Ndari 15 - ÎVUKU RÎA ÛVORO MWARO

Mawatho megiî magongoona

¹ Ngai-Mûnene nîwerire Musa atîrî,

² “Îra andû a Isiraeli atî, rîrîa mûgaakinya vûrûrirî ûrîa ngaamûva mûtûûre,

³ nî mûkaandutîra matega ma kûvîvua ma ndegwa, ndûrûme, ng'ondu kana mbûri, marî matega ma kûngenia. Nwa mûrute matega na njîra ya kwîyendera kana nîûndû wa kûvingia mwîvîtwa kana nîûndû wa mambura marîa mûrutaga ma kîndini. Mûtararûko wa îgongoona rîîrî nî ûngenagia.

⁴ Mûndû ûrîa ûkaarutaga matega mau akaarutanagîria vamwe na matega ma irio cia mûgûnda ma kilo îmwe ya mûtu mûvinyu ûtukanîtue na lita îmwe ya maguta ma ndamaiyû.

⁵ Rîrîa akûruta ndûrûme kana mbûri îrî îtega rîa kûvîvua kana rîrî îgongoona, akaarutanagîria na lita îmwe ya ndivei îrî îtega rîa indo cia kûnyuwa.

⁶ Rîrîa ndûrûme îkûrutwa, îrutanagîrue vamwe na kilo igîrî cia mûtu mûvinyu ûtukanîtue na lita îmwe na nuthu ya maguta ma ndamaiyû,

⁷ na lita îmwe na nuthu ya ndivei îrî îtega rîa indo cia kûnyuwa. Mûtararûko wa matega mau nî ûngenagia.

⁸ Rîrîa ndegwa îkûrutwa îrî îtega rîa kûvîvua kana îtega rîa kûvingia mwîvîtwa, kana îgongoona rîa kûvingia mwîvîtwa, kana îtega rîa thayû,

⁹ îkaarutanagîrua na kilo îthatû cia mûtu mûvinyu ûtukanîtue na lita igîrî cia maguta ma ndamaiyû,

¹⁰ vamwe na lita igîrî cia ndivei irî îtega rîa indo cia kûnyuwa. Mûtararûko wa îgongoona rîîrî nî ûngenagia.

¹¹ “Indo icio nîcio ikaarutanagîrua na ndegwa, ndûrûme, tûtûrûme kana twori,

¹² na ikongagîrîrwa kûringana na mwîgana wa nyamû irîa ikûrutwa.

¹³ Ûguo nîguo andû onthe a Isiraeli magekaga rîrîa makûrutîra Ngai-Mûnene matega ma kûvîvua marî mûtararûko wa kûmûkenia.

¹⁴ Ethîrwa ageni arîa mûtûûranagia nao kana mûgeni wa wonthe ararîrîrîte kwenyu nî makwenda kûruta matega ma kûvîvua marî mûtararûko wa gûkenia Ngai-Mûnene, wanao magekaga wa tamue.

¹⁵ Kwoguo nî mûtûûra mûrûmagîrîra watho ûyû mûrî na ageni arîa mûtûûranagia nao. Mue wana ageni acio mûrî ûndû ûmwe mbere ya Ngai-Mûnene.

¹⁶ Mue vamwe nao mûkaarûmagîrîra watho na kîrîra kîmwe.”

¹⁷ Ngai-Mûnene, nîwerire Musa atîrî,

¹⁸ “Aria na andû a Isiraeli atî rîrîa mûgaakinya vûrûrirî ûrîa ngaamûva,

¹⁹ na mûrîe irio kuuma vûrûrirî ûcio mûkaandutîra gîcunjî kîmwe Kîam irio icio.

²⁰ Mwaruga mîgate, mûkaavecaga Ngai-Mûnene mûgate wa mbere kuuma maketharî ma irio cienyu cia mbere rîrî îtega.

²¹ Njiarwa cienyu cionthe nîitûûra indutagîra îtega rîîrî.

²² “Nwatî mûndû nwa aremwe nî kûvingia atakwenda mawatho monthe marîa naveere Musa,

²³ kana vuvarî andû onthe maremwe nî kûvingia mawatho marîa naveecanire na njîra ya Musa.

