Ndari 13 - ÎVUKU RÎA ÛVORO MWARO

Athigani

¹ Ngai-Mûnene nîwerire Musa atîrî,

² “Thuura mûtongoria ûmwe ûmwe kuuma mîvîrîgarî îkûmi na îîrî ya andû a Isiraeli, na ûmatûme makathigane vûrûri wa Kanaani ûrîa ngaava andû a Isiraeli.”

³ Kwoguo Musa nîwatûmire atongoria a andû a Isiraeli kuuma werûrî wa Parani wata ûrîa aathirwe nî Ngai-Mûnene.

⁴ Atongoria acio maarî: Shamua mûvîcî wa Zakuri kuuma mûvîrîgarî wa Reubeni,

⁵ Shavatu mûvîcî wa Hori kuuma mûvîrîgarî wa Hori,

⁶ Kalebu mûvîcî wa Jefune kuuma mûvîrîgarî wa Juda,

⁷ Igali mûvîcî wa Josefu kuuma mûvîrîgarî wa Isakaru,

⁸ Hoshea mûvîcî wa Nuni kuuma mûvîrîga wa Efiraimu,

⁹ Paliti mûvîcî wa Rafu kuuma mûvîrîgarî wa Benjamini,

¹⁰ Gadieli mûvîcî wa Sodi kuuma mûvîrîgarî wa Zebuluni,

¹¹ Gadi mûvîcî wa Susi kuuma mûvîrîgarî wa Josefu (mûvîrîga wa Manase),

¹² Amieli mûvîcî wa Gemali kuuma mûvîrîgarî wa Dani,

¹³ Sethuri mûvîcî wa Mikaeli kuuma mûvîrîgarî wa Asheri,

¹⁴ Nahibi mûvîcî wa Vofisi kuuma mûvîrîgarî wa Nafutali,

¹⁵ Geueli mûvîcî wa Maki kuuma mûvîrîgarî wa Gadi.

¹⁶ Acio nîo athigani arîa Musa aatûmire makathigane vûrûri wa Kanaani. Musa nîwagarûrire rîîtwa rîa Hoshea mûvîcî wa Nuni akîmwîta Joshua.

¹⁷ Rîrîa Musa aamatûmire makathigane vûrûri wa Kanaani, nîwamerire atîrî, “Unûkîrîriani vûrûrirî wa Negebu mûthiî vûrûrirî ûrîa ûrî irîma.

¹⁸ Mûtuîrie mwone ûrîa vûrûri ûcio wîkariî, andû a vûrûri ûcio megana atîa, na mûmenye kana marî na vinya.

¹⁹ Tuîriani mwone vûrûri ûcio nî mwaro kana tî mwaro na mûtuîrie mwone matûûra mao nî mairigîre na rûthingo rwa vinya kana tî mairigîre.

²⁰ Tuîriani mwone kana vûrûri ûcio nî mûnoru, kana tî mûnoru, ûrî na mîtî kana ndûrî. Îîyûmîrîrieni na mûndetere matunda mamwe ma vûrûri ûcio.” (Vîndî îo nîrîo thavibu ciambagîrîria gûtunîva.)

²¹ Kwoguo athigani acio nîmaaunûkirie na makîthigana vûrûri ûcio mambîrîrîtie werû wa Zini nginya Rehobi vakuvî na njîra îrîa îthiîte Hamathi.

²² Nîmaaunûkirie makîthiî mwena wa Negebu na magîkinya Heburoni. Kûu nîkuo meethîrîrie Ahimani, Sheshai, na Talimai njiarwa cia Anaki. (Heburoni yatumirwe mîaka mûgwanja mbere ya Zoani îrîa îrî Misiri.)

²³ Rîrîa maakinyire Kîamndarî Kîam Eshikoli nîmaatuire rûvûa rwa mûthavibu rûrî na kîmanja Kîam thavibu na makîrûkuuanîra na mîtî marî andû aîrî. Wana nîmaatuire ngûngûmanga na ngûû makîthiî nacio.

²⁴ Vandû vau veetirwe Kîanda Kîam Eshikoli nîûndû wa kîmanja Kîam thavibu kîrîa andû a Isiraeli maatuire kuo.

²⁵ Vuva wa mîthenya mîrongo îna athigani nîmaacokire kûrîa maambîte magema.

²⁶ Nîmaathiîre kûrî Musa, Aroni, na andû onthe a Isiraeli kûu Kadeshi werûrî wa Parani, na makîmeera ûrîa moonire, na makîmoonia matunda ma vûrûri ûcio.

²⁷ Athigani acio nîmeerire Musa atîrî, “Nîtûratuîririe vûrûri ûcio twona ûrî na îriia rîîngî na ûûkî, na mama nî matunda mamwe ma vûrûri ûcio.

²⁸ Nwatî andû arîa matûûraga vûrûrirî ûcio nî anene mûno na matûûra ma kuo nî mairigîre na nthingo cia vinya, na nî manene mûno. Makîria ya ûguo, nîtwonire njiarwa cia Anaki kuo.

²⁹ Amaleki matûûraga Negebu. Nao Ahiti, Ajebusi, na Amori matûûraga vûrûri ûrîa ûrî irîma. Nao Akanaani matûûraga vakuvî na îria rîa Mediterania na ndeererî cia rûnjî rwa Jorodani.”

³⁰ Kalebu nîwakiririe andû arîa maanegenaga marî mbere ya Musa. Nîwamerire atîrî, “Tue tûrî na vinya wa kûvoota andû arîa marî vûrûrirî ûcio. Kwoguo tûthiîni tûûtharîkîre rîu na tûwoce ûtuîke wetû.”

³¹ Nwatî andû arîa maathiîcanîtie na Kalebu nîmaaugire atîrî, “Naarî tûtingîvota kûthiî kûrûa na andû acio nîûndû marî na vinya gûtûkîra.”

³² Kwoguo athigani acio nîmaavenirie andû a Isiraeli ûvoro wîgiî vûrûri ûcio maathiîte kûthigana rîrîa maaugire atîrî, “Vûrûri ûrîa tûthiûrûrûkîte tûkîûthigana nî mûgînju mûno wana ndwîganagîria andû a guo irio. Nao andû onthe arîa twonire maarî araca na anene mûno.

³³ Wana nîtwonire njiarwa cia Anaki, andû arîa megana marimû, tweyonire tûnyivîte ta mvandi tûrî mbere yao. Na wanao nwaguo moonaga twîgana.”