamo mbocete, na ndirî mûvîtîriu mûndû wanarî ûmwe gatagatîrî kao.”

¹⁶ Musa nîwerire Kora atîrî, “Rûyû we vamwe na arûmîrîri aku onthe magana maîrî ma mîrongo îtano (250), nwanginya mûgaaûka îgemarî rîa gûcemanîrua. Aroni wanake akethîrwa arî vo.

¹⁷ Wa mûndû gatagatîrî kenyu agooca kanyûngû ga kûvîvîrua ûbani, na ekîre ûbani na aûvire metharî ya kîgongoona.”

¹⁸ Kwoguo wa mûndû nîwocire kanyûngû ga kûvîvîrua ûbani, agîkîra makara marî na mwaki, na ûbani. Andû onthe nîmaarûngamire marî na Musa na Aroni mûromorî wa îgema rîa Ngai-Mûnene.

¹⁹ Kora nîwetire arûmîrîri ake onthe arîa maareganîte na Musa na Aroni na makîrûngama mûromorî wa îgema rîa Ngai-Mûnene. Naguo riiri wa Ngai-Mûnene nîwaumîrîre andû acio onthe.

²⁰ Nake Ngai-Mûnene nîwerire Musa na Aroni atîrî,

²¹ “Umani varî andû aya nîguo nîmathirie wa rîmwe!”

²² Nwatî Musa na Aroni nîmaaturumithirie mothiû mao nthî na makiuga atîrî, “We Ngai, nîwe kiumo gîa ûtûûro wa andû onthe. Mûndû ûmwe angîkûvîtîria ûrakaragua nî andû onthe?”

²³ Ngai-Mûnene nîwerire Musa atîrî,

²⁴ “Îra andû onthe maume kûrîa Kora, Dathani na Abiramu mambîte magema.”

²⁵ Nake Musa vamwe na atongoria onthe a Isiraeli nîmaathiîre kûrî Dathani na Abiramu.

²⁶ Musa nîwerire andû atîrî, “Umani magemarî ma andû aya evia mûrûngame varaca nao, na mûtikavutie kîndû wanarî kîmwe Kîamo, kana mûthiranîrue vamwe nao nîûndû wa mevia mao.”

²⁷ Kwoguo andû onthe nîmaaumire magemarî ma Kora, Dathani na Abiramu. Nao Dathani na Abiramu nîmaaumire na makîrûngama mîromorî ya magema mao vamwe na aka ao, na ciana ciao.

²⁸ Musa nîwacokire akîmeera atîrî, “Ûndû ûyû nîguo ûkaamûmenyithia atî nî Ngai-Mûnene wandûmire mbîke maûndû mama monthe, na atî tînie nathuurire kûmeka.

²⁹ Andû aya mangîkua mataverithîtue wata ûrîa andû arîa engî makucaga nîngaamenya atî Ngai-Mûnene ndaandûma.

³⁰ Nwatî ethîrwa Ngai-Mûnene nwa eke ûndû mûgeni ûtaaneguwa, na nthî îvingûke îmamerie vamwe na indo cionthe ciao na mathiî marî mwoyo kûrîa arîa akuû mathiîcaga, vîndî îo nîrîo mûkaamenya atî andû aya nî mareganîte na Ngai-Mûnene.”

³¹ Rîrîa Musa aarîkirie kwaria maûndû mau monthe, vau nthî varîa Dathani na Abiramu maarî, nîvaatûkire

³² na makîmerua marî na andû a nyomba ciao vamwe na arûmîrîri onthe a Kora na indo ciao cionthe.

³³ Kwoguo maamerirue nî nthî marî mwoyo wa vamwe na indo ciao cionthe. Nthî nîyacokanîrîre nao makîûrîra na kûu nthî kûrîa akuû mathiîcaga.

³⁴ Andû onthe a Isiraeli arîa maarî vau, nîmaaûrire megua kîrîro Kîamo. Maaûrire makiugaga atîrî, “Nthî yavota gûtûmeria wanatue!”

