Ndari 11 - ÎVUKU RÎA ÛVORO MWARO

Mwaki kuuma kûrî Ngai-Mûnene

¹ Andû a Isiraeli nîmaatetire nîûndû wa mathîna marîa moonaga. Rîrîa Ngai-Mûnene eegwire mateta mao, nîwarakarire na agîtûma mwaki kûrî andû acio. Mwaki nîwakanire kûu andû acio maarî na ûkîvîvia mîena îmwe nja ya kûrîa maambîte magema.

² Andû nîmaarîrîre Musa, na rîrîa Musa aavoire Ngai-Mûnene mwaki nîwavorire.

³ Kwoguo vandû vau nîveetirwe Tabera nîûndû mwaki wa Ngai-Mûnene nîwakanire gatagatîrî ka andû acio.

Musa nîwathuurire atongoria mîrongo mûgwanja

⁴ Kwarî na andû ageni mathiîcanîtie na andû a Isiraeli. Andû acio maarî na ngumba ya nyama mûno. Kwoguo nîmaatûmire andû a Isiraeli mambîrîria kûrîra makiugaga atîrî, “Narî kethîrwa tûrî na nyama cia kûrîa!

⁵ Tûrî Misiri twarîcaga nthamaki tûtakûrîva, marenge ma mîthemba yonthe, itûngûrû cia mîthemba yonthe.

⁶ Nwatî rîu tûrî athiru vinya. Tûtirî na kîndû kîngî gîa kûrîa tiga maana ntheri mûthenya wa mûthenya!”

⁷ Maana yekariî ta tûvîndî tûnini twa rangi wa erûû îno nthararu.

⁸ Andû nîmaaûnganagia maana îo makamîthîa na ithîi kana makamîkima na ndîrî. Nîmaarugaga maana îo na nyûngû mamîrûthîte ta mîgate. Yacamaga ta geki irugîtwe na maguta ma ndamaiyû.

⁹ Îme rîkîgwa ûtukû kûrîa maambîte magema rîagwîcanagîria na maana îo.

¹⁰ Nake Musa nîwegwire andû makîrîra marûngamîte wa mûndû mûromorî wa îgema rîake. Ngai-Mûnene nîwarakarire mûno nî andû acio, na Musa ndaakenua nî ûndû ûcio.

¹¹ Kwoguo Musa nîwerire Ngai-Mûnene atîrî, “Ûmbîkîte naaî ûguo nîkî? Ûrakarîte nînie nîkî? Ûnduîte mûmenyereri wa andû aya onthe nîkî?

¹² Tînie naûmbire andû aya kana ngîmaciara! Nîndûî gîatûmire ûndua ta ng'ina wao nîmakuuage ta tûkenge nîmavire vûrûri ûrîa werîre methe mao ma tene na mwîvîtwa atî nîûkaamava?

¹³ Andû aya onthe mararîra makîmbîraga nîmave nyama marîe; nînîmarutîra kû?

¹⁴ Ndingîvota gûtitika andû aya onthe nîrî nienga; nîarito mûno!

¹⁵ Ethîrwa ûguo nîguo ûkûthiî na mbere kûmbîka nakûthaitha ûmbûrage nîguo ndige kûthînîka ûguo nîrathînîka.”

¹⁶ Ngai-Mûnene nîwerire Musa atîrî, “Nyûnganîria athuuri mîrongo mûgwanja arîa wîcî atî nî atongoria a andû a Isiraeli na mûke mûrûngame îgemarî rîa Ngai-Mûnene.

¹⁷ Nîngûnyûrûrûka vo twarie nawe na mboce gîcunjî Kîam roho ûrîa nakûveere nîmave nîguo magûtethagîrîrie gûtongoria andû aya ndûkamatongorie ûrî wenga.

¹⁸ Coka wîre andû atîrî, ‘Îîtherieni nîûndû rûyû nîmûkaarîa nyama. Kîrîro kîenyu nîgîkinyîrîte Ngai-Mûnene. Mwîthîrîtwe mûkîrîrîra Ngai-Mûnene mûkiugaga atî mûrenda kûrîa nyama nîûndû Misiri kwarî kwaro gûkîra gûkû. Rîu Ngai-Mûnene nîakûmûva nyama mûrîe.

