Ndari 10 - ÎVUKU RÎA ÛVORO MWARO

Tûrumbeta twa sîlûva

¹ Ngai-Mûnene nîwerire Musa atîrî,

² “Rûtha tûrumbeta twîrî twa sîlûva twa gûturwa. Ûgaatûmagîra tûrumbeta tûu gwîta andû vamwe, na kûmeera mambûre magema.

³ Tûrumbeta tûu twîrî twavuvwa, andû onthe makaagomanaga varî we vau mûromorî wa îgema rîa Ngai-Mûnene.

⁴ Nwatî karumbeta kamwe tu kavuvwa, atongoria na anene a mîvîrîga ya andû a Isiraeli nîo makaagomanaga varî we.

⁵ Karumbeta kavuvwa na mûgambo mûnini, andû arîa mambîte magema mwena wa îrathîro nîmakaambîrîria rûgendo.

⁶ Rîrîa karumbeta gakaavuvwa na mûgambo mûnini riita rîa kaîrî, andû arîa mambîte magema mwena wa îveti nîmakaambîrîria rûgendo. Kwoguo karumbeta gakaavuvagwa na mûgambo mûnini rîrîa andû makwambîrîa rûgendo.

⁷ Nwatî rîrîa andû magwîtwa magomane vamwe karumbeta gakaavuvagwa na mûgambo mûnene.

⁸ Tûrumbeta tûu tûkaavuvagwa nî avîcî a Aroni, athînjîri-Ngai. “Watho ûyû nîûtûûra ûrûmagîrîrwa nî njiarwa cienyu cionthe.

⁹ Vîndî îrîa mûrarûa na nthû yenyu îrîa îmûthithûkîrîte kûu vûrûrirî wenyu, vuvagani tûrumbeta na vinya mûno. Nie Ngai-Mûnene Ngai wenyu, nîngaamûtethia na nîmûvonokie kuuma kûrî nthû cienyu.

¹⁰ Mîthenya yenyu ya gîkeno, irugo cia mweri ûgîcicûka, na irugo icio ciîngî vuvagani tûrumbeta rîrîa mûkûruta matega ma kûvîvua na matega ma thayû. Tûrumbeta tûu tûgaatûmaga mûririkane Ngai wenyu. Nie nînie Ngai-Mûnene, Ngai wenyu.”

Aisiraeli nîmaambîrîrie rûgendo

¹¹ Îtu rîrîa rîarî îgûrû rîa îgema rîa gûcemanîrua nîrîathengutire mûthenya wa mîrongo îîrî mweri wa kaîrî mwaka wa kaîrî kuuma andû a Isiraeli mauma Misiri.

¹² Nao Aisiraeli nîmaambîrîrie rûgendo makiuma werûrî wa Sinai. Îtu nîrîathiîre rîkîrûngama werûrî wa Parani.

¹³ Andû a Isiraeli nîmaambîrîrie rûgendo wata ûrîa Ngai-Mûnene amaathîte na njîra ya Musa.

¹⁴ Maathiîcaga vîndî cionthe marûmanîrîrîte gîkundi wa gîkundi mambîrîrîtie na mûvîrîga wa Juda na matongoretue nî vendera yao. Nahashoni mûvîcî wa Aminadabu nîke warî mûtongoria wao.

¹⁵ Nethanieli mûvîcî wa Zuari nîke warî mûtongoria wa andû a mûvîrîga wa Isakaru.

¹⁶ Eliabu mûvîcî wa Heloni nîke warî mûtongoria wa andû a mûvîrîga wa Zebuluni.

¹⁷ Îgema nîrîacokaga rîkambûrwa nayo mîvîrîga ya Gerishoni na Merari, arîa maarîkuuaga makambîrîria rûgendo.

¹⁸ Nîmaacokaga makarûmîrîrwa nî andû a mûvîrîga wa Reubeni marûmîrîrîte vendera yao. Maatongoretue nî Elizuri mûvîcî wa Shedeuri.

¹⁹ Shelumieli mûvîcî wa Zurishadai nîke watongoragia andû a mûvîrîga wa Simeoni.

²⁰ Eliasafu mûvîcî wa Deueli aarî mûtongoria wa andû a mûvîrîga wa Gadi.

²¹ Nao Alawi kuuma mûvîrîgarî wa Kohathu nîo maarûmagîrîra makuuîte indo irîa ntheru. Narîo îgema rîa gûcemanîrua nîrîambagwa rîngî mbere ya makinya.

²² Ikundi cia andû a mûvîrîga wa Efiraimu nîciambîrîrie rûgendo irûmîrîrîte vendera yao. Mûtongoria wao aarî Elishama mûvîcî wa Amihudi.

²³ Gamalieli mûvîcî wa Pendazuri nîke watongoragia andû a mûvîrîga wa Manase,

²⁴ nake Abidani mûvîcî wa Gideoni nîke watongoragia andû a mûvîrîga wa Benjamini.

²⁵ Mûthiiarî ikundi cia andû a mûvîrîga wa Dani, nîciambîrîrie rûgendo irûmîrîrîte vendera yao. Acio nîo maarî arangîri a ikundi cionthe mwena wa vuva. Mûtongoria wao aarî Ahiezeri mûvîcî wa Amishadai.

²⁶ Pagieli mûvîcî wa Okirani nîke watongoragia andû a mûvîrîga wa Asheri,

²⁷ nake Ahira mûvîcî wa Enani nîke watongoragia andû a mûvîrîga wa Nafutali.

²⁸ Ûguo nîguo ikundi cia andû a Isiraeli ciathiîcaga irûmanîrîrîte ng'endorî ciao.

²⁹ Musa nîwerire Hobabu, mûvîcî wa Jethiro, Mûmidiani (Jethiro aarî mûthoniwe wa Musa) atîrî, “Rîu tûthiîte vûrûrirî ûrîa Ngai-Mûnene aatwîrîre atî nîagaatûva. Ûka tûthiî nawe na tûgatûûrania waro; nîûndû Ngai-Mûnene nîerîrîte andû a Isiraeli maûndû maro.”

³⁰ Hobabu nîwacokirie atîrî, “Naarî nie tîmbûka, nîkwa ngûcoka vûrûrirî wetû na kûrî andû etû.”

³¹ Nake Musa nîwamwîrire atîrî, “Nakûthaitha ndûgatûtige. We nîwe wîcî kûrîa tûngîamba magema werûrî, na nwa we ûngîtûtongoria.

³² Tûngîthiî nawe, nîtûkagaana nawe kîrîa kîonthe Ngai-Mûnene agaatûrathima nakîo.”

Andû a Isiraeli nîmaambîrîrie rûgendo

³³ Kwoguo andû a Isiraeli nîmaaumire kîrîmarî kîrîa kîtheru gîa Sinai, na makîthiî rûgendo rwa mîthenya îthatû. Îthandûkû rîa kîrîkanîro Kîam Ngai-Mûnene nîrîamatongorerie nîguo rîmacarîrie vandû va kwamba magema.

³⁴ Kuuma varîa meethagîrwa mambîte magema kûthiî varîa vengî, maathiîcaga matongoreretue nî îtu rîa Ngai-Mûnene mûthenya.

³⁵ Îthandûkû rîa kîrîkanîro rîambîrîria kûthiî, Musa nîwaugaga atîrî, “Ngai-Mûnene ûkîra ûnyaganie nthû ciaku na ûtûme arîa makûmenete maûre!”

³⁶ Îthandûkû rîa kîrîkanîro rîarûngama, Musa nîwaugaga atîrî, “Ngai-Mûnene, coka kûrî andû ngiri makûmi meengî a Isiraeli!”