³⁵ Naguo mwaki nîwaumire îgûrû na ûgîûka ûkîvîvia andû magana maîrî ma mîrongo îtano (250) arîa maategagîra Ngai-Mûnene ûbani.

Tûraî twa mwaki

³⁶ Ngai-Mûnene nîwacokire akîra Musa atîrî,

³⁷ “Îra Eliazaru mûvîcî wa mûthînjîri-Ngai Aroni, arute tûnyûngû twa kûvîvîrua ûbani, acoke avaraganie makara ma mwaki ûcio kûraca nîûndû tûraî tûu twa mwaki nî tûtheru.

³⁸ Tûnyûngû tûu twa andû arîa maaûragirwe nîûndû wa wîvia wao nîtûturwe tûtuîke ikunîko cia metha ya kîgongoona, nîûndû nî twatuîkire tûtheru vîndî îrîa twavirirwe metharî ya kîgongoona. Kîu gîgaatuîka kîririkano kûrî andû a Isiraeli.”

³⁹ Kwoguo Eliazaru mûthînjîri-Ngai nîwocire tûnyûngû tûu na agîtûtura na tûgîtuîka gîkunîko Kîam metha ya kîgongoona.

⁴⁰ Ngai-Mûnene nîwathîte Eliazaru na njîra ya Musa atî gûtirî mûndû wanarî ûmwe ûtarî wa rûciaro rwa Aroni ûkaathiî kûvîvîria ûbani metharî ya kîgongoona. Kwoguo gîkunîko kîu Kîamririkanagia andû a Isiraeli atî mûthînjîri-Ngai ûtarî wa rûciaro rwa Aroni angîka ûguo agaakua ta Kora na arûmîrîri ake.

Aroni nîwavonokirie andû a Isiraeli

⁴¹ Mûthenya ûcio warûmîrîrîte, andû onthe a Isiraeli nîmaatetirie Musa na Aroni makîmeeraga atîrî, “Nîmwaûraga andû a Ngai-Mûnene.”

⁴² Na vîndî îo andû a Isiraeli maagomanîte makîreganaga na Musa na Aroni, nîmaavûgûkîre îgema rîa Ngai-Mûnene na makîona rîkunîkîrîtwe nî îtu. Naguo riiri wa Ngai-Mûnene nîwaumîrire.

⁴³ Musa na Aroni nîmaathiîre makîrûngama vau mbere ya îgema rîa Ngai-Mûnene.

⁴⁴ Nake Ngai-Mûnene nîwerire Musa atîrî,

⁴⁵ “Thengutîra andû aya a Isiraeli nîguo nîmathirie wa rîu!” Nao oîrî nîmaaturumithirie mothiû mao nthî,

⁴⁶ na Musa akîra Aroni atîrî, “Oca kanyûngû gaku ga kûvîvîrua ûbani na ûgekîre makara marî na mwaki kuuma metharî ya kîgongoona na wîkîre ûbani makararî, ûvinyûre na ûbani ûcio kûrî andû a Isiraeli na ûrute îgongoona rîa kûtheria mevia mao. Ngai-Mûnene nîmûrakarie nî o, na nîmwambîrîriu kûmathiria.”

⁴⁷ Kwoguo Aroni nîwekire wata ûrîa Musa athanîte. Nîwavinyûrire na akîthiî gatagatî ka andû arîa maagomanîte. Rîrîa oonire atî mûthiro warî mwambîrîriu nîwekîrire ûbani karaîrî karî na makara ma mwaki, na akîruta îgongoona rîa kûtheria mevia ma andû.

⁴⁸ Na rîrîa aarûngamire gatagatî ka andû arîa maarî mwoyo na arîa akuû, mûthiro nîwathirire.

⁴⁹ Andû onthe arîa maakwire vîndî ya mûthiro ûcio maarî ngiri îkûmi na inya na magana mûgwanja (14,700) gûtatarîtwe arîa maakuire vîndî ya Kora.

⁵⁰ Rîrîa mûthiro wathirire, Aroni nîwacokire kûrî Musa mûromorî wa îgema rîa Ngai-Mûnene.