Ndari 14 - ÎVUKU RÎA ÛVORO MWARO

Andû nîmaatetire

¹ Ûtukû ûcio wonthe andû onthe a Isiraeli nîmaarîrire maugîrîrîtie.

² Nîmaatetirie Musa na Aroni makiugaga atîrî, “Wana kava tûngîakuîrîre Misiri kana tûkuîre gûkû werûrî!

³ Ngai-Mûnene aratûvira vûrûrirî ûcio nîkî? Tûkaaûragîrwa mbaararî na aka etû na ciana itavwe. Tî kava tûcoke Misiri?”

⁴ Kwoguo nîmeeranire atîrî, “Tigani tûthuure mûndû wa gûtûtongoria nîguo tûcoke Misiri!”

⁵ Musa na Aroni nîmaacokire makînamîrîria mothiû mao nthî mbere ya andû onthe a Isiraeli arîa maagomanîte vau.

⁶ Nake Joshua mûvîcî wa Nuni, na Kalebu mûvîcî wa Jefune, arîa maarî amwe a andû arîa maathiîte kûthigana vûrûri ûcio nîmaatembûrangire nguo ciao,

⁷ na makîra andû onthe a Isiraeli atîrî, “Vûrûri ûrîa twathiîre kûthigana nî mwaro mûno.

⁸ Ethîrwa Ngai-Mûnene nîakwona tûrî agîrîru, nîagûtûvira vûrûrirî ûcio wîcûrîte îriia na ûûkî na atûve guo.

⁹ Kwoguo mûtikaregane na Ngai-Mûnene na mûtigetigîre andû arîa marî vûrûrirî ûcio. Nîtûmataguna ta mûgate. Kîrîa kîmagitagîra nîkîthengutie kûrî o. Ngai-Mûnene arî vamwe natue, mûtikametigîre.”

¹⁰ Nwatî andû onthe a Isiraeli nîmeendire kûûraga Joshua na Kalebu na mathiga. Wa rîmwe Ngai-Mûnene nîwaumîrîre andû onthe a Isiraeli na riiri mûnene ûrîa moonire ûrî îgûrû rîa îgema rîa Ngai-Mûnene.

Musa nîwavoere andû a Isiraeli

¹¹ Ngai-Mûnene nîwaûririe Musa atîrî, “Andû aya nîmatûûra mareganîte nanie nginya rî? Nîmatûûra maregete kûnîîvoka nginya-rî, na nîguo nanaringa ciama nyîngî makîonaga?

¹² Nîngûmarega na nîmaûrage na mûthiro, njoke ngûtue rûrîrî rûnene na rûrî na vinya kûmakîra.”

¹³ Nwatî Musa nîwerire Ngai-Mûnene atîrî, “Warutire andû aya vûrûri wa Misiri na vinya waku. Andû a Misiri megua ûrîa wîkîte andû aku,

¹⁴ nîmakeera andû arîa matûûraga vûrûri ûyû. Andû a vûrûri ûyû nîmarîkîtie kwîgua atî we, Ngai-Mûnene, wîthagîrwa ûrî vamwe natue, na atî we nîwonekaga rîrîa îtu rîaku rîarûngama îgûrû rîetû. Nîmeguîte atî ûthiîcaga ûrî mbere yetû na gîtugî Kîam îtu mûthenya, na ûtukû ûkathiî na gîtugî Kîam mwaki.

¹⁵ Ûngîûraga andû aku onthe, andû a mavûrûri marîa mengî arîa meguîte ngumo yaku, makaauga atî

¹⁶ we waûragîre andû aku werûrî nîûndû nîwaremirwe nî kûmakinyia vûrûrirî ûrîa wamerîre.

¹⁷ Kwoguo Ngai-Mûnene, nakûthaitha wonanie ûvoti waku na wîke ûrîa waranîre rîrîa waugire atîrî,

¹⁸ ‘Nie, Ngai-Mûnene, ndiviûvaga kûrakara na mbîcûrîtwe nî wendo ûtathiraga, na nînjovanagîra mevia na waganu. Nwatî ndikaarega kûverithia ciana wana ciana cia ciana ciao nginya njiarwa ya kathatû na ya kana nîûndû wa mevia ma aciari ao.’

¹⁹ Ngai-Mûnene, nîûndû wa ûrîa wendo waku ûtathiraga, nakûthaitha wovere andû aya mevia mao, wata ûrîa ûtwîre ûmovagîra kuuma rîrîa maaumire Misiri nginya ûmûnthî.”

²⁰ Ngai-Mûnene nîwacokerie Musa atîrî, “Nînamovera wata ûrîa wambûria.

²¹ Nwatî nîngwîranîra nama atî, wata ûrîa ndûûraga mwoyo na wata ûrîa riiri wakwa wîcûrîte nthî yonthe,

²² gûtirî wanarî ûmwe wa andû aya ûgaatonya vûrûri ûcio wa kîîranîro. O nîmonete riiri wakwa na ciama irîa naaringire marî Misiri na marî gûkû werûrî, nwatî nîmaregete kûmbathîkîra na makangeria maita îkûmi.

²³ Matigaatonya vûrûrirî ûrîa nerîre methe mao ma tene. Gûtirî wanarî mûndû ûmwe wa acio maareganire nanie ûgaatonya vûrûrirî ûcio.

