Ndari 12 - ÎVUKU RÎA ÛVORO MWARO

Miriamu nîwaverithirue

¹ Aroni na Miriamu nîmaamenererie Musa nîûndû wa mûndûmûka Mûkushi ûrîa aavikîtie.

² Nîmaaûririe atîrî, “Nîkwa Ngai-Mûnene arîrîtie Musa tu? Na kinthî wanatue ndatwarîrîtie?” Nake Ngai-Mûnene nîwegwire ûrîa maaugire.

³ (Musa aarî mûndû mûvoreri mûno. Gûtirî mûndû warî mûvoreri take nthî yonthe.)

⁴ Kwoguo Ngai-Mûnene nîwaririe wa rîmwe na Musa, Aroni na Miriamu akîmeera atîrî, “Ûkani îgemarî rîa Ngai-Mûnene wamue athatû.” Nao nîmaathiîre vo.

⁵ Nake Ngai-Mûnene nîwanyûrûrûkire arî îtuurî na akîrûngama mûromorî wa îgema rîa gûcemanîrua. Nîwetire Aroni na Miriamu; na oîrî makîthiî varî ke.

⁶ Ngai-Mûnene, nîwamerire atîrî, “Tanthikîrîriani! Rîrîa kûrî na arathi gatagatîrî kenyu, nie nîîmenyithanagia kûrî o na njîra ya cioneki na ngamarîria na njîra ya iroto.

⁷ Nwatî ûguo tîguo mbaragia na ndungata yakwa Musa. Nîke nîîvokerete andû akwa onthe a Isiraeli.

⁸ Mbaragia nake metho kwa metho, na mbaragia cararûkû ndagûtûmîra nthimo. Ke nîwîcî ûrîa mvana! Mwaregire gwîtigîra nîkî mûkîaria maûndû macûku megiî ndungata yakwa Musa?”

⁹ Ngai-Mûnene nîwarakarirue nîo, na nîwathiîre akîmatiga.

¹⁰ Rîrîa îtu rîaumire vau îgûrû rîa îgema, Miriamu nîwonekire arî na mûrimû mûcûku wa ngothi, na mwîrî wake wonthe ûcerûvîte ta îra. Rîrîa Aroni evûgûrire na akîona Miriamu arî na mûrimû mûcûku wa ngothi,

¹¹ nîwerire Musa atîrî, “Mwathi wakwa, nakûthaitha ndûgatûverithie nîûndû wa wîvia ûyû twîkîte na ûrimû.

¹² Ndûkareke Miriamu ekare ta mûndû wavunirwe na ciîga imwe irî ndîku.”

¹³ Kwoguo Musa nîwarîrîre Ngai-Mûnene akîmwîra atîrî, “Ûûi, Ngai, nakûthaitha ûmûvonie!”

¹⁴ Nwatî Ngai-Mûnene nîwacokerie Musa atîrî, “Kethîrwa îthe nîwamûtuîrîre mata ûthiû, Miriamu angîagîîre gîconoko îvinda rîa mîthenya mûgwanja. Kwoguo nîengatwe kuuma kûrîa mûtûûraga îvinda rîa kiumia kîmwe, na vuva wa ûguo acokue.”

¹⁵ Ûguo nîguo Miriamu eengatirwe kuuma kûrîa maatûûraga îvinda rîa mîthenya mûgwanja na andû matiathiî na mbere na rûgendo nginya rîrîa aacokirue rîngî.

¹⁶ Vuva wa ûguo andû nîmaaumire Hazerothi na makîthiî magîkara werûrî wa Parani.