¹⁹ Tî mûrîa nyama mûthenya ûmwe, kana îîrî, kana îtano, kana îkûmi, kana mîrongo îîrî,

²⁰ nwatî nîmûirîa mweri mûgima. Nîmûirîa ciume na maniûrû, na mûtimbwe nîcio nîûndû nîmûreganîte na Ngai-Mûnene ûrîa ûrî vamwe namue. Mwîthîrîtwe mûgîteta mbere yake mûkiugaga wana nîkava mûtangîaumire Misiri.’ ”

²¹ Musa nîwerire Ngai-Mûnene atîrî, “Nie ndongoretie andû ngiri magana matandatû (600,000), na ûrauga atî nîûkûmava nyama cia kwîgana mweri mûgima!

²² Ng'ombe, mbûri na ng'ondu irîa tûrî nacio ingîthînjwa nwa ciîgane cia kûrîwa nî andû aya? Nthamaki cionthe irîa irî îriarî ciamegana?”

²³ Nake Ngai-Mûnene nîwacokerie Musa atîrî, “Anga vinya wakwa wîthagîrwa ûrî na kîthimi? Eterera wone kana ûrîa mbugîte tîgûtuîkîka!”

²⁴ Kwoguo Musa nîwathiîre kûrî andû na akîmeera ûrîa Ngai-Mûnene aaugîte. Nîwaûnganirie athuuri mîrongo mûgwanja na akîmeera marûngame mathiûrûrûkîrîtie îgema rîa gûcemanîrua.

²⁵ Ngai-Mûnene nîwacokire akînyûrûrûka arî îtuurî na akîarîria Musa. Nîwocire gîcunjî Kîam roho ûrîa aaveete Musa na akîûvecana kûrî athuuri acio mîrongo mûgwanja. Nao athuuri acio magîa na roho ûcio, nîmaambîrîrie kwaria ta arathi, nwatî gwa kavinda kanini.

²⁶ Andû aîrî gatagatîrî ka athuuri acio mîrongo mûgwanja na nîo Elidadi na Medadi, mekarire kûrîa maambîte magema na matiathiî îgemarî rîa gûcemanîrua. Marî kûu magemarî mao nîmaanyûrûrûkîrwe nî roho na wanao makîambîrîria kwaria ta arathi.

²⁷ Mwanake ûmwe nîwavinyûrire kûrî Musa na akîmwîra atîrî, “Elidadi na Medadi nîmararia ta arathi marî kûrîa mambîte magema.”

²⁸ Nake Joshua mûvîcî wa Nuni, ûrîa wethîrîtwe arî mûtethereria wa Musa kuuma arî mwanake mûnini, nîwerire Musa atîrî, “Mwathi wakwa, makanie!”

²⁹ Nwatî Musa nîwamwîrire atîrî, “Tiga kûmaka nîûndû wakwa. Nîngîenda Ngai-Mûnene ave andû ake onthe roho matuîke arathi!”

³⁰ Musa na athuuri acio mîrongo mûgwanja a Isiraeli nîmaacokire kûrîa maambîte magema.

Ngai-Mûnene nîwatûmire tûthirimûkû

³¹ Ngai-Mûnene nîwatûmire kûgîe na rûvuvo. Naruo nîrwaretire tûconi twetagwa tûthirimûkû kuuma îriarî na tûkîrigicîria gîcunjî kînene mîena yonthe kûrîa andû maambîte magema. Ciagwa nthî ciaûmbanîrîrîte na ûrikîru ta mita îmwe.

³² Kwoguo nîmaaûnganirie tûthirimûkû tûu mûthenya na ûtukû ûcio na mûthenya ûcio warûmîrîrîte wonthe. Gûtirî mûndû waûnganirie nini gûkîra kilo ngiri îmwe. Nao nîmaatûnyagarûkirie tûthiûrûrûkîrîtie kûu maambîte magema nîguo tûnyiare.

³³ Wa vîndî mambîrîria kûrîa nyama ciatuo Ngai-Mûnene nîwarakarire nîo na nîwamaretithîrie mûthiro mûnene.

³⁴ Kwoguo vandû vau nîvaatuîrîrwe rîîtwa Kivirothi Hatava (ûguo nî kuga mbîrîra cia arîa akoroku) nîûndû vau nîvo andû arîa maarî na ngumba ya nyama maathikirwe.

³⁵ Mauma Kivirothi Hatava, maathiîre makîamba magema mao Hazerothi.