²⁴ Nwatî nîûndû ndungata yakwa Kalebu aarî na roho ngûrani na arîa engî ûrîa wamûgucagia na eethîrîtwe akîmbathîkîra, nîngaatûma akinye vûrûrirî ûrîa aathiganire, na njiarwa ciake nîikegwatîra vûrûri ûcio ûtuîke wao.

²⁵ Kûu ciandarî icio nîkuo Amaleki na Akanaani matûûraga. Kwoguo rûyû nîmûkaagarûrûka mûthiî werûrî na njîra îrîa îthiîte Îria Îtune.”

Ngai-Mûnene nîwaverithirie andû nîûndû wa gûteta

²⁶ Ngai-Mûnene nîwerire Musa na Aroni atîrî,

²⁷ “Nî nginya rî andû aya aganu magûtûûra matetaga nîûndû wakwa? Nîmbîguîte ûrîa andû a Isiraeli methîrîtwe magîteta nîûndû wakwa!”

²⁸ Kwoguo meere, Nie Ngai-Mûnene nauga atîrî, “Wata ûrîa ndûûraga mwoyo, maûndû mau mwaria ngîgucaga nîngûmûvingîria mo.

²⁹ Nîmûgaakua na ciimba cienyu inyagarûke gûkû werûrî. Gûtirî mûndû wanarî ûmwe gatagatîrî ka acio maatarîtwe na warî na ûkûrû wa mîaka mîrongo îîrî na makîria, ûgaatonya vûrûri wa kîîranîro, nîûndû nîmaandetirie.

³⁰ Gûtirî mûndû wanarî ûmwe wenyu ûgaatonya vûrûri ûrîa neranîre atî nî ngaamûva, tiga Kalebu mûvîcî wa Jefune na Joshua mûvîcî wa Nuni.

³¹ Nwatî ciana cienyu irîa mwaugire atî nîigaatavwa nîcio igaatonya vûrûri ûcio mwaregire, matûûre kuo na maûkenerere.

³² Nwatî ciimba cienyu igaatigwa gûkû werûrî.

³³ Ciana cienyu igaatûûra ciûrûraga werûrî îvinda rîa mîaka mîrongo îna (40). Igaatûûra inyamaraga îvinda rîu rîonthe nîûndû wa ûremi wenyu, nginya rîrîa muonthe mûgaakuîra werûrî.

³⁴ Mûgaatûûra mûnyamaraga mûrî werûrî îvinda rîa mîaka mîrongo îna (40). Mwaka ûmwe ûkaarûngamagîrîra mûthenya ûmwe wa mîthenya îrîa mwaûrûraga mûrî werûrî nîguo mûmenye nînaarakarire!

³⁵ Nie, Ngai-Mûnene nauga nama, atî ûguo nîguo ngaamwîka mue andû aya aganu mûnganîte vamwe nîguo mûregane nanie. Mue muonthe mûgaakuîra gûkû werûrî.”

³⁶ Andû arîa maatûmîtwe nî Musa mathiî makathigane vûrûri nîmaacokirie ndeto itarî cia ma na magîtûma andû onthe matetia Ngai-Mûnene.

³⁷ Ngai-Mûnene nîwatûmire andû acio maaretire ndeto itarî cia ma ciîgiî vûrûri ûcio, maûragwe nî mûthiro.

³⁸ Nwatî Joshua mûvîcî wa Nuni, na Kalebu mûvîcî wa Jefune nîmaatigarire.

Riita rîa mbere rîa Aisiraeli kûgeria kûtharîkîra vûrûri ûcio

³⁹ Rîrîa Musa eerire andû onthe a Isiraeli maûndû mau, nîmaarakarire mûno.

⁴⁰ Mûthenya ûcio warûmîrîrîte kîraûko tene, nîmaaûkîrire makîthiî kûthithûkîra vûrûri ûcio ûrî irîma. Nao maaugire atîrî, “Nîtwetîkîra atî tûrî eviu; kwoguo nîtûkûthiî vûrûrirî ûrîa Ngai-Mûnene aatwîrîre.”

⁴¹ Nwatî Musa nîwaugire atîrî, “Nîndûî gîtûmaga mûrega kwathîkîra Ngai-Mûnene? Mûtikavootana!

⁴² Mûtikathiî vûrûrirî ûcio nîûndû Ngai-Mûnene tîethîrwa arî namue, na mûkavootwa nî nthû cienyu.

⁴³ Amaleki na Akanaani nîmakaarûa namue na mamûûrage, nîûndû nîmûregete kwathîkîra Ngai-Mûnene. Ke tîethîrwa arî vamwe namue nîûndû nîmûregete kwathîkîra Ngai-Mûnene.”

⁴⁴ Nwatî nîmaûmirie ciongo na makiunûkia mathiîte vûrûrirî ûrîa ûrî irîma. Nîmaatigire Musa wana îthandûkû rîa kîrîkanîro kûu maambîte magema.

⁴⁵ Nao Amaleki na Akanaani arîa maatûûraga vûrûrirî ûcio nîmaamatharîkîre makîmavoota na makîmavinyûria nginya Horima.