²⁴ Ethîrwa andû onthe maaregire kûvingia mawatho mau matakûmenya, makaarutaga ndegwa îmwe îrî îtega rîa kûvîvua nîguo mûtararûko warîo ûkenie Ngai-Mûnene. Makaarutanagîria na îtega rîa irio cia mûgûnda, na îtega rîa indo cia kûnyuwa, na marute nthenge îmwe rîrî îtega rîa kûtheria mevia.

²⁵ Mûthînjîri-Ngai nîakaarûtha mambura ma kûtheria andû onthe a Isiraeli, na nîmakooverwa nîûndû meevirie matakûmenya, na nîarutu îtega rîa kûvîvua na îtega rîa kûtheria mevia kûrî Ngai-Mûnene nîûndû wa mevia mao.

²⁶ Andû onthe a Isiraeli wana ageni arîa matûûranagia nao nîmakooverwa mevia, nîûndû onthe meekire mevia mau matakwenda.

²⁷ “Ethîrwa mûndû ûmwe nî akeevia atakûmenya, mûndû ûcio nîakaaruta mvarika îmwe ya ûkûrû wa mwaka ûmwe îrî îtega rîa kûtheria mevia.

²⁸ Nake mûthînjîri-Ngai nîakaarutîra Ngai-Mûnene îgongoona rîa kûtheria mevia, nîûndû wa mûndû ûcio wîvîtie atakûmenya na mûndû ûcio nî akooverwa mevia make.

²⁹ Watho ûyû ûkaarûmagîrîrwa nî andû onthe arîa makeevia matakûmenya, marî andû a Isiraeli kana ageni arîa matûûranagia nao.

³⁰ “Nwatî mûndû ûrîa wîvagia akîmenyaga, arî Mûisiraeli kana arî mûgeni, ethagîrwa akîruma Ngai-Mûnene. Mûndû ûcio akaathengutagua andûrî a Ngai-Mûnene.

³¹ Mûndû ûcio akaathengutagua kûrî andû arîa engî viû nîûndû wa kûruma Ngai-Mûnene na kuna rîathani rîake, na akaaverithagua nîûndû wa mevia make.”

Kuna watho wa thavatû

³² Rîrîa andû a Isiraeli maarî werûrî, nîmoonire mûndû akiuna ngû mûthenya wa thavatû,

³³ na makîmûvira kûrî Musa, Aroni vamwe na andû onthe a Isiraeli.

³⁴ Nîmeekarire mamûrangîrîte nîûndû gûtiamenyekaga waro ûrîa agûtuîrwa.

³⁵ Ngai-Mûnene nîwacokire akîra Musa atîrî, “Mûndû ûcio nwanginya aûragwe; andû onthe a Isiraeli nîmamûrage na mathiga arî nja ya kûrîa maatûûraga.”

³⁶ Kwoguo andû onthe a Isiraeli nî maarutire mûndû ûcio nja ya kûrîa maatûûraga na makîmûraga na mathiga wata ûrîa Ngai-Mûnene aathîte Musa.

Mawatho megiî igaaci

³⁷ Ngai-Mûnene nîwerire Musa

³⁸ ere andû a Isiraeli atîrî, “Rûthani igaaci na mûitumîrîre mîenarî ya nguo cienyu na mwoverere mûkumbû wa rangi wa vururu kûrî wa kîgaaci. Njiarwa cienyu cionthe nîitûûra ciîkaga ûguo.

³⁹ Mûkethagîrwa mûrî na igaaci icio nîguo mwairoria mûkaririkana maathani monthe makwa na mûkamavingia. Kwoguo mûtikaandiganîria nîguo mûrûmîrîre wendi wa ngoro cienyu na meciria menyu.

⁴⁰ Igaaci icio ikaamûririkanagia kwathîkîra maathani makwa monthe na mwîthagîrwe mûrî atheru mbere yakwa.

⁴¹ Nî nie Ngai-Mûnene, Ngai wenyu ûrîa wamûrutire vûrûri wa Misiri nîguo nduîke Ngai wenyu. Nie nînie Ngai-Mûnene, Ngai wenyu.”